aMatiyu 21 - Izere New Testament

¹ Nizen iya aYeso be álimazhiri wu tá tseng kaye̱e̱r kuwo̱p aBatafazhi naro̱ a tá yis ye, kawhanang Nafar bubarak be aUshalima. aYeso tom álimazhiri wu afa ye,

² “Tseng yin nabuwo̱p kya kasho̱o̱n yin, yin tà di yin azhaki nurosom be igon wu azong. Bisik yin nong ta be̱ tin no̱o̱k yin.

³ Ke akak fe̱ ike̱ng ikak be yin, ne yin fe̱ yin be wu ye, ‘Atekasa ne a tse̱r.’ A tà ka no̱o̱k yin zizirik.”

⁴ Iyu se anong, nong a ta shining ike̱ng aner kuzarap tá fe̱ ye,

⁵ “Tak yin ángas aUshalima ye, ‘Di, yin agwo̱m yin saase nufe yin. A se whiwhe̱, an ngarak natoon igon azhaki.’ ”

⁶ Iyong álimazhiri'me tseng á tá se nye kyo̱ndi aYeso tá tsang a fe̱ be ba.

⁷ A be̱e̱n azhaki'me be igon'e ne á ni saas ares ba natoon'e nong aYeso tin sonong.

⁸ Ánerawe whe̱re̱ tarak ares ba niren ne ákak bo̱s áfumung á ta saas niren'e.

⁹ Rigwo̱m ánerawe á ta se nasho̱o̱n aYeso'me áfe a tu ku kuus nama tang kuto̱ naza ye, “Nakerek nye nafe Igon aDauda! Aner riye̱ rikan ne a nye afe a ta be̱ kaye̱e̱r riyerek Agwo̱m Ágwo̱m! Nakerek nye nafe aya a ta se naza!”

¹⁰ Nizen aYeso tá no̱ kaye̱e̱r aUshalima'me ánerawe wor á te titak ne á risim ye, “Angan na e̱?”

¹¹ Iyong áfe a ta sen kuus aYeso'me fe̱ ye, “Ayu ne a nye aYeso aner kuzarap Adakunom a ta ne na aNazaret niben aGalili.”

aYeso sak Agbang Kutu Kuya Adakunom Iben tá te zhe̱l

¹² Ayong aYeso no̱ kaye̱e̱r kubang agbang kutu kuya Adakunom iben nong a tá ro áfe á tá sen re̱e̱s ike̱re̱ ne áfe kushashang cice̱r. A gaas ike̱re̱ áfe kushishing itso̱m ne ítsik afe kure̱e̱s ábo̱p.

¹³ Ne a fe̱ be ba ye, “I se ni izibir ye, ‘A tà yis kasa mi ye, kasa aduwa,’ amma yin n sok yin i ta min nye yin kutas ágbang ákpatang.”

¹⁴ Ákpato̱o̱n be ákun be̱s nufu kaye̱e̱r kubang agbang kutu kuya Adakunom iben'e ne wu ku sak ba á ta te atser.

¹⁵ Amma nizen ágbang atsi ne áner kubo̱so̱p Itsi ta di itomong azhing wu tá nye, ma inoon tang ito̱ naza kaye̱e̱r kubang agbang kutu kuya Adakunom iben ame ye, “Nakerek nye nafe Igon aDauda,” Ayong aye̱ ba beseng.

¹⁶ Ne á rip aYeso ye, “Wan fok ike̱ng inoon na ta sen fe̱'me aꞌa?” aYeso fe̱ be ba ye, “Ei, aser, yin kun fa yin kaye̱e̱r rife̱ Adakunom ye; “ ‘Wan ne i sak acam be inoon nakashak'e tá ka kerek aꞌa’?”

¹⁷ Ne aYeso ku won ba nong a tá be nuwo̱p aBetani a ta se ko̱so̱ azong.

aYeso fiming ritin atafo rikak

¹⁸ Naya katson'e, bop nadiding nizen iya aYeso ta se ni iren a sen kubun nuwo̱p'e, a fok izong.

¹⁹ Ayong a di ritin atafo nukim iren, ne a tseng ritin'e ko a ra se̱ agbang'e baꞌ, ma awan áfumung tsek. Ayong a fe̱ be ritin atafo'me ye, “Sang wan ta ba tes agbang nigaan'e baꞌ.” Nizen izining ritin atafo'me wor ri koor.

²⁰ Nizen iya álimazhiri wu tá di anong á te zhing yong á rip ye, “Akye̱ sak ritin atafo na wor ri koor nizen izining e̱?”

²¹ aYeso fe̱ be ba ye, “Katsak'e ne mi ta ka tak yin, yin gip ke yin no̱o̱k yin katsak sang ke riye̱ yin se gak baꞌ, yin ta kyem i nye yin ike̱ng iya i ta nar iya mi tá nye be ritin atafo na, yin ta kyem fe̱ yin be rifan na ye, ‘Dorok ta se kpa kaye̱e̱r agbang kudung,’ ku tà nye anong.

²² Ke yin no̱o̱k yin katsak, koakye ne yin ta rip yin kaye̱e̱r aduwa a tà ka no̱o̱k yin.”

Kuri kukyem aYeso tá be

²³ aYeso tá no̱ kaye̱e̱r kubang agbang kutu kuya Adakunom iben ame, nizen iya a ta sen ibo̱so̱p ánerawe'me ágbang atsi ne ásho̱n aner aYahuda be̱ nufu á tu ku rip ye, “Be akye̱ kuri kukyem ne wan ti nye ike̱re̱ na e̱? Angan ta no̱o̱k iren kunye ike̱re̱ na e̱?”

