aMatiyu 24 - Izere New Testament

Ike̱re̱ iya á tana di nizen igang'e

¹ aYeso tá fa wuruk kaye̱e̱r agbang kutu kuya Adakunom iben'e, a tá sen tseng, ne álimazhiri wu be̱ nufu nong á tu ku tosong kuri rino̱k agbang kutu kuya Adakunom iben'e.

² Ayong a tú ku rip ba ye, “Yin di yin ike̱re̱ na cei a? Katsak'e ne mi ta ka tak yin, ata yin ta ye̱re̱k yin na, ka a tà won kukak natoon kufudang baꞌ. A tà yirik cei.”

Risam a tana san kuso̱'me

³ Nizen iya aYeso ta se nusonong natoon Kawhanang Nafar, yong álimazhiri wu be̱ nufu awan ba nong á ta fe̱ be wu ye, “Ni tak yir, na akye̱ izen ne ike̱re̱ na tà nye e̱? Akye̱ ne i nye ike̱ng i tana tonong ye izen kube̱ wan n be̱ bubarak ne izen kazatse tana gang e̱?”

⁴ aYeso fe̱ be ba ye, “Nye yin tatan fan a ba ka wo̱ro̱k yin.

⁵ Kamok ánerawe whe̱re̱ tà be̱s kaye̱e̱r riyerek'i, ne á fe̱ ye, ‘Mi ne i nye aKiristi,’ ma á tà wo̱ro̱k ánerawe whe̱re̱.

⁶ Yin tà fok yin itak itsom ne i foos yin nawor itsom. Sang yin tu te yin febek baꞌ, kamok ma a nye anong, amma igang'e rusek nizham.

⁷ Kaben kakak tà ko̱n be kakak ne rigwo̱m ko̱n be rigwo̱m. A tà nye amaan izong ne kaben zu ni naro̱ ze̱r ze̱r.

⁸ Amma iyu ne i ta nye ime̱se̱ng risam'me tsek.

⁹ “Ne a ka yising yin nong a ta ka tabak yin ne a ka fe̱s yin. Kazatse cice̱r tà ka ranyin kamok riyerek'i.

¹⁰ Nizen iyong, ánerawe whe̱re̱ tà won kuno̱o̱k katsak ba ne á naka wosong nibo̱k ámudo̱n ba ne á naka shishim.

¹¹ Áner kuzarap áfe abo̱o̱s whe̱re̱ tà wuruk ne á wo̱ro̱k ánerawe whe̱re̱.

¹² Kamok amaan kunye tin barang, kushim ánerawe whe̱re̱ tà shirim.

¹³ Amma aner aya ne a nyeseng be agap ma nigang'e, a tà se̱ kashesh.

¹⁴ Á ta taas Rife̱ Ritek na natoon rigwo̱m kaza kaye̱e̱r kazatse na cei nong i ta sor asheda natoon koangan, ne igang'e ma be̱.

Amaan risam

¹⁵ “Kamok anong, ke yin di yin amaan ike̱ng nunyeseng naro̱ ka ta se zhe̱l kyo̱ndi aDaniel aner kuzarap tá fe̱. (Won yin áfe kufa'me tu ren yin anong.)

¹⁶ To̱, won áya a ta se niben aYahuda tu teng nong a ta ngarak na nawhanang.

¹⁷ Aner aya a ta se natoon kutu kasa wu, a tu tiik a ta se sok ike̱ng ikak kaye̱e̱r kasa'me baꞌ.

¹⁸ Aner aya a ta se riko̱, a tu kubun kari nong a ta se sok kures wu baꞌ.

¹⁹ I ta sor ike̱ng kuro̱ riye̱ be ányining á ta se be nafa ne áya a ta sen ngasa inoon nizen iyong.

²⁰ Nye yin aduwa nong fan izen itsi'me tuse nizen kuwun ka kunom Asabar baꞌ.

²¹ Kamok risam izen iyong ta nar koakye kuri risam afe yin ta kun di yin kum nizen a tá nye kazatse ma nizen iyu. A ta ba bun a so̱ kuri risam'me baꞌ.

²² Ye kamok inom'e ta se cie̱k baꞌ, ke aner akak kyem a gaar be kutser baꞌ, amma kamok áya afe a tan kasa, a sak inom'e te cie̱k.

²³ Nizen iyong, ko akak fe̱ be yin ye, ‘Di yin aKiristi'me na, ka akya'me,’ sang yin tu shim yin baꞌ.

²⁴ Kamok aKiristi áfe abo̱o̱s be áner kuzarap abo̱o̱s tà wuruk ne á nye itomong azhing be ike̱re̱ azhing nong á ta wo̱ro̱k ánerawe ma be áya a tan kasa, ke i ta kyem i se anong.

²⁵ To̱, mi ma ka tak yin nakuruk.

