aRom 12 - Izere New Testament

Asidaka atser

¹ Kamok anong, ároneng, mi ta nye yin akusuk kaye̱e̱r kuro̱ riye̱ Adakunom ye i ra no̱o̱k yin iro̱m yin kyo̱ndi asidaka atser, azhe̱l'e, kuri aya Adakunom a tana fok kusas'e. Iyong ne i nye iren kuya Adakunom iben kufe katsak.

² Sang tu ba kuus yin kuse kuri kufe kazatse na baꞌ, amma won yin Adakunom ta ka shishing yin kuto̱ro̱ng yin. Be anong ne yin ta shan yin ike̱ng iya Adakunom ta shim, ike̱ng iya i ta nye itek, iya wu tana fok kusas'e ne ike̱ng wu ta shim dim.

³ Kamok ritek Adakunom tin nye'me na, mi fe̱ be koangan yin ye sang akak tu sok rice naza ye wu nye ike̱ng ikak baꞌ, a ra ban a mees rice wu ingya, a ra mees rice wu te̱re̱ be kuri kuno̱o̱k katsak Adakunom tú ku no̱o̱k.

⁴ Kyo̱ndi kuro̱m ta be ikap ze̱r ze̱r, ne cice̱r ikap'e nye itomong kuri kuzining baꞌ,

⁵ anong ne i se kaye̱e̱r aKiristi, i se yir whe̱re̱ kaye̱e̱r kuro̱m kuzining be afudang yir áfikuus.

⁶ Yir be yir kunang iriri'me tite̱re̱ be ritek Adakunom tin no̱o̱k yir. Ke kunang akak nye kunang kuzarap, a rin nye kuzarap'e te̱re̱ be kuno̱o̱k katsak wu ta be.

⁷ Ke kunang'e nye kunye ánerawe itomong, a ra nye itomong'e gye̱r, ke kunye kubo̱so̱p ánerawe'me, a ra bo̱so̱p gye̱r.

⁸ Ke kunye kutsesek ánerawe, a ra sor afe kutsesek ánerawe'me. Ke kunye kunang kutobok áfe a ta se nutser, a ra no̱o̱k washak. Ke kunang'e nye kuko̱k kasho̱o̱n, won a tu nye kaye̱e̱r katsak. Ke ku nye kuro̱ riye̱, a ra nye be riye̱ rikan.

Kushim

⁹ Kushim ra se kaye̱e̱r katsak. Rayin ike̱ng iya i ta nye imaan'e, amma yiir yin ike̱ng iya i ta nye itek.

¹⁰ Naka shim yin kyo̱ndi aner be aronyining. Koangan ra sok afudang yiik ne a nar rice wu.

¹¹ Sang tu se yin dar ifeng baꞌ, be yin ifeng kaye̱e̱r aye̱ yin ne i nye yin Adakunom itomong.

¹² Nye yin riye̱ rikan natoon ike̱ng iya yin ta min te yin riye̱, naka tsesek yin kaye̱e̱r risam yin ne i yiir nye yin aduwa koakye izen.

¹³ Kasap yin ike̱ng yin ta be yin be áner Adakunom áya a ta se kaye̱e̱r kutser. Shim yin kushashang átsen.

¹⁴ Te yin áya a ta ka tabak yin kuce̱ kutek, ku te yin ba kuce̱ kutek sang tu ku fiming yin ba baꞌ.

¹⁵ Nye yin riye̱ rikan be áya a ta sen nye riye̱ rikan, nye yin riyo̱m be áya a ta se kaye̱e̱r riyo̱m.

¹⁶ Sor yin caang be afudang yin. Sang tu kok yin rice naza baꞌ, amma gung yin rice be áya a tu ku di ba kyo̱ndi ike̱ng ikak baꞌ. Sang tu sok yin rice yin ye yin ren yin koakye baꞌ.

¹⁷ Sang tu ku karang yin anyas be anyas baꞌ. Sak yin riye̱ nong ta nye yin ike̱re̱ i ta se gye̱r nasho̱o̱n koangan.

¹⁸ Nye yin ike̱ng iya yin tana kyem i nye, ke ta kyem yin, to̱, ne i sor yin caang be koangan.

¹⁹ Aro̱, tu sor yin aner a tu ku karang imaan'e baꞌ, won yin Adakunom'me. Kamok i se ni izibir ye, “Kukarang ike̱ng nye kunaan, mi tù ku karang,” Agwo̱m Ágwo̱m fe̱ anong.

²⁰ Rife̱ Adakunom bun ri fe̱ ye, “Ke amudo̱n wan fok izong, ku no̱o̱k naya, ke a fok kuto̱ kukoor ne i ku no̱o̱k ashi a ta so̱. Ke wan nye anong, i ta se kyo̱ndi wan tu ku korok atse̱n kuro̱ng rice.”

²¹ To̱, tu won yin anyas ta ya agap yin baꞌ, ya yin agap anyas be kunye kutek ingya.