aMatiyu 13 - Izere New Testament

Kumaas natoon aner akak a tá se nas naya

¹ Katuk kayong, aYeso tá fa wuruk kaye̱e̱r kasa'me nong a tá be nukim agbang kudung aGalili.

² Rigwo̱m ánerawe whe̱re̱ tú ku gorok ma aYeso'me se no̱ kaye̱e̱r kukpara ashi nong a ta sonong kaye̱e̱r'e. Ánerawe'me nyeseng nukim agbang kudung'e.

³ Ayong a tú ku taas ba ike̱re̱ whe̱re̱ be ku ninye kumaas. A fe̱ ye, “Aner ikap akak tseng a ta se nas naya riko̱.

⁴ Nizen iya a ta se be i nas'e, íca'me ikak kpas niren ne nanon be̱s ne na kok.

⁵ Ica'me ikak kpas nifang agudong naro̱ ka ta be iben dide̱ng baꞌ. I tang zizirik kamok iben'e se tsik baꞌ.

⁶ Amma kunom tá fa tar ne ato'me wor a koor kamok atsip'e se̱ iben baꞌ.

⁷ Íca'me íkak kpas kaye̱e̱r ikiritsan ne ikiritsan'e ku te̱ne̱ng ba kurasak.

⁸ Ica'me ikak kpas naro̱ katek ne i te kusu saase, ikak kuso̱k inyak ne ikak te ace iso̱k igataar ne ikak te iso̱k itaar ne i nar ike̱ng iya a ta nas.

⁹ Aya a ta be ato kufok a ra fok.”

Ike̱ng i tá sak aYeso tá bo̱so̱p ánerawe'me be kumaas

¹⁰ Iyong álimazhiri wu be̱ nufu nong á tu ku rip ye, “Akye̱ sak wan fe̱ ne i ninye kumaas e̱?”

¹¹ aYeso fe̱ be ba ye, “Yin a ta no̱o̱k yin kukyem kuren ike̱re̱ rigwo̱m kaza, ike̱re̱ i ta se nune̱re̱ng. Amma ba a tu shim ba'me baꞌ.

¹² Aner afe a ta be ike̱ng, a tú ku barang mo, nong i ta se̱ whe̱re̱. Aner afe a ta be baꞌ, cie̱k wu ta be'me gip, a tin shan ni wu.

¹³ Ike̱ng i ta sak mi ta fe̱ be ba ne i ninye kumaas se ye: “Kamok ko ba ye̱re̱k, á ta di baꞌ. Ko á foos á ta ren ike̱ng iya a tin fe̱ baꞌ.”

¹⁴ Aser, kuzarap Ishaya te shining natoon ba, ku ta fe̱ ye, “ ‘Yin tà foos yin gye̱r, yin tà ra ren yin ike̱ng iya a tin fe̱ baꞌ, ko cie̱k; Yin tà ye̱re̱k yin gye̱r, yin tà ra di yin baꞌ, ko cie̱k.

¹⁵ Kamok aye̱ ánerawe'me n te kyo̱ndi kuta; á fok kuto baꞌ. Á whe̱se̱ng anyisi ba fan á bu di be anyisi ba, Ke anong baꞌ, ke á ye̱re̱k be anyisi ba ne á foos be ato ba, ne á ren ike̱ng iya a tin fe̱, ne ba kirik nunaan ne mi ku sak ba á tà te atser.’

¹⁶ “Amma aner riye̱ rikan nye yin kamok anyisi yin ta di ne ato yin foos.

¹⁷ Katsak'e ne mi ta ka tak yin, áner kuzarap whe̱re̱ ne áya a ta se gye̱r nasho̱o̱n Adakunom shim ke á di ike̱re̱ yin ta ye̱re̱k yin, á ra di baꞌ, ne á foos ike̱re̱ yin ta foos yin, á ra fok baꞌ.

Kumaas natoon aner a tá nas ica naya'me ta sor

¹⁸ “To̱, fok yin ike̱ng iya kumaas natoon aner ikap'e ta sor.

¹⁹ Ke anerawe fok rife̱ natoon rigwo̱m kaza, a ra ren ike̱ng iya i ta sor baꞌ. Amaan aner'e be̱ nong a ta turung ike̱ng iya a tan tuus kaye̱e̱r riye̱ aner'e. Ayong ne a nye íca'me iya i ta kpas niren.

