aRom 11 - Izere New Testament

Ribir áner Isarela aya a tu ku tuk

¹ To̱, mi nye kurip: Iyong Adakunom gaar ánerawe wu a? Wayo, cie̱k! Mi be rice mi gip mi nye aner Isarela, aner kasa Ibrahim, kaye̱e̱r izo̱ro̱k aBanyami.

² Adakunom gaar ánerawe wu baꞌ, áya wu tá tsang a ren. Yin ren yin ike̱ng iya kufumung Adakunom tá fe̱ natoon Iliya nizen a ta tos kanak nasho̱o̱n Adakunom kamok kuse áner Isarela aꞌa?

³ A tá fe̱ ye, “Agwo̱m Ágwo̱m, an fe̱s áner kuzarap wan ne a yirik naro̱ ku ka nye asidaka, a tú ku won mi tsek. Ayong a bun a tse̱r a tin fe̱r.”

⁴ Akye̱ ne Adakunom fe̱ be wu e̱? A fe̱ be wu ye, “Mi won áner izungu kanataar áifya a tan gaar kuya aBaal iben kamok rice mi.”

⁵ Anong ne i se kyo̱o̱rna gip. Ribir áner ákak kuse áya Adakunom tá kasa kaye̱e̱r ritek wu.

⁶ Ke i se ye kaye̱e̱r ritek wu to̱, i nye ye sang kamok itomong ba baꞌ. Ke i se ye kamok itomong ba, to̱, i nye ye ritek wu'me nye katsak baꞌ.

⁷ To̱, yong ta fe̱ yir ane̱ makong e̱? Aner Isarela se̱ ike̱ng iya ba ta tse̱r be ifeng baꞌ, amma áya a tá kasa tsek ne a se̱, ribir'e Adakunom sak ba ta shonong.

⁸ Kyo̱ndi i ta se ni izibir ye, “Adakunom sak aye̱ ba te gbirim a tá no̱o̱k ba anyisi afe á tá kyem á ta di karo̱ baꞌ. A ta no̱o̱k ba ato afe sang á tá kyem a ti fok baꞌ, ma katuur ana.”

⁹ aDauda bun a fe̱ ye, “Won naro̱ kuya naya ba ne naro̱ riye̱ rikan tu sor agunung ba, ne karo̱ a tanin tu atak, ne a se̱ ishorong ba.

¹⁰ Won anyisi ba tu te whi fan á bu kyem a di karo̱, won risam ba tu sak ba nong á ta tseng guk guk ma izen izen.”

¹¹ Mi bun inye kurip gbak ye. Nizen iya áner Isarela tá turuk kutak, á ba bun á dorok aꞌa? Wayo, ko cie̱k! Kunye rine̱n ba ban kusak áner afe sang á ta nye áner aYahuda baꞌ, ta se̱ kashesh ingya ma áner Isarela tu shishim ba.

¹² To̱, ke rine̱n ba sak kazatse ta se̱ ritek, ku raar ba be̱e̱n áner aya sang á ta nye áner aYahuda baꞌ ritek, i nye ye ritek'e tà shining makiyi nizen iya áner aYahuda tana kubun nufe Adakunom.

¹³ To̱, yin áya sang i ta nye yin áner aYahuda baꞌ, mi fe̱ be yin. Kum mi ta nye amanzo nufe yin, mi tin ya kuka ni itomong'i.

¹⁴ Be anong ne mi ti te riye̱ ye kashim áner'i, áner Isarela ta ka shishim yin, nong ákak ba ta se̱ kashesh.

¹⁵ Ke ku ka raba ba ta be̱e̱n kazatse igaas, ku ka shan ba tà be̱e̱n akye̱, kyo̱ndi a ta wuruk kaye̱e̱r riku nong a ta be kaye̱e̱r kutser aꞌa?

¹⁶ Ke a no̱o̱k Adakunom ikpis abiredi, i nye ye agbang abiredi'me cice̱r te zhe̱l'ong gip. Ke ritin kakon'e se zhe̱l, to̱, i nye ye iwhang'e se zhe̱l gip.

¹⁷ Ke a bo̱ iwhang rifar riya ri ta ta, to̱, yin aya i ta se yin kyo̱ndi iwhang'e iya i ta ta baꞌ, a ta sok a tin gung mo, kyo̱o̱rna yin ma se̱s yin ashi'me aya a ta ta,

¹⁸ Kamok anong tu ya yin kuka ye yin nar yin iwhang'e iya a tá turung baꞌ. Ke yin nye yin anong, yiring yin ye, sang yin ne i yiir yin ritin kakon'e baꞌ, amma ritin kakon'e ne ri ta ka yir yin.

