aMatiyu 27 - Izere New Testament

aYahuza rosom rice wu

¹ Kadiding tá fa karak, yong ágbang átsi ne ásho̱n cice̱r nyim. Á ta nye ibo̱ro̱ng nong á ta fe̱r aYeso.

² Iyong á tú rosom, á tá tseng'e nufe aBilatus, a tá nye agwo̱mna.

³ Nizen aYahuza aya a tá re̱p aYeso tá fok ye an te̱n aYeso amok riku, yong a nye riye̱ riwe. A tú bun nufe ágbang atsi ne áko̱k kasho̱o̱n ame nong a ta su ku no̱o̱k ba itso̱m azurfa iso̱k itaar á tá tsang a ku no̱o̱k.

⁴ Ne a fe̱ ye, “Mi nye rine̱n. Mi tá no̱o̱k aner aya sang a tá nye rine̱n baꞌ.” Atsi'me ne ásho̱n'e fe̱ be wu ye, “Akye̱ ti daam yir azong a? Iyong nye kudaam wan.”

⁵ Ayong aYahuza nyosong itso̱m'e kaye̱e̱r agbang kutu kuya Adakunom iben a tá wuruk. A tá se te kudun nuto̱.

⁶ Agbang atsi'me sok itso̱m'e ne á fe̱ ye, “I se gye̱r a ta sak itso̱m na kaye̱e̱r ingme̱ yir ife kutu kuya Adakunom iben baꞌ, kamok itso̱m na nye itso̱m naso̱k.”

⁷ Iyong á nye ibo̱ro̱ng nong á tá sok itso̱m'e á tin shan karo̱ á tin no̱k nadonong nong a tin ne̱se̱k áner aya a ta nye atsen.

⁸ Kamok anong ne a yis karo̱'me kyo̱o̱rna ye, “Iwe̱ng naso̱k.”

⁹ Be anong ne a shining ike̱ng Irimiya aner kuzarap tá fe̱ shining a tá fe̱ ye, “A sok itso̱m azurfa iso̱k itaar. Itso̱m áner Isarela tin karang ni wu.

¹⁰ Á sok á tin shan karo̱ á tin no̱k nadonong, kyo̱ndi Agwo̱m Ágwo̱m tá fe̱ be mi.”

aYeso nasho̱o̱n aBilatus

¹¹ Nizen iya aYeso tá se nunyeseng nasho̱o̱n agwo̱mna'me yong a tú ku rip ye, “Wan ne i nye agwo̱m aner aYahuda a?” Ne aYeso fe̱ be wu ye, “Wan ne wan fe̱ anong.”

¹² Nizen ágbang atsi ne áko̱k kasho̱o̱n tá fe̱ ike̱re̱ ame be wu ko aYeso ti sak kanu baꞌ.

¹³ Ayong aBilatus fe̱ be wu ye, “Wan fok ike̱re̱ á tin fe̱ natoon wan aꞌa?”

¹⁴ Amma aYeso tú sak ko'me baꞌ, ma agwo̱mna'me te zhing.

A te̱n aYeso amok riku

¹⁵ To̱, izen aPasova tá fa nye, i nye izen iya agwo̱mna tan me̱ ne a turung aner akak a tá se ni itso̱m aya ánerawe ta shim.

¹⁶ Nizen iyong, ba be aner akak a tú ku ren dide̱ng a ta se ni itso̱m, a tú ku yis ye, aBarabas.

¹⁷ Áner aYahuda'me tá fa nyim ne aBilatus ku rip ba ye, “Angan ne yin shim yin mi ta ka tun yin'e e̱? aBarabas ka aYeso aya a tú ku yis ye aKiristi e̱?”

¹⁸ Kamok wu ren tseng tseng ye kamok rishishim ne á be̱ be aYeso nufu.

¹⁹ Nizen aBilatus tá se nusonong natoon itsik amok, yong abining wu tom kutom nufu ye, “Kam be itak aner na sang a tá nye rine̱n baꞌ, kamok mi so̱ risam nashirim ni nabos natoon wu.”

²⁰ To̱, ágbang atsi ame ne ásho̱n'e whap ánerawe'me ye á ra fe̱ ye, a ra won aBarabas nong a ta fe̱r aYeso.

²¹ Agwo̱mna'me bun a fe̱ be ba ye, “Angan kaye̱e̱r áner afa na ne yin shim yin mi ta ka won yin'e e̱?” Iyong áner'e fe̱ ye, “aBarabas.”

