aMarkus 9 - Izere New Testament

¹ A bun a fe̱ be ba ye, “Katsak'e ne mi ta ka tak yin, ákak afe a ta se aze tà tsang á kus baꞌ, ma á di rigwo̱m Adakunom be̱ be kukyem nizham.”

Kanyisi aYeso shishing

² Nama inom igataar aYeso sok aBitrus ne aYakub be aYohana nong a tá tseng'e natoon agbang rifan, naro̱ á ta se awan ba. Azong ne kanyisi aYeso shishing nasho̱o̱n ba.

³ Ares wu te akan pes ma a gye̱se̱m. A te akan ne a nar kuri ku kusu ares akak tana kyem kaye̱e̱r kazatse na.

⁴ Iyong Iliya be aMusa ti wuruk nasho̱o̱n ba azong, a ta se be fe̱ kanu be aYeso.

⁵ Ne aBitrus fe̱ be aYeso ye, “Aner kubo̱so̱p, i se gye̱r i ta se yir aze. Won yir ta nye yir abur ataar. Kuzining nye kufuan, ne kuzining nye kufe aMusa, kuzining kufe Iliya.”

⁶ A ren ike̱ng iya a tana fe̱ baꞌ, inyim tú ro̱ ba dide̱ng.

⁷ Iyong kune̱n kukak wuruk ku tú ku kis ba ne á fok kuto̱ kukak kaye̱e̱r kune̱n'e ye, “Ayu ne a nye igon'i kaya mi ta shim. Ku fok yin kuto.”

⁸ Zizirik á kirik ne á ye̱re̱k, amma á ba di aner akak ze̱e̱r be aYeso baꞌ.

⁹ Nizen ba ta sen tiik rifan ame, yong aYeso fe̱ be ba be agbang kuto̱ ye, sang á tu tak akak ike̱ng iya ba tá di baꞌ, ma izen iya Igon Anerawe dorok nure̱k.

¹⁰ Á won rife̱'me kaye̱e̱r aye̱ ba, ne á tsang a naka risim ye ko akye̱ ne aYeso nife̱ natoon “kudorok ikom'e”.

¹¹ Ni igang'e ne á rip aYeso ye, “Akye̱ sak áner kubo̱so̱p itsi tá fe̱ ye, Iliya ne a tà be̱ nizham aKiristi ta ra be̱ e̱?”

¹² Ne aYeso fe̱ be ba ye, “Katsak'e, Iliya ne a ta san kube̱ ni ime̱se̱ng'e nong a ta sak ike̱re̱ cei tu ku bun kyo̱ndi i ta se nizham, akye̱ sak a ta zibir ye Igon Anerawe ta so̱ iriri risam dide̱ng dim ne anerawe ku rawu e̱?

¹³ Amma won ta tak yin ye, Iliya m be̱. A tu nye ike̱re̱ ife ba ta shim cei kyo̱ndi a ta zibir natoon wu.”

aYeso sak igon kakak ka ta be amaan kabik te katser

¹⁴ Nizen iya ba ta be̱ nufe ribir álimazhiri'me, á di rigwo̱m ánerawe whe̱re̱ ta mu ku gorok ba ne áner kubo̱so̱p Itsi ákak sen ya nanaan be ba.

¹⁵ Kum nizen ánerawe'me cei ta di aYeso azhing ta yiir ba dide̱ng ne á teng nong a ta su ku nye ashou.

¹⁶ aYeso tu rip ba ye, “Natoon akye̱ ne yin sen ne nye yin nanaan be ba e̱?”

¹⁷ Aner akak kaye̱e̱r rigwo̱m ánerawe ame fe̱ ye, “Aner kubo̱so̱p, Mi m be̱ nufuan be igon'i, kaya ka ta be amaan kabik. Amaan kabik'e tu te̱ne̱ng kufe̱ kanu.

¹⁸ Nizen iya ne i tu dorok, i tu barak kaben ne a turung ace̱ nanu ne ya anyi ne ikap wu te tso̱ng. Mi rip álimazhiri Wan ye, á ru ku tun amaan kabik'e, amma á kyem a tun baꞌ.”

¹⁹ Ayong aYeso fe̱ ye, “Kaꞌ. Yin ánerawe izam na, i ta won dar i no̱o̱k yin katsak, mi ta sor ma ane̱ nong tana ka tsesek be yin e̱? Be̱e̱n yin igon'e aze.”

²⁰ Ayong á tu be̱e̱n igon'e. Nizen amaan kabik ame ta di aYeso, a wor a sak ikap igon ame kpaan tiim. Ne igon'e kpa kaben a biring be ace̱ fuk fuk nanu wu.

²¹ aYeso rip atek igon'e ye, “Kum na akye̱ izen ne a se na e̱?” Atek'e fe̱ ye, “Kum ne a ruresek hiir.

²² In me̱ ne i ku barak nuro̱ng be nashi nong i tu ku fe̱r. Ke wan ta kyem i nye ike̱ng ikak ne, fok kuro̱ riye̱ yir nong tin se̱ mo yir.”

²³ Ayong aYeso tú ku rip ye, “Wan di ane̱, wan ta fe̱ ye, ‘Ke wan ta kyem e̱?’ Koakye ike̱ng nye ife kunye nufe aner aya a ta no̱o̱k katsak.”

²⁴ Zirik atek igon ame fe̱ ye, “Mi no̱o̱k katsak, ni se̱ mo be kudun no̱o̱k katsak'i.”

