aMatiyu 8 - Izere New Testament

aYeso sak akparo̱ng akak tá te atser

¹ Nizen aYeso tá tiik natoon kawhanang ame, ánerawe whe̱re̱ tú ku kuus.

² Ayong aner akak a tá be rikparo̱ng be̱ nufu nong a tá tigbok akuur nasho̱o̱n aYeso ame. Ne a fe̱ be wu ye, “Atekasa, ke wan shim wan ta kyem i ni sak ta te atser.”

³ Ayong aYeso nabak kubo̱k nong a tá ra aner ame, ne a fe̱ be wu ye, “Mi shim, te atser!” Nizen izining rikparo̱ng'e wor ri tú won.

⁴ Ayong aYeso fe̱ be wu ye, “Di, sang tú tak akak baꞌ. Amma tseng se tonong rice wan nufe atsi ne i nye asidaka kuri aya aMusa tá fe̱, nong á tà ren ye wan n te atser.”

Kuno̱o̱k katsak ako̱k kasho̱o̱n aSozha akak

⁵ Nizen aYeso tá no̱ kaye̱e̱r aKapanum, iyong ako̱k kasho̱o̱n aSozha aRom akak be̱ nufu nong a tú ku nye izong ye,

⁶ “Atekasa, asam mi se nameneng kari, atak wu we̱, a se risam dide̱ng.”

⁷ aYeso fe̱ be wu ye, “Mi tà tseng nong tu ku sak a tà te atser.”

⁸ Ayong ako̱k kasho̱o̱n ame fe̱ ye, “Mi kyem afe wan tana be nasa mi baꞌ, fe̱re̱ng tsek asam mi tà te atser.

⁹ Kamok mi se nubo̱k akak gip, ne ásozha akak se nubo̱k'i gip. Ke mi fe̱ be akak ye, ‘Tseng,’ ne á tseng ne mi fe̱ be akak ye, ‘Be̱,’ ne a be̱. Mi fe̱ be asam mi ye, ‘Nye iyu,’ ne a nye.”

¹⁰ aYeso tá fa fok anong ne a te zhing, iyong a fe̱ be áfe a tú ku kuus ye, “Katsak'e, ne mi ta ka tak yin, mi kun di aner akak kaye̱e̱r Isarela afe a ta be kuno̱o̱k katsak kyo̱ndi aner na baꞌ.

¹¹ Mi fe̱ be yin ye, ánerawe dide̱ng ta nes nabas kunom tu ku wuruk ne nabas kunom tu ku kpas nong a ta be̱ ya naya riye̱ rikan be Ibrahim ne Ishaku ne aYakub kaye̱e̱r rigwo̱m kaza.

¹² Amma á tà barak áya a ta tas ke ba ne a nye áfe Adakunom, amma á ra gaar kaye̱e̱r amaan awhi, naro̱ á tana tos ne á ya anyi.”

¹³ Ayong aYeso fe̱ be ako̱k kasho̱o̱n aSozha aRom ame ye, “Tseng kari! A tà ka nye'me kyo̱ndi wan ti no̱o̱k katsak.” Asam wu ame wor a te atser nizen iyong.

aYeso sak aman aBitrus tá te atser

¹⁴ Nizen aYeso tá no̱ nasa aBitrus, a di aman aBitrus nameneng be kuro̱m kuzhosh.

¹⁵ Ayong aYeso ra kubo̱k'e ne kuro̱m kuzhosh'e ku won, yong a dorok a ta nyes aYeso.

aYeso sak ánerawe dide̱ng tá te atser

¹⁶ Kawheshirim tá fa nye, a be̱s be ánerawe whe̱re̱ áya amaan nabik tá min no̱ niba nufe aYeso, ne aYeso turung nabik'e ne a sak áfe iro̱k cice̱r á ta te atser.

¹⁷ A nye anong, nong a ta shining ike̱ng iya Ishaya aner kuzarap tá zibir ye, “A sok iro̱k yir cice̱r ne a ni sak yir ta sor yir dar kuro̱k.”

Áner aya a ta fe̱ ye wu ta kuus aYeso

¹⁸ Nizen aYeso tá di ánerawe whe̱re̱ tú ku gorok, a fe̱ be alimazhiri wu ye á ra tar nunyi agbang kudung'e.

¹⁹ Ayong aner kubo̱so̱p itsi akak be̱ nufu a ta fe̱ ye, “Aner Kubo̱so̱p, mi ta ka kuus koakye ne wan ta tseng.”

²⁰ aYeso fe̱ be wu ye, “Áromong be ibong á tin no̱o̱s ne nanon be are̱, amma Igon Anerawe be karo̱ a tanin sak rice wu baꞌ.”

²¹ Azining kaye̱e̱r alimazhiri wu fe̱ be wu ye, “Atekasa, won mi ta tseng ta se ne̱r ada mi nizham.”

²² Amma aYeso fe̱ be wu ye, “Ni kuus, won ikom ta ne̱se̱k ikom.”

aYeso tigba kuwun

²³ aYeso tá fa no̱ kaye̱e̱r kukpara ashi kukak iyong alimazhiri wu tú kuus.

²⁴ Kuwun kumaan'e wor ku dorok natoon agbang kudung ma ashi tang agung ma a no̱o̱s kaye̱e̱r kukpara'me, amma aYeso se be ida.

²⁵ Iyong álimazhiri wu tseng á tu ku shiming. Ne á fe̱ be wu ye, “Atekasa, yir sen wei yir kaye̱e̱r ashi, ni shesh yir.”

²⁶ Ayong aYeso fe̱ be ba ye, “Yin áfe kuno̱o̱k katsak yin ta gop baꞌ, akye̱ sak yin be yin inyim anong e̱?” Ayong a dorok a ta tigba kuwun be agung ashi'me ne karo̱ wor ka te win.

²⁷ Ánerawe te zhing ne á fe̱ ye, “Akye̱ kuri aner na, kuwun be ashi tu ku fok e̱?”

aYeso sak áner á be ítseng tá te atser

²⁸ Nizen iya aYeso tá tar agbang kudung ame a ta no̱ nunyi iben aGarasi, aner afa afe a ta be amaan nabik wuruk naro̱ are̱k nong á ta nyim be wu. Án te ike̱ng inyim, akak kyem a gor iren iyong baꞌ.

²⁹ Á ta kukun nizen izining ye, “Igon Adakunom, wan tse̱r akye̱ be yir e̱? Wan m be̱ tin no̱o̱k yir risam nizham izen'e ta ra nye a?”

³⁰ Kukpara álade sen ya naya azong bubarak be ba.

³¹ Amaan nabik ame nye aYeso kusuk ye, “Ke wan tin tun yir, ne i ni sak yir kaye̱e̱r kukpara álade kya.”

³² Ayong aYeso fe̱ be ba ye, “Tseng yin!” Ayong amaan nabik ame wuruk nong á ta be kaye̱e̱r alade ame. Kukpara alade'me cice̱r teng nong á ta se kpas kaye̱e̱r kudung nong á kus.

³³ Áya á ta sen ni sak riye̱ na alade ame teng, á tá be kaye̱e̱r kuwo̱p nong á ta se taas ike̱ng iya a tá nye, cice̱r be ike̱ng i ta nye be aner a tá be amaan nabik ame.

³⁴ Iyong áner kuwo̱p'e cice̱r wuruk nong á ta nyim be aYeso. Nizen á tu ku di a nye aYeso akusuk ye a ra won iben ba.