aMarkus 4 - Izere New Testament

Kumaas be aner ikap

¹ aYeso bun a san ku bo̱so̱p ánerawe nukim agbang kudung aGalili. Ánerawe aya a tú ku gorok mak whe̱re̱ ma ayeso'me no̱ kaye̱e̱r kukpara ashi nong a ta sonong kaye̱e̱r'e. Kukpara ashi'me se nukim kudung'e, ne ánerawe'me cice̱r na tusung bubarak azong.

² Ayong a tú ku bo̱so̱p ba ike̱re̱ whe̱re̱ be ku ninye kumaas, kaye̱e̱r kubo̱so̱p'e, a fe̱ be ánerawe'me ye,

³ “Wesek yin kuto! Aner ikap akak be ni nas izha naya.

⁴ Nizen iya a tá se be kunas'e, íca'me ikak kpas ni iren ne nanon tang.

⁵ Ica'me ikak kpas nifang agudong naro̱ ka tá be iben dide̱ng baꞌ. I tang zizirik kamok iben'e tuse dide̱ng baꞌ.

⁶ Kunom ta fa tar ne ato'me wor a koor kamok atsip'e se̱ iben baꞌ.

⁷ Íkak kpas kaye̱e̱r ikiritsan, ne ikiritsan'e rasak mak be ba, ne i ku te̱ne̱ng ba, ne i te íca itek baꞌ.

⁸ Ne íca'me íkak kpas niben itek, ne i rasak ne i te itek dide̱ng, ikak kuso̱k inyak ne ikak te ace iso̱k igataar ne ikak te iso̱k itaar ne i nar ike̱ng iya a ta nas.”

⁹ Ayong aYeso fe̱ ye, “Aner afe a ta be ato kufok a ra fok.”

¹⁰ Nizen aYeso tá se be álimazhiri wu kuso̱k be afa'me awan ba, ne ákak áfe a tá se azong, tú rip ike̱ng ife kumaas'e tá sor.

¹¹ Ayong aYeso fe̱ be ba ye, “A ma ka no̱o̱k yin kukyem kuren ike̱re̱ rigwo̱m Adakunom i ta se nune̱re̱ng, amma ba áfe a ta se nufang, koakye ma be kumaas,

¹² nong a ta shining rife̱ Ishaya, a tá fe̱ ye, “ ‘Á tà yiir iye̱re̱k'e amma á ta ren baꞌ, ne á yiir ifoos'e amma á ta ren ike̱ng'e baꞌ, Ke anong baꞌ, á ta shishing kuse ba nong a tù ku re̱ng ba rine̱n ba.’ ”

aYeso tú tak ba ike̱ng ife kumaas'e tá sor

¹³ Ayong aYeso fe̱ be ba ye, “Aser, yin ren yin ike̱ng iya kumaas'ong tin fe̱ a? To̱, ane̱ ne yin ta ren yin ribir kumaas kuya mi tana nye e̱?

¹⁴ Aner ikap'e se kyo̱ndi aner a ta nas rife̱ Adakunom.

¹⁵ Íca'me íya i tá kpas niren se kyo̱ndi áner aya a ta fok rife̱ Adakunom. Amma kum ke á fok, ne Ishetan be̱ ne i kok rife̱'me kaye̱e̱r aye̱ ba.

¹⁶ Anong ne íca'me íya i ta kpas nifang agudong, se kyo̱ndi ánerawe aya a tá fok rife̱'me ne á shan be aye̱ akan,

¹⁷ amma rife̱'me kpa agap naye̱ ba baꞌ, a sor dide̱ng baꞌ. Ke izen iya ne kudaam ka kutabak be̱ kamok rife̱'me ne a wor a kpa.

¹⁸ Íca'me iya i ta kpas kaye̱e̱r ikiritsan se kyo̱ndi áner aya á ta fok rife̱ Adakunom,

¹⁹ amma ke kudaam kazatse be kushim kurum, ne kushim ike̱re̱ ikak be̱ ne i te̱ne̱ng rife̱'me kurasak kaye̱e̱r wu ma a beseng.

²⁰ Amma íca'me iya i tá kpas niben itek se kyo̱ndi áner aya a tá fok rife̱'me, ne á shan, ne á te ike̱ng itek dide̱ng, ikak tes iso̱k itaar, ikak iso̱k igataar, ikak kuso̱k inyak ma i nar ike̱ng iya a tá tuus.”