²⁰ Iya i ta kpas nifang agudong nye aner aya a ta fok rife̱'me gbashak ne a wor a shan be riye̱ rikan.

²¹ Amma sang a ra be atsip baꞌ, a sor nizen cie̱k tsek. Izen iya ne kudaam ka kutabak be̱ kamok rife̱ Adakunom'me ne a wor a kubun kama.

²² Íca'me iya i tá kpas kaye̱e̱r ikiritsan nye aner a ta fok rife̱'me, amma ke izen iya ne kudaam kusor kazatse be kushim kurum tu ku daam ne a beseng.

²³ Ike̱ng á tá tuus niben itek ne i nye aner a ta fok rife̱'me ne a ren ike̱ng iya rife̱'me ta sor. A te ace kuso̱k inyak ne íkak iso̱k igataar ka iso̱k itaar ne i nar ike̱ng iya a tá tuus.”

Kumaas natoon agam a ta tang kaye̱e̱r alikama

²⁴ aYeso bun a tu tak ba kumaas kukak gbak ye, “Rigwo̱m kaza se kyo̱ndi aner a tá nas alikama riko̱ wu.

²⁵ Nizen iya koangan ta se nida, ne amudo̱n wu be̱ a tin nas agam kaye̱e̱r alikama'me nong a tá tseng akon wu.

²⁶ Nizen alikama'me tá turung ace ne agam'me ma wuruk gip.

²⁷ “Ásam atek riko̱'me be̱ á ta fe̱ be wu ye, ‘Atekasa, aser wan nas izha itek wu aꞌa? Agam nye ane̱ a ti wuruk anong e̱?’

²⁸ “Ayong atekasa'me fe̱ be ba ye, ‘Amudo̱n'i akak ne a se nye ike̱ng iyong.’ “Ásam wu'me fe̱ be wu ye, ‘Wan shim ta se inga yir agam'me a?’

²⁹ “Amma atekasa'me fe̱ be ba ye, ‘Wayo, kamok ke yin se inga yin agam'me yin tà inga yin mak be alikama'me gip.

³⁰ Ka won yin ba cice̱r nong a ta rasak mak ma nizen ishamang'e. Nizen iyong ne mi tà fe̱ be áfe kutse̱k'e ye, Tusung yin agam'me ta rosom yin na agwo̱m nong tin te yin kuro̱ng; ne i tusung yin alikama'me ta be̱ tin korok yin'e ni ingme̱.’ ”

Kumaas be ica kakon a ta yis ye amusta

³¹ aYeso bun a tú ku nye ba kumaas kukak ye, “Rigwo̱m kaza se kyo̱ndi ica amusta anerawe tá sok a ta tuus riko̱ wu.

³² I ta nye ica kakon ihiir'e kaye̱e̱r ribir ica nakon yin, izen iya ne i rasak ne i nar nakon i ta tuus cice̱r kagbang'e, i te ritin ma nanon ti no̱k are̱ niwhang'e.”

³³ A bun a tu nye ba kumaas kukak gbak ye, “Rigwo̱m kaza se kyo̱ndi ayisti aya abining akak tá sok a tin gung be amudu ataar afe ikpe alikama ma alikama'me dorok a ta te cip.”

aYeso ti nye itomong be kumaas

³⁴ aYeso taas rigwo̱m ánerawe ike̱re̱'ong cice̱r be kumaas a fe̱ ike̱ng ikak dar a ninye kumaas baꞌ.

³⁵ aYeso nye anong, nong a ta shining ike̱ng aner kuzarap akak ta fe̱ ye, “Mi tà fe̱ kanu be kumaas nizen iya mi ta sen fe̱ be ba. Mi tù ku taas ba ike̱re̱ iya a tá tsang a ka ne̱r ba'me gbugbang kum nizen a ta nye kazatse.”

aYeso fe̱ ike̱ng ife kumaas'e natoon agam be alikama tá sor

³⁶ Ayong aYeso won rigwo̱m ánerawe ame a ta no̱ kari. Álimazhiri wu su kuse̱ nong á ta fe̱ be wu ye, “Ni tak yir ike̱ng iya kumaas natoon agam, a tá tang kaye̱e̱r riko̱ ame ta sor.”

³⁷ aYeso fe̱ be ba ye, “Aya a ta nas izha itek'e nye Igon Anerawe.

³⁸ Riko̱'me nye kazatse, ne izha itek'e sor inoon rigwo̱m Adakunom. Agam'me nye inoon amaan aner'e.