¹⁹ Kashim wan ta fe̱ ye, “Ei, a turung íwhang'e íkak nong a tin te mo naro̱'me.”

²⁰ Katsak'e yong. Amma a tu turung ba kamok kuwon dar kuno̱o̱k katsak ba, yin se yin azong kamok kuno̱o̱k katsak yin. Tin ya yin kuka baꞌ, amma nye yin tatan.

²¹ Ke Adakunom won iwhang'e iya i ta nye atuk kunik kakon'e baꞌ, to̱, a ta won dar a ka turung yin baꞌ.

²² Aze yir di yir Adakunom be kuro̱ riye̱ ne a se nye̱k nye̱k. A se nye̱k nye̱k be áya a ta kpas, amma a ro̱ riye̱ wan ke wan ya kasho̱o̱n kaye̱e̱r kuro̱ riye̱ wu. Ke anong baꞌ, wan gip a tà ka tun kaye̱e̱r ritin'e.

²³ Ke áner aYahuda san ku nino̱o̱k katsak, á tu ku bun ba naro̱ ba kamok Adakunom ta kyem a ku bun be ba.

²⁴ Yin aya sang i ta nye yin áner aYahuda baꞌ yin se yin kyo̱ndi iwhang kakon iya i ta ta baꞌ, a tin gung be ritin kakon kaya a tá tuus. Iya sang i ta nye atuk kunik kakon'e baꞌ. To̱, kum áner aYahuda ta se kyo̱ndi iwhang kakon iya a ta tuus iya i ta ro̱ baꞌ a tana bun a ku bun'e ritin kakon'e.

Áner Isarela cice̱r ta se̱ kashesh

²⁵ Mi shim yin tu sor yin dar iren yin ike̱re̱ i ta se nune̱re̱ng'ong baꞌ, ároneng, nong fan i bu kaa yin. Kushonong san'e be áner Isarela ákak ma izen iya Adakunom ta kasa cice̱r áya sang a ta nye áner aYahuda baꞌ ta be̱ niren Adakunom.

²⁶ Be anong ne a tà shesh Isarela cice̱r, kyo̱ndi a tá zibir ye, “Aner Kashesh ta wuruk na aSihiyona; a ta shishing aye̱ kuri aYakub nong á ta won rine̱n.

²⁷ Iyong ne i nye kushu mi be ba nizen mi tana sok rine̱n ba.”

²⁸ Áner Isarela te ámudo̱n Adakunom ku raba Rife̱ Ritek ba ta nye, i se anong kamok yin. Amma kamok a tú ku kasa ba, ba nye áner Adakunom ta shim kamok átukop ba,

²⁹ kamok kunang Adakunom ne kuyis wu shishing baꞌ.

³⁰ Kamok kyo̱ndi yin tá tsang i kuus yin rife̱ Adakunom baꞌ, amma kyo̱o̱rna yin se̱ yin kuro̱ riye̱ Adakunom kamok kushonong áner aYahuda.

³¹ Ba gip, ba shonong Adakunom'me kyo̱o̱rna, nong ba gip ta ma se̱ kuro̱ riye̱ Adakunom kamok Adakunom ta ro̱ riye̱ yin.

³² Kamok Adakunom rosom aye̱ ánerawe cice̱r kamok kushonong nong ase̱ a tin tonong kuro̱ riye̱ wu natoon koangan.

Aduwa

³³ Katsak'e, kutsik kuren kukyem Adakunom ne kuren ike̱ng wu be igak baꞌ. Angan ta kyem a ren iren wu ta nye ike̱re̱ wu ne iren wu tu ku gosok e̱?

³⁴ “Angan ren riye̱ Adakunom e̱? Angan ta kyem a ku no̱o̱k ibo̱ro̱ng e̱?”

³⁵ “Angan kun ku no̱o̱k ike̱ng ikak ma a tana fe̱ ye Adakunom ra ku karang e̱?”

³⁶ Kamok wu ne a nye koakye ike̱ng, ne koakye se nubo̱k wu, a nye koakye kamok rice wu. Kuyiik nye kufe Adakunom ma izen izen. Anong!