²⁴ Ayong aYeso fe̱ be ba ye, “Mi ta ka nye yin kurip kuzining tsek. Ke yin ti shim yin ne mi ta ma ka tak yin kuri kukyem mi tin nye itomong na.

²⁵ aYohana se̱ iren kunye abatisma wu ake̱ e̱? A se̱ naza ka nufe anerawe e̱?” Iyong á san ibo̱ro̱ng awan ba ne á fe̱ ye, “Ke yir fe̱ yir ye, ‘I ne naza,’ a tin rip yir ye, ‘To̱, akye̱ sak yir ti no̱o̱k yir katsak ni wu baꞌ e̱?’

²⁶ Ke yir fe̱ yir ye, ‘A ne̱ nufe anerawe,’ yir tá fok yir inyim ike̱ng ánerawe tanin nye yir'e kamok ánerawe cice̱r sok ye, aYohana nye aner kuzarap Adakunom.”

²⁷ Ne ba fe̱ be aYeso ye, “Yir ren yir baꞌ.” Iyong wu ma fe̱ be ba ye, “To̱, mi ta ka tak yin be akye̱ kuri kukyem ne mi ti nye ike̱re̱ na baꞌ.”

Kumaas natoon ácam nafa

²⁸ “Kyo̱o̱rna iyong yin di yin ane̱ e̱? Aner akak tuse a ta be inoon atek'e nafa. A tseng nufe kafe ime̱se̱ng'e a tá fe̱ be wu ye, ‘Igon'i, tseng ta sen inye itomong riko̱ anap katuur.’

²⁹ “Ne igon'e fe̱ ye, ‘Mi tà tseng baꞌ,’ amma nama a shishing riye̱ wu a tá tseng.

³⁰ “Ayong atek ame tseng nufe igon kafe afa'me a tá fe̱ ike̱ng wu tá tseng a fe̱ be igon kafe ime̱se̱ng'e. Igon'e fe̱ ye, ‘Mi tà tseng, ada,’ amma a ra tseng baꞌ.

³¹ “To̱, kaye̱e̱r ba afa'ong angan ne a nye ike̱ng ada ba tá shim e̱?” Iyong á fe̱ ye, “Kafe ime̱se̱ng'e.” aYeso fe̱ be ba ye, “Katsak'e ne mi ta ka tak yin, áfe kushashang itso̱m iben ne ínyak agwo̱m ta ka tsang yin kaye̱e̱r rigwo̱m Adakunom.

³² Kamok aYohana be̱ nong a tá ka tonong yin iren katsak, yin ti no̱o̱k yin katsak ni wu baꞌ. Amma áner áfe kushashang itso̱m iben ne ínyak ágwo̱m á ti no̱o̱k katsak. Yin tá di yin ike̱re̱'ong ka yin shishing yin kuse yin nong i tin no̱o̱k yin katsak baꞌ.”

Kumaas natoon aner akak a tá nye abur riko̱

³³ aYeso fe̱ be ba gbak ye, “Fok yin kumaas kukak: Aner ikap akak tuse a ta tuus íca kakon anap; a tá gorok riko̱'me ne a ta ribong a tanin fi ashi anap'e, a nye karo̱ garang nong aner kutor riko̱'me tin sor. Ne a no̱o̱k aner akak riko̱'me nong á tu ku ras mo ike̱ng ikak ne a be nutseng nuwo̱p kukak.

³⁴ Nizen iya ishamang tá nye, a tom ásam ákak ye á ra ku shan kanu kafu nufe áner ame.

³⁵ “Áfe itomong riko̱'me yiir ásam wu ame nong á tá tsor azining ne á fe̱r akak, á tá barak afe ataar'e be ata.

³⁶ Ayong a bun a tom ásam ákak gbak, áya a ta nar áfe ime̱se̱ng nufu ba, ne áfe itomong'e bun á nye be ayong kyo̱ndi á tá nye be áfe ime̱se̱ng ame.

³⁷ Ni igang'e makong, a tom igon wu nufu ba ne a to̱ riye̱ wu ye, ‘Á ta te yiik igon'i.’

³⁸ “Amma áfe a tá ko̱bo̱k riko̱ ame tá fa di igon'e, á nye ibo̱ro̱ng ye, ‘Ayu ne a nye aya kutse wu, i ku fe̱r yir nong ta ya yir kutse'me.’

³⁹ Iyong á tú yiir á tá fe̱r ne á barak nama riko̱'me.

⁴⁰ “Kamok anong, izen iya ne atek riko̱'me be̱, a ta nye ane̱ be áfe a ta ko̱bo̱k riko̱'me e̱?”

⁴¹ Ne ba fe̱ be aYeso ye, “A tà fe̱s ámaan aner'ong ne a no̱o̱k ákak itomong'e, áya a tana ku no̱o̱k kanu kafu nizen ishamang.”

⁴² aYeso fe̱ be ba ye, “Aser, yin fa yin kaye̱e̱r rife̱ Adakunom aꞌa? “ ‘Kuta kuya áfe rino̱k tá raba kuyong ne ku te itsik ribor'e. Adakunom ne a nye anong. Iyu nye ike̱ng azhing nufe yir.’

⁴³ “Kamok anong, won ta ka tak yin, a tin shan rigwo̱m Adakunom nufe yin nong a tà no̱o̱k áya a tana nye kunye kutek.

⁴⁴ Aner aya ne a tikpa natoon kuta na, a tà te ikpis'e, aya ne kuta'me tikpa ni wu ku tù ku me̱re̱sh.”

⁴⁵ Nizen ágbang átsi ne áner aFarisi tá fok kumaas'e, yong á ren ye aYeso ti fe̱ niba.

⁴⁶ Iyong á tse̱r iren nong á tu ku yiir, amma á tá fok inyim ánerawe kamok ánerawe'me shim ye aYeso nye aner kuzarap.