aMatiyu 12 - Izere New Testament

Kurip natoon kunom Asabar

¹ Nizen iyong, aYeso tsang a tseng nako̱ katuk Asabar, álimazhiri wu tsang á fok izong, iyong á san kute̱se̱ng ace naya ne á ya.

² Nizen iya aner aFarisi tá di anong, iyong a fe̱ be aYeso ye, “Di, álimazhiri wan sen nye ike̱ng iya a tá roon'e katuk Asabar.”

³ Ayong aYeso fe̱ be ba ye, “Aser, yin kun fa yin izibir natoon ike̱ng iya aDauda tá nye be ánerawe wu nizen iya a tá fok izong aꞌa?

⁴ Á tá no̱ naro̱ a tu ku ya Adakunom iben be ánerawe wu nong á ta ya abiredi azhe̱l'e, Itsi aMusa tá fe̱ ye, sang a tú nye anong baꞌ, kamok naya'me nye nafe átsi tsek.

⁵ Ka yin kun fa yin kaye̱e̱r kufumung Itsi aMusa ye, ‘Katuk Asabar atsi nye ike̱ng iya i ta nye itek baꞌ, gip be anong ko i sor rine̱n baꞌ’ aꞌa?

⁶ Won ta ka tak yin, aka afe a ta nar kuro̱ kuya Adakunom iben na aze.

⁷ Ke a fa fe̱ ye, yin ren yin ike̱ng iya rife̱ na tin fe̱ ye, ‘Mi shim kuro̱ riye̱, sang asidaka baꞌ.’ Ke yin di yin rine̱n aner a ta se dar rine̱n baꞌ.

⁸ Kamok Igon Anerawe ne ka nye Agwo̱m Ágwo̱m natoon Asabar.”

Aner akak kubo̱k ta we̱

⁹ Ayong aYeso dorok azong, a tá tseng kaye̱e̱r kutu aduwa.

¹⁰ Aner akak tuse azong kubo̱k tá we̱. Áner aFarisi shim nong a ta di ka aYeso ta taam, iyong á tú ku rip ye, “I nye Itsi a tana sak akak tá te atser katuk Asabar a?”

¹¹ aYeso fe̱ be ba ye, “Ke akak yin be itsamang wu, i ra kpa kaye̱e̱r ribong katuk Asabar, a ta tun aꞌa?

¹² Anerawe nar itsamang be kuyiik aꞌa? Kamok anong i nye rine̱n nong a ta nye ike̱ng itek katuk Asabar baꞌ.”

¹³ Ayong aYeso fe̱ be aner ame ye, “Nabak kubo̱k wan.” Ayong a nabak kubo̱k'e ne ku wor ku te kutser gye̱r kyo̱ndi kufe afa'me.

¹⁴ Áner aFarisi ame wuruk nufang á ta nye kanye̱k nong á ta fe̱r aYeso.

Adakunom ne a kasa asam wu

¹⁵ aYeso ta ren anong, iyong a dorok a tá won karo̱ kayong. Ánerawe whe̱re̱ tú kuus ne sak áfe iro̱k te atser cei.

¹⁶ A tú ku ko̱ro̱k ba kuto ye, sang á tu tak akak ka wu nye angan e̱ baꞌ.

¹⁷ Iyu se anong, nong a tá shining ike̱ng Ishaya aner kuzarap tá fe̱ ye,

¹⁸ “Asam mi na aya mi tá kasa, aya mi ta shim ne i be riye̱ rikan be wu, mi tù ku shining be Kabik mi, a tà taas áner aya sang a ta nye àner aYahuda baꞌ, itak amok mi.

¹⁹ A tà korok riwo̱ng ka a ta tasak baꞌ, ko akak ta fok kuto̱ wu na ágbang iren baꞌ.

²⁰ A tà bur ike̱ng i tan te gordok baꞌ, ko a tà riming kuro̱ng kuya ku tan be̱ barak ku ta ku baꞌ, ma katsak'e wuruk kanang.

²¹ Áner áfe sang á ta nye aner aYahuda baꞌ tin te riye̱ ba riyerek wu.”

aYeso ne kabik aBazabul

²² Ayong a be̱ be aner akak nufe aYeso a tá nye akpato̱o̱n'e ne a nye agbanu'me gip a tá be amaan kabik. aYeso tú sak a ta te atser ne a di karo̱ ma a fe̱ kanu.

²³ Ánerawe cice̱r te zhing ne á fe̱ ye, “Ayu ne a nye Igon aDauda aꞌa?”

²⁴ Nizen áner aFarisi tá fa fok anong, iyong á fe̱ ye, “Be kabik aBazabul agwo̱m ítseng ne aner na ti turung amaan nabik'e.”

²⁵ aYeso tá ren kuto̱ro̱ng ba iyong a fe̱ be ba ye, “Ke rigwo̱m naka kabak, rigwo̱m'e tà kpa. Anong ne i se ke áner kuwo̱p kuzining ka áfekasa kazining naka kabak, á ta kyem á nyeseng baꞌ.

²⁶ Ke Ishetan ko̱n be Ishetan, to̱, i nye ye, a naka kabak. Ne rigwo̱m wu nye ane̱ ri ta nyeseng e̱?

²⁷ Ke i nye ye, mi turung amaan nabik be kukyem aBazabul, to̱, iyong ánerawe yin turung afu ba be akye̱ e̱?

