aMarkus 8 - Izere New Testament

aYeso no̱o̱k ánerawe izungu inaas naya

¹ Kaye̱e̱r inom iyong rigwo̱m ánerawe rikak na tusung. Á be ike̱ng ikak nong á ta ya baꞌ, yong aYeso yis alimazhiri wu nong a ta fe̱ be ba ye,

² “Mi fok kuro̱ riye̱ ánerawe na, án sor be mi inom itaar, amma á be ike̱ng ikak nong á ta ya baꞌ.

³ Ke Mi tu won ba nong á ta be kari be izong. A ta te gbe̱re̱k niren, kamok ákak nes gugo̱k.”

⁴ Alimazhiri wu fe̱ be wu ye, “Akye̱ ne yir ta se̱ yir naya aze katse na nong na tu ku kyem ba e̱?”

⁵ aYeso tú ku rip ba ye, “Agbang abiredi amang ne yin be yin e̱?” Ne ba fe̱ ye, “Kanataar.”

⁶ Ayong aYeso fe̱ be ánerawe ame ye á ra sosok kaben. Ne a sok ágbang abiredi kanataar ame, ne a tá tonong riye̱ rikan be Adakunom ne a te̱se̱ng nong a ta no̱o̱k alimazhiri wu, nong a ta kasap rigwo̱m ánerawe ame. Álimazhiri'me nye anong.

⁷ Ba be izos cie̱k gip. aYeso tonong riye̱ rikan wu be Adakunom ne bun a fe̱ be álimazhiri wu ye, á tu kasap ánerawe'me.

⁸ Ánerawe'me ya ma á whas. Nizen iya á tá gang kuya'me álimazhiri wu tusung íkpis'e. I tu ku tuk ma i shining iderse kanataar.

⁹ Atek kyo̱ndi izungu inaas ne a kuse azong. Ne a ku te ba niren.

¹⁰ Ne a no̱ nukpara ashi mak be alimazhiri wu nong a ta be niben aDamanuta.

Áner aFarisi fe̱ ye ba shim a ta di itomong azhing

¹¹ aFarisi akak be̱ nufe aYeso, nong a tu ku bo̱mo̱ng, yong á fe̱ be wu ye, a ra nye ike̱ng ikak ife azhing iya i tana tonong ye wu ne naza.

¹² aYeso ko̱ro̱k isong ne a fe̱ ye, “Akye̱ sak anerawe izam iyu tse̱r ku di ike̱re̱ azhing e̱? Katsak'e ne Mi ta tak yin, a ta ka nye yin ike̱ng azhing baꞌ.”

¹³ Ayong aYeso tu won ba. A ta no̱ kaye̱e̱r kukpara ashi ame nong a ta tar kunyi kukak.

Ayisti aFarisi ne afe aHiridus

¹⁴ Álimazhiri'me tiburum a kyem a be̱e̱n abiredi baꞌ, amma á be agbang'e azining kaye̱e̱r kukpara ashi'me.

¹⁵ aYeso tu ko̱ro̱k ba kuto ye, “Nye yin tatan be ayisti áner aFarisi ne aHiridus.”

¹⁶ A san kufe̱ be rice ba ye, “A fe̱ anong, kamok yir ta be yir abiredi baꞌ.”

¹⁷ aYeso tá ren ike̱ng ba ta sen ninye ibo̱ro̱ng natoon'e, yong a fe̱ be ba ye, “Akye̱ sak yin ta sen fe̱ yin natoon kudun abiredi e̱? Yin bun i di yin ka i ren yin aꞌa? Aye̱ yin rusek nurosom a?

¹⁸ Yin be yin anyisi amma i di yin aꞌa? I be yin ato, i fok yin aꞌa? Yin yiring aꞌa?

¹⁹ Nizen mi ta ku te̱se̱ng ágbang abiredi atoon ame kamok anerawe izungu itoon, iderse imang ne yin ku tusung yin e̱?” Alimazhiri'me fe̱ be aYeso ye, “Kuso̱k be afa.”