²⁶ “Kamok anong ke akak fe̱ be yin ye, ‘Akya a saase katse,’ ka ‘Ayu aze kaye̱e̱r kutu,’ sang yin tu shim yin baꞌ.

²⁷ Kyo̱ndi akanang ta samang nabas kunom tu ku wuruk ma nabas rikpa kunom, anong ne kube̱ Igon Anerawe ta se.

²⁸ Karo̱ afe amushi tu ku kpa azong ne wan tà di ázhanga nyim.

Kube̱ Igon Anerawe

²⁹ “Kum nama risam izen iyong, “ ‘Kunom tà te whi ne kufe̱n ba se kanang baꞌ, ádar tà kpas, ne agbang ike̱re̱ kaza zuur cice̱r.’

³⁰ “Nizen iyong ne yin tà di yin kube̱ Igon Anerawe naza, ánerawe kazatse cice̱r tà korok ibo̱k nuto̱. Á ta di Igon Anerawe ta saase kaye̱e̱r ane̱n be kukyem ne kuyiik dide̱ng.

³¹ A ta tom ámaleka wu nong á ta fe̱e̱p rigba ri ta wo̱ng dide̱ng ne á tusung aya a tá kasa nikes kazatse inaas, nikes kuyu ma nigang kazatse.

Rife̱ natoon ritin atafo

³² “Ye̱re̱k yin atafo ta di yin, izen iya ne ato'me suruk, ke i san kufunung yin tà ren yin ye kushik m be̱ bubarak.

³³ Anong ne i se gip ke yin di yin ike̱re̱ iyong cice̱r yin ta ren yin an be̱ bubarak, a se nanukutu.

³⁴ Katsak'e ne mi ta ka tak yin, ánerawe izam na ta kus baꞌ, ma a nye ike̱re̱ na cei nizham.

³⁵ Kaza be kaben ta gor, amma ko rife̱ mi sen gor ze̱r baꞌ.

Akak ren kunom aYeso tana bun a be̱ baꞌ

³⁶ “Ko akak ren ike̱ng ikak natoon kunom'e ka izen'e baꞌ, ko ámaleka kaye̱e̱r kaza, ka Igon'e ren baꞌ, Ada'me wu ze̱r tsek ne a ren.

³⁷ Kyo̱ndi i ta se nizen aNuhu anong ne kube̱ Igon Anerawe ta se.

³⁸ Nizen Adakunom tá kis kazatse be ashi, ánerawe sen ya ne á so̱ ne á nye iwe̱ne̱ng ne á nyesek ángas ba niwe̱ne̱ng, ma katuk aNuhu tá no̱ kaye̱e̱r kukpara ashi,

³⁹ nizham ba ta ra ren ike̱ng i ta sen tseng ashi'me be̱ a tá ka kis baꞌ. Anong ne i ta se nizen kube̱ Igon Anerawe.

⁴⁰ Nizen iyong áner áfa ta se riko̱, á ta sok azining ne a won azining.

⁴¹ Ányining áfa ta se be ako̱ nuta ako̱ kuzining, á ta sok azining ne á won azining.

⁴² “Kamok anong, sor yin be kanye̱k kamok yin ren katuk Agwo̱m Ágwo̱m'me tana be̱ baꞌ.

⁴³ Amma ren yin ye, ke a fa fe̱ ye, atekasa ren katuk kaya akpatang tana be̱ nasa wu, ke a tor kasa'me fan akpatang bu fo nong a ta no̱ kaye̱e̱r'e.

⁴⁴ Kamok anong, yin gip nye yin kanye̱k, kamok yin ren yin izen Igon Anerawe tana be̱ baꞌ.

Asam afe a ta nye katsak

⁴⁵ “Angan ne a nye asam a ta be katsak ne a be kukyem, aya atekasa wu tu ku sak ye, a rin sak riye̱ na ásam wu ne a ku nyesek ba naya nizen i ta se gye̱r e̱?

⁴⁶ Aner riye̱ rikan ne a nye asam aya atekasa wu tana be̱ a tù ku se̱ a sen nye itomong wu gye̱r.

⁴⁷ Katsak'e ne mi ta ka tak yin, atekasa'me tu ku sak, nong a tin sak riye̱ ni ike̱re̱ wu cice̱r.

⁴⁸ Amma ke asam'me nye amaan'e, a tà to̱ riye̱ wu ye, ‘Atekasa mi tà sor izen dide̱ng nizham a ta ra be̱.’

⁴⁹ Ne asam'me tsosok ásam afudang ne a ya ne a so̱ mak be áya a ta shim á ta so̱ dide̱ng.

⁵⁰ Atekasa'me tà be̱ nizen afe asam'me ta ren ye a ta be̱ baꞌ, ka nunom afe wu tà ren baꞌ.

⁵¹ Atekasa'me tu ku yiir ne a ku tsor ma kuro̱m ta tasak, a tu ku gung mak be ákardak áner, kaye̱e̱r karo̱ a tana tos ne á ya anyi.