²⁸ Ke i nye mi turung be Kabik Adakunom, to̱, i nye ye, rigwo̱m Adakunom m be̱ nufe yin.

²⁹ “A ta kyem a no̱ nasa aner agap nong a ta kop ike̱re̱ wu baꞌ, ma ke a tu rosom, a ta ra kok ike̱re̱ wu'me.

³⁰ “Aner aya a ta se be mi baꞌ, a nye amudo̱n'i. Aya a ta tusung be mi baꞌ, a shik.

³¹ Kamok anong, mi shim ta ka tak yin, koakye kuri rine̱n ne ánerawe nye ka kuzhe̱e̱sh Adakunom, a tù ku re̱ng'e, amma aner aya ne a zhe̱e̱sh Kabik Kazhe̱l'e, a tù ku re̱ng riyong nigaan'e baꞌ.

³² Koangan ne a fe̱ amaan rife̱ natoon Igon Anerawe a tù ku re̱ng'e, amma aner aya ne a fe̱ imaan'e natoon Kabik Kazhe̱l'e, a tù ku re̱ng rine̱n riyong nigaan'e baꞌ, ko kyo̱o̱rna ko nasho̱o̱n.

Ritin kakon be ágba wu

³³ “Kakon katek tes kutes kutek. Amaan kakon tes amaan kutes. Kamok anong a ren kakon be kutes wu.

³⁴ Yin naban afomong yin i ta nye yin amaan'e, yin ta san yin ane̱ ta fe̱ yin ike̱ng itek e̱? Ike̱ng i ta se kaye̱e̱r riye̱ aner ne i wuruk nanu wu.

³⁵ Aner atek fe̱ ike̱re̱ itek, wu tan tusung kaye̱e̱r riye̱ wu ne amaan aner fe̱ ike̱re̱ imaan'e, wu tan tusung kaye̱e̱r riye̱ wu.

³⁶ Won ta ka tak yin, koakye amaan rife̱ anerawe tá fe̱, a tà shan ishorong wu katuk amok Adakunom.

³⁷ Kuri rife̱ afe wan tá fe̱ ne a ta ka to̱ mo amok, ka wan tà sor afe rine̱n ka azhe̱l'e.”

Ánerawe shim á ta di itomong azhing

³⁸ Iyong áner kubo̱so̱p itsi akak ne áner aFarisi ákak fe̱ be aYeso ye, “Aner Kubo̱so̱p yir shim ta di yir wan nye ike̱ng ikak iya i tana tonong ye wan ne naza.”

³⁹ aYeso fe̱ be ba ye, “Ámaan aner izam na a ta shonong, i ta shim a ta ye̱re̱k ike̱re̱ azhing á ta ra ku nye ba'me baꞌ, ma ke ife aZhona aner kuzarap.

⁴⁰ Kyo̱ndi aZhona ta te inom itaar, katuk be kunom kaye̱e̱r kafa agbang izos, anong ne Igon Anerawe ta te inom itaar katuk be kunom kaye̱e̱r iben.

⁴¹ Katuk amok, áner aNineve tà fe̱ be ánerawe izam iyu ye, yin nye yin amaan ike̱re̱. Yin shishing yin kuse yin baꞌ, amma yir shishing yir kuse yir be rife̱ aZhona. Di yin akak a ta nar aZhona na aze.

⁴² Katuk amok, abining a tá nye agwo̱m aSheba tà dorok a tà fe̱ be ánerawe izam iyu ye yin nye yin amaan ike̱re̱, kamok wu ta ne ma nigang kazatse nong a ta be̱ foos kukyem aSolomon. To̱, di yin akak a ta nar aSolomon na aze.

⁴³ “Ke amaan kabik wuruk nuro̱m anerawe a ta tsang i tseng kaye̱e̱r katse nong i ta se̱ karo̱ i tana ku fan, ke i se̱ baꞌ,

⁴⁴ ne i fe̱ ye, ‘Mi tu ku bun naro̱ mi tú ku wuruk.’ Ke i be̱ i se̱ karo̱'me dar akak, an re̱ng gye̱r, a tan nye.

⁴⁵ I tà ku bun nong i ta se yis amaan nabik nakak kanataar naya na ta nye namaan'e ne na ku nar. Ne i no̱ i ta sor azong. Ne kuse aner'e te kumaan'e ne ku nar kufe ime̱se̱ng'e. Anong ne i ta se be ámaan anerawe izam iyu.”

Anyining aYeso be áronyining be̱ nufu

⁴⁶ Nizen aYeso ta ru fe̱ kanu be rigwo̱m ánerawe'me, ango̱ wu be áronyining nyeseng nufang á shim a tu ku di.

⁴⁷ Ayong aner akak fe̱ be wu ye, “Ango̱ wan be áronyining wan se nufang á shim a ta ka di.”

⁴⁸ Ayong aYeso fe̱ be wu ye, “Angan ne a nye ango̱ mi be áronyining'i e̱?”

⁴⁹ Ayong a ti nabak kubo̱k na álimazhiri wu a tá fe̱ ye, “Di yin, ango̱ mi be áronyining'i na.

⁵⁰ Kamok koangan, afe a ta nye ike̱ng iya Ada mi afa a ta se kaye̱e̱r kaza ta shim, ne a nye ango̱ mi be áronyining'i ne ángasnyining'i.”