aRom 6 - Izere New Testament

Rine̱n ti be agap natoon yir baꞌ

¹ Yir ta fe̱ yir ane̱ e̱? Ta ya yir kasho̱o̱n be kunye rine̱n nong ritek Adakunom tin barang a?

² Wayo, cie̱k! Aye̱ yir n kus ni itak rine̱n. I ta bun i nye yir ane̱ i ta sor yir kaye̱e̱r rine̱n e̱?

³ Aser, yin ta ren yin ye yir cice̱r aya a tin nye yir abatisma kaye̱e̱r aYeso Kiristi a ti nye yir abatisma'me kaye̱e̱r riku wu aꞌa?

⁴ Kamok abatisma yir a ti ne̱r yir mak be wu, yir te yir azining be wu kaye̱e̱r riku wu. Kyo̱ndi a tá dorok aKiristi nure̱k be kutser be kuyiik Ada'me, anong ne yir gip ta sor yir kaye̱e̱r kusor kufas.

⁵ Ke n te yir azining be wu kaye̱e̱r riku wu katsak'e yir ta bun i te yir azining be wu kaye̱e̱r ku dorok wu nure̱k be kutser.

⁶ Yir ren yir ye an ti gak kuse yir kufe agbugbang kuri kufe rinerawe mak be wu fan ri bin be agap natoon yir. A nye anong fan i bu te yir ásam rine̱n baba.

⁷ Kamok ke anerawe ku a kam be agap rine̱n'ong.

⁸ Kyo̱o̱rna ke yir kus yir mak be aKiristi, yir ti no̱o̱k yir katsak ye yir ta bun sor yir mak be wu.

⁹ Kamok yir ren yir ye a dorok aKiristi nure̱k be kutser, a tà bun a ku baba baꞌ. Riku bun ri be rigwo̱m rikak natoon wu baꞌ.

¹⁰ Riku'ong a ta ku kamok rine̱n, a ku kutak kuzining tsek. Amma kusor wu a tá sor, a sor kamok kuyiik Adakunom.

¹¹ Anong ne yin gip, sok yin rice yin ye rine̱n n ku kaye̱e̱r yin, amma ne i sor yin kamok kuyiik Adakunom kaye̱e̱r aYeso aKiristi.

¹² Kamok anong, tu won yin rine̱n tin nye rigwo̱m natoon kuro̱m yin nong ta kuus yin amaan ike̱ng iya wu tà shim baꞌ.

¹³ Sang tu no̱o̱k yin afe kuro̱m yir abas akak kamok rine̱n baꞌ nong ku ta sor ares amaan kunye baꞌ. Amma no̱o̱k yin Adakunom rice yin kyo̱ndi áner aya a tú ku tun ba kaye̱e̱r riku nong a tú ku bun kaye̱e̱r kutser. Ne i no̱o̱k yin rice yin kyo̱ndi ares ku ninye ike̱re̱ i ta se gye̱r nasho̱o̱n Adakunom.

¹⁴ Rine̱n tin nye rigwo̱m natoon yin baꞌ, kamok sang Itsi ne ti nye rigwo̱m natoon yin baꞌ, amma ritek Adakunom.

Ásam kamok kunye kutek

¹⁵ To̱, iyong ane̱ e̱? Yir ta yiir nye yir rine̱n kamok sang Itsi i ti nye rigwo̱m natoon yir baꞌ amma ritek Adakunom e̱? Wayo, cie̱k!

¹⁶ Yin ren yin ye, ke yin no̱o̱k yin rice yin i ta te yin ásam aner akak, to̱, yin sor yin ásam aner ayong, ta kuus yin rife̱ wu aꞌa? Ka tu sor yin ásam rine̱n, ri tana sak ánerawe ta ku, ka tu kuus yin rife̱ Adakunom ri tana sak ta te yin gye̱r nasho̱o̱n wu.

¹⁷ Amma yir be yir riye̱ rikan be Adakunom kamok rine̱n ne ri tsang ri ti nye rigwo̱m natoon yin gbugbang, amma kyo̱o̱rna be riye̱ rizining yin kuus yin ike̱re̱ a tá ka bo̱so̱p yin'e.

¹⁸ A tá ka tun yin kaye̱e̱r rine̱n nong i ta te yin ásam kuse gye̱r.

¹⁹ Mi fe̱ rife̱ na kuri rife rinerawe kamok kuraar yin kufe ánerawe. Kyo̱ndi yin tá tsang i sok yin abas akak afe kuro̱m yin nong i tin nye yin ike̱re̱ i ta se kye̱re̱ ne amaan kunye, kyo̱o̱rna no̱o̱k yin rice yin kyo̱ndi ásam natoon kunye ike̱re̱ i tana tonong ye yin se yin gye̱r nong ta te yin azhe̱l'e.

²⁰ Nizen iya yin tá nye yin ásam rine̱n, ike̱ng ikak tá daam yin be kunye ike̱re̱ i ta se gye̱r nasho̱o̱n Adakunom baꞌ.

²¹ Akye̱ kuri ishorong ne yin tà se̱ yin kaye̱e̱r ike̱re̱ iyong i ta sen ka no̱o̱k yin isum kyo̱o̱rna e̱? Ike̱re̱ iyong be̱e̱n riku!

²² Amma kyo̱o̱rna a ta ma ka tun yin kaye̱e̱r rine̱n i tan te yin ásam Adakunom, ike̱ng iya yin tana se̱ yin nye kusor kuzhe̱l'e kuya ku tana be̱e̱n be kutser kufe izen izen.

²³ Kamok ishorong rine̱n nye riku, amma kunang Adakunom nye kutser kufe izen izen kaye̱e̱r aYeso Kiristi Agwo̱m Ágwo̱m yir.