aMatiyu 11 - Izere New Testament

Átom á ta ne nufe aYohana aner abatisma

¹ Nama aYeso tá gang kutaas alimazhiri wu kuso̱k be afa'me ike̱re̱ ba tana nye, iyong a dorok a tá be niben aGalili nong a ta tsang a bo̱so̱p ánerawe'me ne a ku nye ba awazi kaye̱e̱r iwo̱p ba'me.

² Nizen iyong, aYohana aner abatisma ta se nitso̱m, a fok ike̱re̱ iya aKiristi tá nye, iyong a tom álimazhiri wu

³ nong á tá su ku rip ye, wu ne a nye aya a tá fe̱ ye, a ta be̱ ame ka ba ra tor akak ze̱e̱r e̱?

⁴ aYeso fe̱ be ba ye, “Kubun yin ta se tak yin aYohana ame ike̱ng iya yin tá di yin ne i foos yin:

⁵ ákpato̱o̱n se̱ kudi karo̱ ne ákun tseng, ákparo̱ng te atser ne ágbato fok ato ne ikom dorok be kutser ne a nye afe rizor awazi Rife̱ Ritek'e.

⁶ Aner riye̱ rikan ne a nye aner aya a tin be agak riye̱ natoon mi baꞌ.”

⁷ Nizen álimazhiri aYohana'me tú ku bun, aYeso san i taas rigwo̱m ánerawe'me itak natoon aYohana. “Nizen iya yin tá wuruk yin ni iwe̱ng, yin se di yin akye̱ e̱? Yin tseng yin i ta se di yin agam aso̱p'ong kuwun ta fe̱se̱m a?

⁸ Ke anong baꞌ, to̱, yin tseng i ta se di yin akye̱ e̱? Aner a tan te ares atek a? Wayo, aner kasa rigwo̱m ne a tes ares atek.

⁹ To̱, iyong yin se di yin akye̱ e̱? Aner kuzarap a? Ei, won ta ka tak yin, a nar aner kuzarap.

¹⁰ Ayu ne a nye aya a tá zibir itak natoon wu ye, “ ‘Di, mi ta tom atom mi nasho̱o̱n wu aya a tana ka nye iren.’

¹¹ “Katsak'e ne mi ta ka tak yin, kaye̱e̱r kazatse a kun tes aner akak a tá nar aYohana aner abatisma yiik baꞌ. Gip be anong aya a ta nye ahiir'e kaye̱e̱r rigwo̱m kaza tu nar yiik.

¹² Kum nizen aYohana aner abatisma ma kyo̱o̱rna rigwo̱m kaza so̱ risam, ákardak aner'e shim a tin shan.

¹³ Kamok áner kuzarap cice̱r ne Itsi aMusa nye kuzarap ma aYohana tá ra be̱.

¹⁴ Ke yin shim yin ne i ni no̱o̱k yin katsak rife̱ na ye, aYohana nye Iliya aya a tá fe̱ ye a tá be̱.

¹⁵ Won afe a ta be ato kufok a ra fok.

¹⁶ “Be akye̱ ne mi tin maas ánerawe izam iyu e̱? A se kyo̱ndi inoon a ta sosok naro̱ rizhik ne á yis áfudang ba ye,

¹⁷ “ ‘Yir tá bom yin abom riye̱ rikan ko yin to yin baꞌ, yir tá bom yin abom riyo̱m ko yin tos yin baꞌ.’

¹⁸ “Kamok aYohana sor dar kute naya nanu ne a sor dar ku so̱ ashi anap amma ánerawe fe̱ ye a be amaan kabik.

¹⁹ Igon Anerawe be̱ a yas ne a so̱, yong ba fe̱ ye a ma ka yas ne a so̱, ne a nye rime̱ be áfe kushashang itso̱m iben ne áfe rine̱n. Gip be anong mi di kukyem Adakunom be itomong wu.”

Iwo̱p i ta gaar kushan Rife̱ aYeso

²⁰ Ayong aYeso kpaan kuzhe̱e̱r áfe iwo̱p iya wu tu ku nye itomong azhing whe̱re̱, kamok á tá gaar ku shishing kuse ba.

²¹ “Awo̱ be yin áner aKorasi. Awo̱ be yin áner aBatseda, ke a fa fe̱ ye a nye itomong azhing kuri iya a tá nye nufe yin kaye̱e̱r iwo̱p aTaya be aSidon ke ba shishing kuse ba gbugbang ne á tes agye̱e̱r ares ne a korok itong nuro̱m ba.

²² Won ta ka tak yin, katuk igang'e, amok aTaya ne áfe aSidon tà ra ku se be afe yin.

²³ Be wan kuwo̱p aKapanum gip, wan di ye, a ta ka te yiik ma naza a? Wayo, a ta te be wan fe̱re̱ ma naro̱ áfe a tá kus tu ku se. A fa fe̱ ye, a nye kuri itomong azhing a tá nye nufe yin kaye̱e̱r kuwo̱p aSodom, ke ku ruresek ma kyo̱o̱rna.

²⁴ Won ta ka tak yin, katuk igang'e, amok áner aSodom tà ra ku se be áfe yin.”

Be yin nunaan cice̱r yin nong tà se̱ yin kufan

²⁵ Nizen iyong aYeso fe̱ ye, “Mi be riye̱ rikan Ada, Agwo̱m Ágwo̱m atek kaza be kaben, kamok wan ta ne̱r áya a ta be ritseng ne áya a ta ren ike̱ng, ike̱re̱ na ne i tonong áya a ta be kumees rice.

²⁶ Ei, Ada, kamok iyu ne i nye kushim riye̱ wan.

²⁷ “Ada mi, min won ike̱re̱ na cei. Ko akak ren Igon'e baꞌ, ma Ada'me tsek. Akak ren Ada'me baꞌ, ma Igon'e tsek be aya Igon'e ta kasa nong a tu ku tonong ba.

²⁸ “Be̱ yin nunaan, cice̱r yin áya i tan ro̱ro̱ng yin be acer yin, mi tà ka no̱o̱k yin kufan.

²⁹ Kuus yin ike̱ng iya mi ta fe̱, i bo̱so̱p yin nunaan, kamok mi se whiwhe̱ ne i be kabik kumees rice, yin ta se̱ yin kameneng riye̱.

³⁰ Kamok risam mi gop baꞌ, ne acer'i gaar baꞌ.”