³⁹ Ne amudo̱n aya a ta nas naya'me nye Ishetan. Ishamang'e nye izen afe kazatse tana gang, ne áfe kutse̱k'e nye ámaleka.

⁴⁰ “Kyo̱ndi a ta tusung agam nong a ta te nuro̱ng, anong ne i ta se nizen kazatse tana gang.

⁴¹ Igon Anerawe tà tom ámaleka wu, á tù ku tusung cice̱r áfe a ta sak ánerawe tá nye rine̱n ne áya a tà nye amaan kunye cice̱r.

⁴² Ne á ku barak ba kaye̱e̱r kuro̱ng kufe izen izen, á ta tos ne á ya anyi azong.

⁴³ Ne áya a ta se gye̱r nasho̱o̱n Adakunom ta sam kyo̱ndi akanang kunom kaye̱e̱r rigwo̱m Ada ba. Aner a ta be ato kufok a ra fok.

Kurum a ta ne̱r

⁴⁴ “Rigwo̱m kaza se kyo̱ndi kurum a ta ne̱r niben kaye̱e̱r riko̱ ke izen iya aner akak se se̱'me ne a bun a ku ne̱r. Be riye̱ rikan a ta se re̱e̱s ike̱re̱ wu cice̱r nong a ta sen shan riko̱'me.”

⁴⁵ A bun a fe̱ gbak ye, “Rigwo̱m kaza se yiik kyo̱ndi iwe̱re̱ng i ta sas afe kushashang'e ta tse̱r.

⁴⁶ Izen iya ne a se̱ iya i ta nye itek'e dide̱ng ne a tseng nong a ta se re̱e̱s ike̱re̱ wu cice̱r nong a tin shan mo.”

Kumaas be aner a ta be agunung

⁴⁷ A bun a fe̱ be ba gbak ye, “Rigwo̱m kaza se kyo̱ndi agunung a tá te kaye̱e̱r kudung nong a tin yising ízos iriri'me.

⁴⁸ Izen iya ne a shining be ízos ne áfe kuyising ízos'e korok nukim, nong á ta sonong á ta kasa itek ne á tusung ni iderse ne á nyosong iya i ta nye itek baꞌ.

⁴⁹ Anong ne i ta se izen kazatse tana gang, ámaleka Adakunom ta be̱ nong á ta kam ámaan aner be átek'e.

⁵⁰ Ne á barak ámaan'e kaye̱e̱r kuro̱ng kufe izen izen á ta tos ne a ya anyi azong.”

Kubo̱so̱p kufas be kuzen

⁵¹ aYeso tú ku rip ba ye, “Yin ren yin ike̱ng ife ike̱re̱ na tá sor a?” Iyong á fe̱ be wu ye, “Ei.”

⁵² Ayong aYeso fe̱ be ba ye, “Kamok anong, koangan aner kubo̱so̱p Itsi aya a ta mu ku tak itak rigwo̱m kaza se kyo̱ndi atekasa a tana turung ike̱re̱ izen be ifas wu tan tusung nong a tin nye itomong.”

A raba aYeso na aNazaret

⁵³ Nizen aYeso tá gang ku kataas ba kumaas'e, ne a ya kasho̱o̱n be kutseng.

⁵⁴ A be̱ nuwo̱p wu, yong a san kubo̱so̱p ánerawe'me kaye̱e̱r kutu aduwa ba'me, áya a tu ku foos te zhing. Ne á fe̱ ye, “Áner na se̱ kukyem kuri kuyu ake̱, ne kukyem kunye itomong azhing na ake̱ e̱?

⁵⁵ Igon akapinta na aꞌa? Ango̱ wu ne a nye aMarya aꞌa, áronyining ne a nye aYakub be aYusufu ne aSiman be aZhud aꞌa?

⁵⁶ Ángasnyining wu cice̱r se mak be yir aꞌa? Iyong wu se̱ ike̱re̱ na cice̱r ake̱ e̱?”

⁵⁷ Iyong á nye riye̱ kubeseng be wu. Ne aYeso fe̱ be ba ye, “Aner kuzarap be kuyiik koake̱ amma a be kuyiik nuwo̱p wu be kari wu baꞌ.”

⁵⁸ A nye itomong azhing dide̱ng azong baꞌ, kamok kuwon dar kuno̱o̱k katsak ba.