aRom 16 - Izere New Testament

Ashou

¹ Angasnyining yir aFibi, aya a ta be kuse kutek, a nye itomong Adakunom kaye̱e̱r ikilisiya aKankiriya, saase a ta be̱ a ta ka di yin.

² Ku shan yin kaye̱e̱r riyerek Agwo̱m Ágwo̱m yir ni iren i ta se gye̱r ke a shan azhe̱l'e. Ku tobok yin ke a tse̱r ike̱ng ikak nufe yin kamok an tobok ánerawe whe̱re̱ be mi gip.

³ Ku nye shou yin aBiriskila ne Akila, áferime̱ itomong'i kaye̱e̱r aYeso Kiristi.

⁴ A no̱o̱k kutser ba kamok'i. Mi be áfikuus cice̱r áya sang á ta nye áner aYahuda baꞌ, yir be yir riye̱ rikan be ba.

⁵ Ku nye shou yin áfikuus aya a ta nyiis nasa ba. Nye shou yin agbang aferime̱ mi Apinatus aya a ta nye ime̱se̱ng kushan aKiristi niben Asiya.

⁶ Ku nye shou yin aMarya, aya a tin furku natoon yin dide̱ng.

⁷ Nye shou yin Adaronikus ne aZhuniyas, afuri mi á tá se nitso̱m mak be mi. Ba nye agbang'e kaye̱e̱r ámanzo, á tá te afikuus nasho̱o̱n'i.

⁸ Ku nye shou yin Ampiliyatus, aya a ta nye agbang aferime̱ mi nikuus Agwo̱m Ágwo̱m yir.

⁹ Ku nye shou yin aUbanas, aferime̱ itomong yir kaye̱e̱r aKiristi, ne agbang afertseng mi aSitakis.

¹⁰ Ku nye shou yin Apeles, aya i tá mu ku bo̱mo̱ng an di a be katsak kaye̱e̱r aKiristi. Ku nye shou yin áfekasa Aristobulus.

¹¹ Ku nye shou yin aHirudiya afuri mi. Ku nye shou yin áfekasa aNakisus áya a ta se kaye̱e̱r Agwo̱m Ágwo̱m yir.

¹² Ku nye shou yin aTirafena ne aTirafosa, ányining'ong á ta furku ni itomong Agwo̱m Ágwo̱m yir. Bun i ku nye shou yin agbang afertseng'i aPasis, abining'ong gip a furku ni itomong Agwo̱m Ágwo̱m yir.

¹³ Ku nye shou yin aRufus aya Agwo̱m Ágwo̱m ta kasa a ta sor afu, ne anyining wu aya a ta se kyo̱ndi ango̱ mi gip.

¹⁴ Ku nye shou yin Asinkiritus ne aFiligon be aHames ne aPaturobas be aHamas ne ároneng áya a ta se mak be ba.

¹⁵ Ku nye shou yin aFilologus ne aZhuliya be aNeriyus ne angasnyining wu, ne aOlimfas be ázhe̱l'e cice̱r áya a ta se mak be ba.

¹⁶ Naka nye yin ashou be ku naka kur kuzhe̱l'e. Áfikuus aKiristi cice̱r ta nye yin ashou.

¹⁷ Kusuk yin ároneng, sak yin riye̱ be áfe a ta shim á ta shik kugung rice yin ne á ka sak yin ta kpas yin nike̱ng iya á tá ma ka bo̱so̱p yin'e. Kam yin be ba.

¹⁸ Kamok sang áner kuri ayong nye Agwo̱m Ágwo̱m yir aKiristi itomong baꞌ. Á nye nafa ba'me tsek. Á ren kanu ne á fe̱ re̱m re̱m ne á ti wo̱ro̱k ánerawe aya sang a ta ren ike̱ng ikak natoon'e baꞌ.

¹⁹ Koangan n fok itak yin ta kuus yin rife̱ aKiristi, kamok anong mi be riye̱ rikan be yin. Amma mi shim yin tuse yin be ritse̱ng natoon kunye ike̱ng iya i ta se gye̱r, tu ren yin kunye imaan'e baꞌ.

²⁰ Adakunom afe a ta nyesek kameneng riye̱ tà me̱re̱sh Ishetan sang be kubeseng izen baꞌ. Won ritek Agwo̱m Ágwo̱m yir aYeso tu se mak be yin.

²¹ aTimoti aferime̱ itomong'i ta nye yin ashou. Anong ne aLushiyos ne aZhaso be aSosipata, ba gip á nye ároneng a ta nye yin ashou.

²² Mi, aTatiyus aner izibir kufumung na mi ta nye yin ashou kaye̱e̱r riyerek Agwo̱m Ágwo̱m yir.

²³ aGayus aya a tin sak kari wu, aya áfikuus cice̱r ta nyiis kari wu, ta nye yin ashou. Arastus a ta saas itso̱m agbang kuwo̱p ne aronyining yir aKpatus ta nye yin ashou.

²⁴ [Ritek Agwo̱m Ágwo̱m yir aYeso Kiristi se mak be yin cice̱r. Anong!]

²⁵ Won kuyiik tu sor kufe Adakunom, wu afe a tana kyem a tana ka sak yin ta nyeseng yin be agap kaye̱e̱r kuno̱o̱k katsak yin, natoon Rife̱ Ritek na mi ta taas natoon aYeso Kiristi, Rife̱ Ritek riya ri tin tonong yir ike̱re̱ iya sang a ta tsang a ren gbugbang baꞌ,

²⁶ amma kyo̱o̱rna a min tonong yir. Adakunom afe izen izen fe̱ be áner kuzarap wu ye a ra zibir natoon Rife̱ Ritek'e nong áfurin tin no̱o̱k katsak ne a ku kuus.

²⁷ Won Adakunom aya a ta ren koakye tu se̱ kuyiik kaye̱e̱r aYeso Kiristi ma izen izen. Anong!