aMatiyu 1 - Izere New Testament

Izo̱ro̱k iya aYeso tú ku wuruk

¹ Izibir natoon izo̱ro̱k iya aYeso Kiristi Igon aDauda tú ku wuruk, kaye̱e̱r kasa Ibrahim.

² Ibrahim ne a nye atek Ishaku ne Ishaku tes aYakub. aYakub ne a nye atek aYahuda be ribir áronyining wu.

³ aYahuda ne a tes aPeres be aZera, anyining ba tá nye aTamar. Ne aPeres ne a nye atek aHeruna, ne aHeruna tes Aram.

⁴ Aram ne a nye atek Aminadap. Ne Aminadap tes aNashon, aNashon ne a nye atek aSalmon.

⁵ aSalmon nye atek aBowas, anyining wu tá nye aRahap, aBowas ne a nye atek aBida, anyining tá nye aRut, ne aBida tes aZhese.

⁶ aZhese ne a nye atek aDauda a tá nye agwo̱m. aDauda ne a tes aSolomon anyining wu tá tsang a nye abining aYuriya.

⁷ aSolomon ne a nye atek aRahobom, ne aRahobom nye atek Abizha. Abizha ne a nye atek Asa.

⁸ Asa ne a nye atek aYehoshafa, ne aYehoshafa tes aYoram, ne aYoram ne a nye atek aYuziya.

⁹ Ne aYuziya tes aYotam. aYotam ne a nye atek Ahas, ne Ahas tes aHezekiya.

¹⁰ aHezekiya ne a nye atek aManasa, ne aManasa tes Amon. Amon ne a nye atek aYosiya.

¹¹ aYosiya ne a nye atek aZhekoniya be ribir aronyining wu nizen iya a tá kok áner aYahuda nong a tá se te ásam ni iben aBabila.

¹² Nama kutseng ba na aBabila: aZhekoniya se tes aSheltiyel, ne aSheltiyel tes aZarubabel.

¹³ aZarubabel ne a nye atek Abiyud, ne Abiyud tes Aliyakim. Aliyakim ne a nye atek Azuro.

¹⁴ Azuro ne a nye atek aZadok, ne aZadok tes Akim. Akim ne a nye atek Aliyudu.

¹⁵ Aliyudu ne a nye atek Aleyara, ne Aleyara tes aMatana, ne aMatana ne a nye atek aYakub.

¹⁶ Ne aYakub tes aYusufu a tá nye amitek aMarya aya a tá tes aYeso, aya a tú ku yis ye aKiristi.

¹⁷ Kamok anong, izam se kuso̱k be anaas kum be izen Ibrahim ma nizen aDauda. Izam se kuso̱k be anaas kum be izen aDauda ma izen a tá tseng ni iben aBabila. Izam se kuso̱k be anaas be izam a tá ne na aBabila ma nizen a tá tes aKiristi gip.

Kutes aYeso Kiristi

¹⁸ Ana ne kutes aYeso Kiristi se. Nizen iyong anyining nye kanamang kusam aYusufu, a be kafa kum ne an nye kuwe̱ne̱ng'e baꞌ, a be kafa'me be Kabik Kazhe̱l'e.

¹⁹ Acam wu aYusufu'me nye aner atek nasho̱o̱n Adakunom, iyong a shim nong a tá te aMarya isum nasho̱o̱n ánerawe baꞌ, iyong a nye kanye̱k nong a tú won kyo̱o̱n.

²⁰ A tá se kaye̱e̱r kanye̱k kayong, iyong amaleka Adakunom be̱ nufu kaye̱e̱r nabos nong a tá fe̱ be wu ye, “aYusufu, igon aDauda, sang tu fok inyim kuso̱k aMarya kanamang kusam wan baꞌ, kamok kafa wu'me nye kafe Kabik Kazhe̱l'e.

²¹ A tà tes igon, wan tù ku te riyerek ye aYeso, kamok wu ne a tà shesh ánerawe kaye̱e̱r rine̱n ba.”

²² Cei ike̱re̱ na nye nong a tá shining ike̱ng iya Adakunom tá fe̱ nanu aner kuzarap, a tá fe̱ ye,

²³ “Di yin, kanamang tà be kafa, a tà tes igon, a tù ku yis ye Imanuwel. (Imanuwel sor, Adakunom se mak be yir.)”

²⁴ Nizen aYusufu tá shiming ni ida, a nye kyo̱ndi amaleka Adakunom'me tú ku tak ayong a sok abining wu nong a tá tseng'e.

²⁵ Amma aYusufu tsang a ku ren kyo̱ndi aner abining baꞌ, ma nama a tá tes igon'e, a tú ku yis ye aYeso.