²² Ne aBilatus fe̱ be ba ye, “To̱, mi ta nye ane̱ be aYeso a tú ku yis ye, aKiristi e̱?” Cice̱r ba fe̱ ye, “A ku tigak.”

²³ Ne aBilatus fe̱ ye, “Kamok akye̱ e̱? A nye rine̱n akye̱ e̱?” Ánerawe bun a te barang kutasak ingya ye, “A ku tigak.”

²⁴ aBilatus tá di sang ba shishing kuto̱ro̱ng ba baꞌ, ne á bun á shim á ta dorok be riwo̱ng, yong a bo̱ ashi a tin kusu ibo̱k wu nasho̱o̱n ba ne a fe̱ ye, “Ibo̱k'i kuso̱k, naso̱k aner na se rice mi baꞌ. Yin tà fok yin'e.”

²⁵ Iyong ánerawe'me cice̱r fe̱ ye, “Ei, won naso̱k wu tuse natoon ace yir, yir be inoon yir.”

²⁶ Ayong a tu won ba aBarabas, ne a whereng aYeso ne a ku no̱o̱k ba nong á ta su ku tigak.

áSozha nye be aYeso kye̱re̱

²⁷ Nama anong ásozha aBilatus'e sok aYeso nong á ta tseng'e kaye̱e̱r kugbang aBilatus'e nong a tin tusung rigwo̱m ásozha natoon wu.

²⁸ Ne á ku turung ares, a tú ku te ko kukak kuseng kuri kufe agwo̱m.

²⁹ Á kunung ikiritsan nong á tú ku te'me rice kyo̱ndi ribong rigwo̱m. Á tú ku no̱o̱k ishe̱n a tá yiir nubo̱k ne á ma nye gung nasho̱o̱n wu ne á nye be wu kye̱re̱ ne a fe̱ ye, “Dazha, agwo̱m áner aYahuda.”

³⁰ Ne á ku tang ace̱ ne á ni shan ishe̱n ame nufu. Á yiir ku tsosok mo rice.

³¹ Nama á tá nye be wu kye̱re̱ ne á tun kukpiin kuseng ame ne á bun ku te ares wu. A ma tseng be wu, á ta su ku tigak.

A tigak aYeso

³² Á ta se be itseng be aYeso ame, ne á yin be aner aSirin akak a tú ku yis ye, aSiman, a tú ku te agap a tá cer kukon kutigak aYeso'me.

³³ Á tseng naro̱ kakak a tá yis ye, aGolgota (i ta sor karo̱ áho̱karo̱k ace).

³⁴ Á no̱o̱k aYeso'me ashi anap a tin kare̱ be ike̱ng ikak i ta rereng, amma aYeso tá fa fok, a gaar kuso̱'me.

³⁵ Nama a tá tigak aYeso'me, á ti nye kukasa be kubarak ikiriwhe̱r natoon ares'e ne á kasap.

³⁶ Ne á sosok kaben nong á tu ku tor.

³⁷ Nabas rice wu, a ti nye izibir kuri rine̱n a tá ye, “AYU NE A NYE AYESO, AGWO̱M ÁNER aYAHUDA.”

³⁸ A tigak ágbang akpatang akak afa mak be wu, azining nabas kubo̱k riya ne azining nabas kubo̱k rimen.

³⁹ Áfe a tá gosok niren yiir fe̱ kye̱re̱ be wu, ne á zim rice,

⁴⁰ ne á fe̱ ye, “Wan afe i tana yirik agbang kutu kuya Adakunom iben ne i bun i no̱k kaye̱e̱r inom itaar, shesh rice wan'e. Ke wan nye Igon Adakunom, to̱, ne i tiik kaben.”

⁴¹ Anong ne ágbang atsi be áfe kubo̱so̱p itsi ne ásho̱n fe̱ be wu kye̱re̱.

⁴² “A shesh ákak, amma ko a kyem a shesh rice wu baꞌ. Ke wu ne a nye agwo̱m áner Isarela, a ra tiik kaben nong yir tin no̱o̱k yir katsak ni wu.

⁴³ A ti fe̱re̱ng na Adakunom. Won Adakunom'me tu ku shesh. Wu fe̱ ye wu nye Igon Adakunom.”

⁴⁴ Anong ne ágbang akpatang aya a tú ku tigak ba mak be wu fe̱ kye̱re̱ gip.