²⁰ “Be izen afe mi ta ku te̱se̱ng ágbang'e kanataar ame kamok anerawe izungu inaas, iderse imang ne yin ku tusung yin ribir e̱?” Ne á fe̱ be aYeso ye, “Kanataar.”

²¹ aYeso fe̱ be ba ye, “Yin ba ru ren yin aꞌa?”

aYeso sak akpato̱o̱n akak na aBatseda te atser

²² A be̱ na aBatseda, ne áner akak be̱ be akpato̱o̱n ne á nye aYeso akusuk ye, a ra ra aner'e nong a ta te atser.

²³ aYeso ko̱k kubo̱k aner ame nong a ta tseng'e nama kuwo̱p. A tin ta ace̱ nanyisi aner ame ne a ni sak ibo̱k natoon wu, ne a ku rip ye, “Wan di ike̱ng ikak aꞌa?”

²⁴ Akpato̱o̱n ame sok rice naza ne a fe̱ ye, “Mi di anerawe; amma a se di nakon sen tseng.”

²⁵ aYeso bun a ti sak kubo̱k wu natoon anyisi aner ame. Ayong anyisi aner ame karak ne a se̱ kudi karo̱, ne a di koakye gye̱r.

²⁶ aYeso tu sak a ta be kari ne a fe̱ be wu ye, “Sang tu tseng kaye̱e̱r kuwo̱p'e baꞌ.”

aBitrus fe̱ ye aYeso nye aKiristi

²⁷ aYeso be alimazhiri wu tseng ni iwo̱p izhizhe̱k'e nabas aKaisariya aFilipi. A tu rip ba niren ye, “Ánerawe fe̱ ye Mi nye angan e̱?”

²⁸ Iyong álimazhiri'me fe̱ ye, “Ákak fe̱ ye wan nye aYohana aner abatisma, ne ákak fe̱ ye wan nye Iliya, ne ákak bun á fe̱ ye wan nye akak kaye̱e̱r áner kuzarap Adakunom ágbugbang'e.”

²⁹ Ayong aYeso tú rip ba ye, “To̱, yin ne e̱? Yin di yin ye, mi nye angan e̱?” Ayong aBitrus fe̱ ye, “Wan ne i nye aKiristi.”

³⁰ aYeso tú kpam ba ye sang á tú tak akak ye wu nye angan'e baꞌ.

aYeso zarap kuri riku wu

³¹ Ayong aYeso san ku kubo̱so̱p ba'me ye, Igon Anerawe ta so̱ iriri risam, ne áko̱k kasho̱o̱n be ágbang átsi ne áner kubo̱so̱p Itsi ku rawu, a tu ku fe̱r, nama inom itaar a ta bun a dorok be kutser.

³² A fe̱ natoon iyu kanang yong aBitrus tu yis nukim nong a tu ku zhe̱e̱r.

³³ Amma aYeso kirik a tá ye̱re̱k álimazhiri'me, ne a zhe̱e̱r aBitrus ye, “Kam be mi, wan Ishetan, wan to̱ kyo̱ndi ánerawe sang kyo̱ndi Adakunom baꞌ.”

³⁴ Ayong aYeso yis rigwo̱m anerawe ame be alimazhiri wu nong a ta fe̱ ye, “Koangan afe a ta shim a tin kuus, a ra rawu rice wu nong a ta sok kukon a tana ku tigak mo nong a tin kuus.

³⁵ Koangan afe a ta shim a ta shesh kutser wu, a tin wei. Afe a tin wei nutser wu kamok mi be Rife̱ Ritek, a ta shesh kutser wu.

³⁶ Akye̱ kuri ike̱ng itek ne anerawe ta se̱, ke a se̱ kazatse na cei, amma ne a rin wei nutser wu e̱?

³⁷ Ka akye̱ ne anerawe ta no̱o̱k nong a tin shishing be kutser wu e̱?

³⁸ Koangan afe a ta fok isum mi be rife̱ mi, nizen iyu ife sang a ta be katsak baꞌ, be kunye rine̱n dide̱ng, Igon Anerawe ta fok isum wu nizen iya a tana be̱ kaye̱e̱r kuyiik Ada wu ne kufe ámaleka Azhe̱l'e.”