aMatiyu 15 - Izere New Testament

Igo̱o̱n átukop yir áfe agbugbang'e

¹ Iyong áner aFarisi ne áner kubo̱so̱p Itsi dorok na aUshalima nong á tá be nufe aYeso á tá su ku rip ye,

² “Akye̱ sak álimazhiri wan gaar ku kuus igo̱o̱n átukop yir ba ta ya naya dar ku kusu ibo̱k e̱?”

³ aYeso fe̱ be ba ye, “Akye̱ sak yin ta won yin Itsi Adakunom nong i ta kuus yin igo̱o̱n yin e̱?

⁴ Adakunom fe̱ ye, ‘Te yiik Ada wan be ango̱ wan, aya ne a kas ada wu ka ango̱ wu ayi, a tù ku fe̱r dim.’

⁵ Amma yin fe̱ yin ye, ke aner be ike̱ng iya a tanin tobok ada ka ango̱ wu ayi, amma a ra fe̱ ye, ‘Ike̱ng i ta se ye mi tà ka no̱o̱k yin iyong ne mi no̱o̱k Adakunom.’

⁶ Sang i se ye ma aner'e ra te yiik atek wu baꞌ. Yin won yin rife̱ Adakunom kamok igo̱o̱n yin.

⁷ Yin ákardak áner, Ishaya fe̱ gye̱r nizen a tá nye kuzarap natoon yin ye,

⁸ “ ‘Ánerawe na tiyiik be nanu ba tsek, amma aye̱ ba se gugo̱k be mi.

⁹ Ba ti ya iben nawarak tsek, kamok ike̱ng ba ta bo̱so̱p ánerawe'me nong nye igo̱o̱n anerawe.’ ”

Ike̱re̱ i ta sak ánerawe ta won dar a se zhe̱l

¹⁰ aYeso yis rigwo̱m ánerawe na tá fe̱ be ba ye, “Wesek yin ato ta fok yin.

¹¹ Sang ike̱ng i ta no̱ nanu ánerawe ne i ku sak a ta won dar a se zhe̱l baꞌ, ma ike̱ng i ta wuruk nanu wu.”

¹² Iyong álimazhiri wu be̱ nufu á ta fe̱ ye, “Wan ren ye aner aFarisi aye̱ beseng be ike̱ng iya wan tá fe̱'ong aꞌa?”

¹³ A fe̱ be ba ye, “Koakye ike̱ng ife sang Ada mi afe a ta se naza ne a tuus baꞌ, a tà inga cei ma na atsip'e.

¹⁴ Yin ku won yin ba, á nye ákpato̱o̱n á sen naka ko̱k ishe̱n. Ke akpato̱o̱n ko̱k afudang ishe̱n, cice̱r ba á ta kpas kaye̱e̱r ribong.”

¹⁵ Amma aBitrus fe̱ be wu ye, “Ni tak yir ike̱ng iya kumaas'e tá sor.”

¹⁶ Ayong aYeso fe̱ be ba ye, “Aser, yin rusek yin na awhi gip a?

¹⁷ Yin ren yin ye ike̱ng ife i ta no̱ nanu ne i tseng kaye̱e̱r kafa nizham i ta ra se wuruk aꞌa?

¹⁸ Amma ike̱re̱ i ta wuruk nanu anerawe nes kaye̱e̱r riye̱ wu, iyong ne i sak anerawe ta won dar a se zhe̱l.

¹⁹ Kamok kaye̱e̱r riye̱ ne amaan kuto̱ro̱ng nes, ike̱re̱ kyo̱ndi kufe̱r akak, be rikuna, ne kunyiis kuro̱m kpe̱de̱ng, be itsang, ne abo̱o̱s, be kukas Adakunom.

²⁰ Ike̱re̱ iyong ne i sak anerawe ta won dar a se zhe̱l, kuya naya dar ku kusu ibo̱k ta kyem sak anerawe ta wor dar a se zhe̱l baꞌ.”