²⁵ Nizen aYeso ta di rigwo̱m ánerawe be naro̱'me zizirik. Ayong a tigba amaan kabik'e ye, “Wan kabik rigbato be rigbanu, mi fe̱ be wan be agbang kuto̱ ye, ‘Wuruk kaye̱e̱r wu, tu ba no̱ kaye̱e̱r wu gbak baꞌ.’ ”

²⁶ Amaan kabik'e ta kukun a tu barak ne tiim nong a ta wuruk. Ne igon'e te di kukom ma anerawe whe̱r fe̱ ye, “A ku.”

²⁷ Amma aYeso ko̱ro̱k igon'e kubo̱k nong a tu ku se̱ mo, a ta dorok a nyeseng tsik.

²⁸ Nizen aYeso ta no̱ kari, álimazhiri wu tu rip kyo̱o̱n ye, “Akye̱ sak yir kyem i tun yir amaan kabik'e baꞌ e̱?”

²⁹ Ne aYeso fe̱ be ba ye, “Ike̱re̱ kuri iyu na ta wuruk be aduwa tsek.”

aYeso bun a nye kuzarap natoon kuri riku wu

³⁰ A won karo̱ kayong nong á ta gor kaye̱e̱r iben aGalili. aYeso shim akak tu ren karo̱ ba tu kuse baꞌ,

³¹ kamok a sen bo̱so̱p álimazhiri wu'me. Ayong a fe̱ be ba ye, “A ta sok Igon Anerawe a ta re̱p ákak'e. A tu ku fe̱r, nama inom itaar a ta dorok.”

³² Amma ba kyem á ren ike̱ng iya rife̱'me tá sor baꞌ, ákak kyem á tu ku rip baꞌ, kamok inyim tu ku ro̱ ba.

Angan ne a nar yiik e̱?

³³ Nizen iya á tá be̱ na aKapanum, aYeso ta no̱ kaye̱e̱r kari, aYeso rip álimazhiri wu ye, “Yin se be ya yin nanan natoon akye̱ niren e̱?”

³⁴ Amma ba te gbik kamok ba sen ya nanan niren ye, angan ne a nye ayiik ne a nar e̱?

³⁵ Ayong aYeso sonong nong a ta yis álimazhiri wu kuso̱k be afa nong, a ta fe̱ be ba ye, “Ke akak shim a ta te afe ime̱se̱ng'e, ma a te afe igang'e dim, ne a sor asam a koangan.”

³⁶ aYeso sok igon kakak kahiir'e nong a tú ku sak a tá nyeseng natite ba. Ne a sok igon'e nubo̱k, ne a fe̱ be ba ye,

³⁷ “Koangan ne a shan igon kahiir'e kyo̱ndi kayu kaye̱e̱r riyerek'i, i nye ye a ti shan. Ne koangan afe a ti shan, i nye ye sang a ti shan tsek baꞌ, amma aya a tin tom.”

Aner a tin rayir baꞌ se mak be yir

³⁸ aYohana fe̱ be wu ye, “Aner kubo̱so̱p, yir di yir aner akak, a ta sen turung amaan nabik kaye̱e̱r riyerek wan yong yir fe̱ yir be wu ye a ra won kamok wu nye azining kaye̱e̱r yir baꞌ.”

³⁹ Amma aYeso fe̱ be ba ye, “Sang tu ku ro̱n yin'e baꞌ. Kamok aner akak kuse a tana nye ike̱ng azhing kaye̱e̱r riyerek'i ne a bun a fe̱ ike̱ng ikak imaan'e natoon mi baꞌ.

⁴⁰ Kamok aner aya a ta ka ra yin baꞌ, se mak be yin.

⁴¹ Katsak'e ne mi ta ka tak yin, aner aya ne a ta no̱o̱k yin ashi kuso̱ na ako̱p kaye̱e̱r riyerek'i ye, kamok yin nye yin anaan, a ta dun ishorong wu baꞌ.”

Ike̱ng i tana sak aner ta nye rine̱n

⁴² “Koangan ne a sak azining kaye̱e̱r inoon nazhizhe̱k'e na, naya na tin no̱o̱k katsak natoon'i, ta nye rine̱n. I ta nar ke a tu rosom kuta ako̱ nuto̱ nong a tu ku barak kaye̱e̱r agbang kudung.

⁴³ Ke kubo̱k wan ta sak wan ta nye rine̱n ne i te̱n. I ta ka nar ta no̱ kaye̱e̱r kasa kutser be kubo̱k kuzining be tana no̱ kaye̱e̱r kasa kuro̱ng be ibo̱k ifa. Naro̱ kuro̱ng'e ta ku nigaan'e baꞌ. [

⁴⁴ Azong azhizhi'me kus baꞌ, a ta kyem a riming kuro̱ng'e baꞌ.]

⁴⁵ Ke kutak wan ta sak wan ta nye rine̱n ne i te̱n. I ta ka nar ta no̱ kaye̱e̱r kasa kutser be kutak kuzining be tana no̱ kaye̱e̱r kasa kuro̱ng be atak wan afa. [

⁴⁶ Azhizhi'me ta kus baꞌ, a kyem a riming kuro̱ng azong baꞌ.]

⁴⁷ Ke rinyisi wan ta sak wan ta nye rine̱n, ne i tun. I ta ka nar tana no̱ kaye̱e̱r rigwo̱m Adakunom be rinyisi rizining be a tana ka barak kaye̱e̱r kuro̱ng be anyisi afa,

⁴⁸ naro̱ “ ‘azhizhi'me ta kus baꞌ, ne a kyem a riming kuro̱ng'e baꞌ.’

⁴⁹ “A ta gor be koangan kaye̱e̱r kuro̱ng nong a ta te zhe̱l.

⁵⁰ “Ito̱k nye ike̱ng itek, amma ke kurereng ito̱k'e gang, wan ta nye ane̱ nong i tà bun i rereng e̱? Sor yin kyo̱ndi ito̱k naye̱ yin, ne i sor yin caang be koangan.”