Kumaas be apitila

²¹ aYeso tú rip ba ye, “Yin be̱e̱s yin be apitila ne i sak yin na agarang, ka ne i sak yin ribong agadu e̱? Sang yin sak yin natoon ike̱ng ikak garang aꞌa?

²² Koakye i ta se nune̱re̱ng a ta te̱s, koakye ne a tá ne̱r nye ife a tana tu kanang.

²³ Koangan afe a ta be ato kufok a ra fok.”

²⁴ aYeso bun a fe̱ be ba ye, “Sak yin riye̱ be ike̱ng ife yin tá fok yin. Kuri kures kufe wan tin maas akak'e, kuri kuyong ne a ta ka maas ko'me, ma i ta nar anong.

²⁵ Aner aya a ta be ike̱ng iya a tu ku barang mo. Aner aya a be baꞌ, ike̱ng iya wu ta be cie̱k'ong a tin shan ni wu.”

Kumaas be ike̱ng iya i ta tang kaye̱e̱r riko̱

²⁶ aYeso bun a fe̱ ye, “Rigwo̱m Adakunom ta se kyo̱ndi anerawe tá nas naya riko̱ wu.

²⁷ Nama inom cie̱k, ne naya'me tang ne na rasak, wu ren ka akye̱ ne i sak i ta te anong baꞌ.

²⁸ Iben be rice wu ne i sak naya ta te, ni ime̱se̱ng'e ne i tang, ne i tun ace ne i kpa ica makong.

²⁹ Kum ke naya'me te, ne aner'e san kute̱m'e, kamok izen ishamang n nye.”

Kumaas be ica amusta

³⁰ aYeso bun a fe̱ gbak ye, “Be akye̱ ne yir tin maas yir be rigwo̱m Adakunom e̱? Ka yir ta maas yir ane̱ e̱?

³¹ Ri se kyo̱ndi ica kakon a ta yis ye, amusta i ta nye i hiir'e kaye̱e̱r ica nakon kazatse na a ta tuus

³² Gip be anong ke a tuus ne i rasak ne i te igbang'e ne i nar ribir nakon a tá tuus be ágbang íwhang, ma nanon ni sosok kaye̱e̱r nawu'me.”

³³ Be iriri kumaas kyo̱ndi iyong, ne aYeso tú taas mo ba rife̱ Adakunom te̱re̱ be kuren ike̱ng ba tá be.

³⁴ A fe̱ ike̱ng ikak be ba dar ku ninye kumaas baꞌ. Amma ke a se be álimazhiri wu, ne a ku taas ba koakye kanang.

aYeso tigba kuwun

³⁵ Katuk'e yong, kawheshirim tá fa nye, aYeso fe̱ be álimazhiri wu ye, “I tar yir kunyi kukya.”

³⁶ Ayong á won rigwo̱m ánerawe'me, ne á ku sok nong á tá tseng kaye̱e̱r kukpara ashi ba tin se kaye̱e̱r'e. Akpara ashi ákak tuse azong gip.

³⁷ Kuwun kukak be agap dorok, ma ashi tang agung ne a no̱o̱s kaye̱e̱r kukpara'me. Ashi tá no̱o̱s kaye̱e̱r kukpara'me ma ku be̱ barak ku tá kushining be ashi.

³⁸ aYeso se be ida ako̱o̱n wu kaye̱e̱r kukpara ashi'me nama. Iyong álimazhiri wu su ku shiming nong á tá fe̱ be wu ye, “Aner Kubo̱so̱p, wan daam ka yir sen wei yir aꞌa?”

³⁹ Ayong aYeso dorok nong a tá tigba kuwun'e ne a fe̱ be agung ashi ame ye, “Nyeseng kyo̱o̱n” ne kuwun'e nyeseng ne karo̱ te win.

⁴⁰ Ne a fe̱ be álimazhiri wu ye, “Akye̱ sak yin fok yin inyim anong e̱? Yin n no̱o̱k yin katsak gum aꞌa?”

⁴¹ Amma inyim tú ro̱ ba dide̱ng ma á san ku naka risim ye, “Angan na e̱? Kuwun be ashi gip tu ku fok e̱!”