Riku aYeso

⁴⁵ Kum natite kunom, kaben cice̱r te whi ma nabas itso̱m itaar.

⁴⁶ Nabas itso̱m itaar aYeso tá kuto̱ naza ye, “Eloi, Eloi, lama sabatani?” I ta sor ye, “Adakunom mi, Adakunom mi, akye̱ sak wan tin won kpe̱de̱ng ana e̱?”

⁴⁷ Áner ákak kaye̱e̱r aya a tá se nunyeseng azong tá fa fok ike̱ng iya a tá fe̱ yong á fe̱ ye, “Aner na yis Iliya.”

⁴⁸ Ayong akak kaye̱e̱r ba tseng gbashak, nong a ta se sok asoso, a tin bo̱ akpukpak ashi a ta rosom nanu kuse̱ a ta nabak aYeso'me nong a ta so̱.

⁴⁹ Ne ákak ba fe̱ ye, “Ku won yin tá di yir ka Iliya tà be̱ a tú ku shesh'e.”

⁵⁰ Ayong aYeso bun a tá kuto̱ naza ife afa gbak, ne a ko̱ro̱k isong wu ife igang'e.

⁵¹ Nizen iyong alaple aya a ta se kaye̱e̱r agbang kutu kuya Adakunom iben wor a sarak natite kpak ma kaben. Kaben zuur ne ata tasak.

⁵² Are̱k karak ne áya a tá tsang á kus á tá nye azhe̱l'e bun á dorok be kutser,

⁵³ á wuruk kaye̱e̱r are̱k ba. Nama aYeso tá dorok nure̱k, á tseng kaye̱e̱r kuwo̱p kuzhe̱l'e, ánerawe whe̱re̱ tú di ba anyisi be anyisi.

⁵⁴ Nizen ako̱k kasho̱o̱n ásozha ne ribir aya a ta se mak be wu ni itor aYeso tá fok kaben ta zuur ne ike̱re̱ cice̱r i tá nye, á fok inyim dide̱ng yong á fe̱ ye, “Katsak'e aner na nye Igon Adakunom.”

⁵⁵ Ányining akak whe̱r a tá tsang a kuus aYeso'me kum na aGalili se azong, á tin sak riye̱ ni wu. Á nyeseng gugo̱k nong á tu ku ye̱re̱k.

⁵⁶ Kaye̱e̱r ba ákak nye aMarya aMagadaliya, be aMarya anyining aYakub be aYusufu, ne anyining inoon aZabedi.

Kune̱r aYeso

⁵⁷ Kawheshirim tá fa nye, yong arum akak, a tú ku yis ye aYusufu, aner Arimatiya, a tá nye alimazhiri aYeso gip.

⁵⁸ A tseng nufe aBilatus, a tá su ku rip kukom aYeso'me, yong aBilatus'e shim a tú ku no̱o̱k.

⁵⁹ Ayong aYusufu sok kukom aYeso'me, a tá kunung be kures kukan kufas.

⁶⁰ Ne a se ne̱r nure̱k wu kufas kuya wu tá nye nafar kuta. Ne a tosom agbang kuta a ti whe̱e̱n kanu kure̱k'e a ta tseng.

⁶¹ aMarya aMagadaliya ne aMarya afe afa'me se nusonong azong, ne á ye̱re̱k kure̱k'e.

Áfe kutor kure̱k'e

⁶² Kaya katson'e nama kunom kunye kanye̱k kunom Asabar, ágbang atsi ne áner aFarisi tseng nufe aBilatus.

⁶³ Á tá fe̱ be wu ye, “Kunom ra be rigwo̱m, yir ru yiring yir be ike̱ng aner abo̱o̱s ame tá fe̱ kum ne a rusek be kutser ye nama inom itaar a ta bun a dorok be kutser.

⁶⁴ Kamok anong, sak a ta se tor kure̱k'e ma kuko̱s kutaar fan álimazhiri wu bu se tun kukom'e nitsang nong á ta fe̱ ye a dorok nure̱k. Abo̱o̱s afe igang'e na ta risik ne a nar afe ime̱se̱ng'e.”

⁶⁵ aBilatus fe̱ be ba ye, “Bo̱ yin ásozha ta tseng yin ta se nye yin ike̱ng ife yin tana kyem i nye yin.”

⁶⁶ Iyong á tseng á ta se tor kure̱k'e, ne á ni te izizo̱ nong a ta ren ka akak ra kuta'me, ne á ni sak ásozha nong á ta tor karo̱'me.