aRom 5 - Izere New Testament

Kameneng riye̱ kaye̱e̱r Adakunom

¹ Kamok anong kum yir tan se̱ yir kute gye̱r nasho̱o̱n Adakunom kamok kuno̱o̱k katsak yir, yir sor yir caang be Adakunom kamok Agwo̱m Ágwo̱m yir, aYeso Kiristi.

² Natoon wu ne yir ti se̱ yir iren kuno̱ kaye̱e̱r ritek na yir tin sor yir kaye̱e̱r'e kamok kuno̱o̱k katsak yir. Aye̱ yir kare̱p i ta min te yir riye̱ natoon kuyiik Adakunom.

³ Sang anong tsek baꞌ, yir bun i nye yir riye̱ rikan kaye̱e̱r risam yir kamok yir ren yir ye risam be̱e̱n kutsesek.

⁴ Kutsesek be̱e̱n be kuse kutek ne kuse kutek be̱e̱n be kute riye̱.

⁵ Kute riye̱'me tin sak yir ta no̱ yir nisum baꞌ, kamok Adakunom sak Kabik Kazhe̱l'e tin no̱o̱k yir kushim wu whe̱re̱ kaye̱e̱r aye̱ yir.

⁶ Kamok nizen'e dim, kum ne yir ta kyem i naka tobok yir baꞌ, aKiristi ku kamok yir, yir afe i ta rayir Adakunom.

⁷ I ta ro̱ aner akak tana ku kamok áner aya a ta se gye̱r, amma kashim akak ta kyem a ku kamok áner aya a ta tonong kuse kutek.

⁸ Amma Adakunom tin tonong yir kushim wu dide̱ng anong, kum ne yir ru nye yir áfe rine̱n, aKiristi ku kamok yir.

⁹ Kum naso̱k aYeso ta sak yir ta te yir gye̱r nasho̱o̱n Adakunom, shita kyo̱o̱rna baꞌ a tin shesh kamok aKiristi fan riye̱ kubeseng Adakunom bu ni se̱ yir.

¹⁰ To̱, i ta se ye yir tsang i nye yir ámudo̱n Adakunom, amma a ti nye yir igaas be riku igon wu, shita kyo̱o̱rna baꞌ a ta min sak yir i ta te yir áferime̱ wu, a tin shesh yir kamok igon wu ta be kutser.

¹¹ Awan anong tsek baꞌ, aye̱ yir kare̱p kamok ike̱ng Adakunom tá nye be Agwo̱m Ágwo̱m yir aYeso Kiristi aya kamok wu ne kyo̱o̱rna yir ti nye yir igaas.

Adamu be aKiristi

¹² Kamok anong kyo̱ndi rine̱n tá no̱ nazatse kamok Adamu, rine̱n'e ne ri be̱e̱n be riku. Anong ne riku se natoon koangan, kamok koangan nye rine̱n.

¹³ Rine̱n tuse nazatse nizham a tá ra no̱o̱k Itsi, amma karo̱ kaya Itsi tu kuse baꞌ, a fa rine̱n baꞌ.

¹⁴ Gip ne anong, riku ti nye rigwo̱m natoon ánerawe kum nizen Adamu ma nizen aMusa, gip be áner aya sang rine̱n ba tá nye kushorop ike̱ng iya Adakunom tá fe̱ kyo̱ndi Adamu tá nye baꞌ. Adamu se kyo̱ndi aner ayong a tana be̱.

¹⁵ Amma kunang Adakunom tá no̱o̱k warak se kyo̱ndi rine̱n Adamu tá nye baꞌ. Ánerawe whe̱re̱ tá kus kamok rine̱n aner azining'ong, a tá nye Adamu. Amma ritek Adakunom nar ma ánerawe whe̱re̱ se̱ kunang wu a tá nye kamok ritek aner azining na, a ta nye aYeso Kiristi.

¹⁶ Anong gbak kunang'e se ze̱e̱r be rine̱n aner azining'ong. Amok a ta to̱'ong se natoon rine̱n rizining. Amma kunang'e se nama rine̱n whe̱re̱ ne ri be̱e̱n kuse gye̱r nasho̱o̱n Adakunom.

¹⁷ Rine̱n aner azining sak riku ti nye rigwo̱m natoon koangan. Amma áya a ta shan agbang ritek ne kunang kuse gye̱r nasho̱o̱n Adakunom tà nye rigwo̱m kaye̱e̱r kusor kufas kamok aner azining'ong aYeso Kiristi.

¹⁸ Kamok anong, kyo̱ndi rine̱n aner azining tá sak koangan ta ku, anong ne ike̱ng itek izining iya aner azining tá nye i ta sak koangan te gye̱r nasho̱o̱n Adakunom ne i ta be̱e̱n ánerawe kutser kufas.

¹⁹ Kyo̱ndi kushonong aner azining tá sak ánerawe whe̱re̱ ta te áfe rine̱n, anong ne aner whe̱re̱ ta se̱ kute gye̱r nasho̱o̱n Adakunom kamok kuwon dar kushonong aner azining.

²⁰ Ike̱ng i tá sak a ta nye Itsi se nong rine̱n tà wuruk kanang. Amma nizen iya ne rine̱n tin barang, ne ritek Adakunom nibarang dide̱ng,

²¹ nong ase̱, kyo̱ndi rine̱n ta nye rigwo̱m wu be riku, anong ne ritek Adakunom ta nye rigwo̱m wu kyo̱o̱rna be kuse gye̱r nasho̱o̱n Adakunom. Anong ne ri ta tseng be yir kaye̱e̱r kutser kufe izen izen kamok aYeso Kiristi Agwo̱m Ágwo̱m yir.