Kuno̱o̱k katsak abafe aKana akak

²¹ aYeso dorok azong a tá be niben aTaya be aSidon.

²² Abining akak tuse azong a tá nye abafe aKana'me be̱ nufu be kanak ye, “Atekasa, Igon aDauda, ro̱ riye̱ mi, angas'i so̱ risam dide̱ng be amaan kabik.”

²³ aYeso fe̱ ike̱ng ikak be wu baꞌ. Iyong álimazhiri wu be̱ nufu á tú ku nye izong ye, “Ku te niren, a tsang a ni kuus yir ne a ni daam yir be kanak.”

²⁴ A fe̱ be ba ye, “A ti tom nufe itsamang Isarela iya i ta wei tsek.”

²⁵ Abining ame be̱, a tá tigbok akuur nasho̱o̱n aYeso a tá fe̱ ye, “Atekasa, ni se̱ mo.”

²⁶ aYeso fe̱ be wu ye, “I se gye̱r a ta sok naya inoon nong a ta no̱o̱k ágabu baꞌ.”

²⁷ Abining'e fe̱ be wu ye, “I se anong gye̱r, Atekasa, amma ágabu kyem á ya naya atekasa ba nafe na ta kpas kaben.”

²⁸ Ayong aYeso fe̱ be wu ye, “Anyiningkasa, kuno̱o̱k katsak wan se gaan. Ike̱ng wan ta shim a tà ka nye'me.” Nizen iyong angas wu ame wor a te atser.

aYeso sak ánerawe whe̱re̱ tá te atser

²⁹ aYeso dorok a tá gor nukim kudung aGalili. A tá ngarak natoon kawhanang a tá se sonong azong.

³⁰ Ánerawe whe̱re̱ be̱s nufu. Á be̱s be ákun be ákpato̱o̱n ne ágbanu be áfe iro̱k whe̱re̱. Á be̱s'e nasho̱o̱n wu ne wu ku sak ba á ta te atser.

³¹ Ánerawe te zhing nizen ba tá di ágbanu tá fe̱ kanu ne ákun be áfe a ta yising te atser ne ákpato̱o̱n di karo̱. Iyong á kerek riyerek Adakunom afe Isarela.

aYeso no̱o̱k ánerawe izungu inaas naya

³² aYeso yis álimazhiri wu a tá fe̱ be ba ye, “Mi fok kuro̱ riye̱ ánerawe na kamok ba n te inom itaar be mi, á be ike̱ng kuya baꞌ. Mi shim tu ku te ba niren anong be izong baꞌ. Ke anong baꞌ á ta te gbe̱re̱k niren.”

³³ Iyong álimazhiri wu fe̱ be wu ye, “Ake̱ ne yir ta se̱ yir naya aze katse na nong ta no̱o̱k yir rigwo̱m ánerawe kuri riyu e̱?”

³⁴ aYeso tú rip ba ye, “Yin be yin ágbang abiredi ámang e̱?” Iyong á fe̱ ye, “Agbang abiredi kanataar be ízos cie̱k tsek.”

³⁵ aYeso fe̱ be ánerawe'me ye á ra sosok kaben.

³⁶ Ne a sok ágbang abiredi kanataar ame be ízos'e a tin tonong riye̱ rikan wu be Adakunom, ne a te̱se̱ng a tá no̱o̱k álimazhiri wu nong á ta se nyesek ánerawe'me.

³⁷ Koangan ba ya ma á whas. Nizen á tá gang kuya'me álimazhiri wu tusung ribir'e. I tú ku tuk ma i shining iderse kanataar.

³⁸ Ánerawe áfe a tá ya nye átek izungu inaas ze̱e̱r be ányining be inoon.

³⁹ Nizen iya aYeso tá te ánerawe'me niren, a no̱ kaye̱e̱r kukpara ashi á tá be niben aMagadan.