aRom 10 - Izere New Testament

¹ Ároneng, aduwa mi be kanak'i se ye ke áner Isarela se̱ kashesh.

² Kamok mi ren kuri ifeng iya ba ta be nikuus Adakunom, amma ifeng ba'me ra se natoon katsak baꞌ.

³ Kum ba ta dun iren i tana sak anerawe tana te gye̱r nasho̱o̱n Adakunom, a tse̱r iren ifuba iya ba ta di ye i ta kyem i ka sak ba a ta te gye̱r nasho̱o̱n Adakunom, iyong ne i sak ba ta gaar iren i tana sak ánerawe ta te gye̱r nasho̱o̱n Adakunom.

⁴ Kamok aKiristi ne a shining ike̱ng iya Itsi ta fe̱ ye a ra nye nong koangan a tin no̱o̱k katsak ni wu ta se gye̱r nasho̱o̱n Adakunom.

⁵ aMusa nye izibir natoon iren aner tana se̱ kute gye̱r nasho̱o̱n Adakunom kamok a kuus Itsi. A fe̱ ye, “Koangan afe a ta kuus Itsi na cei ta se̱ kutser kufe izen izen.”

⁶ Amma rife̱ Adakunom natoon kute gye̱r nasho̱o̱n wu kamok kuno̱o̱k katsak fe̱ ye, “Sang tu fe̱ kaye̱e̱r riye̱ wan ye, ‘Angan tà ngarak naza e̱?’ ” (nong ase̱ a ta tiik be aKiristi.)

⁷ “Ka tu fe̱ ye, ‘Angan ta no̱ kaye̱e̱r kaben tsik e̱?’ ” (Nong a ta dorok be aKiristi nure̱k.)

⁸ Amma aner aya a ta se̱ kute gye̱r nasho̱o̱n Adakunom kamok kuno̱o̱k katsak fe̱ kyo̱ndi aMusa tá fe̱ ye, “Rife̱ Adakunom se bubarak be wan, ri se nanu wan, ri bun ri se kaye̱e̱r riye̱ wan.” Rife̱ na se ye, rife̱ kuno̱o̱k katsak ne yir sen taas yir'e.

⁹ Ke wan fe̱ be kanu wan ye, “aYeso ne a nye Agwo̱m Ágwo̱m,” ne wan bun i ti no̱o̱k katsak kaye̱e̱r riye̱ wan ye Adakunom tú ku dorok nure̱k be kutser, wan tà se̱ kashesh.

¹⁰ Kamok kaye̱e̱r riye̱ wan ne wan ti no̱o̱k katsak nong ta se̱ kute gye̱r nasho̱o̱n Adakunom, ne wan fe̱ kuno̱o̱k katsak wan be kanu wan, ne wan se̱ kashesh.

¹¹ Kyo̱ndi izibir rife̱ Adakunom ta fe̱ ye, “Koangan ne a ti no̱o̱k katsak ni wu, a tà fok isum baꞌ.”

¹² Kamok áner aYahuda be áya sang a ta á nye áner aYahuda baꞌ se ze̱e̱r baꞌ. Agwo̱m Ágwo̱m'me se azining, a ti nye rigwo̱m natoon koangan, ne a no̱o̱k koangan afe a ta yis kaye̱e̱r riyerek wu kurum wu washak,

¹³ Kyo̱ndi i ta se kaye̱e̱r rife̱ Adakunom, “Koangan afe a ta yis kaye̱e̱r riyerek Agwo̱m Ágwo̱m ta se̱ kashesh.”

¹⁴ To̱, ane̱ ne ba ta yis aner aya afe sang ba tin no̱o̱k katsak baꞌ e̱? A ta nye ane̱ á tin no̱o̱k katsak na aner aya ba ta kum ku fok baꞌ e̱? Ne á nye ane̱ á ta fok ke akak tu ku nye ba awazi baꞌ e̱?

¹⁵ Á ta nye ane̱ á ta nye awazi sang ke a tú ku tom ba baꞌ e̱? Kyo̱ndi i ta se ni izibir kaye̱e̱r rife̱ Adakunom ye, “Wan fa di atak aner aya a ta taas Rife̱ Ritek ta saas baꞌ.”

¹⁶ Amma sang aner Isarela cice̱r ne a shan Rife̱ Ritek'e baꞌ. Kyo̱ndi Ishaya ta fe̱ ye, “Agwo̱m Ágwo̱m, angan ti no̱o̱k katsak rife̱ yir e̱?”

¹⁷ Kamok anong, a ti no̱o̱k katsak rife̱ ke a fok rife̱'me. A fok rife̱'me nizen iya a ta nye awazi Rife̱ Ritek natoon aKiristi.

¹⁸ Mi rip ana'ong, katsak'e ba fok aꞌa? A fok ko̱! Kyo̱ndi rife̱ Adakunom ta fe̱ ye, “Kuto̱ ba n tseng koake̱ kaye̱e̱r kazatse, rife̱ ba n tseng nigang kazatse.”

¹⁹ Mi ta bun rip gbak ye: Aner Isarela ren ike̱ng rife̱'me ta sor aꞌa? Ni ime̱se̱ng'e, aMusa fe̱ be ba ye, “Mi ta sak yin ta shishim yin ákak aya yin ta di yin ye a kyem ike̱ng ikak baꞌ. Mi ta ka beseng yin riye̱ be ákak aya yin ta di yin ye a se zizik.”

²⁰ Ishaya bun a nye riye̱ ritser a tá fe̱ ye, Adakunom fe̱ ye: “Áner aya á tin tse̱r baꞌ, ba ne a ti se̱. Mi tonong rice mi nufe áya sang á ta tse̱r karo̱ mi baꞌ.”

²¹ Amma natoon Isarela, Adakunom fe̱ ye, “Kuwoso cice̱r mi nabak ibo̱k'i natoon áner aya a tá gaar rife̱ mi, ne á shonong.”