aMarkus 15 - Izere New Testament

aYeso nasho̱o̱n aBilatus

¹ Nadiding bop, agbang átsi ne ásho̱n be áfe kubo̱so̱p Itsi ne áfekasa rigwo̱m cice̱r ti sak ye, á ra rosom aYeso, nong á ta se no̱o̱k aBilatus.

² aBilatus tú ku rip ye, “Wan ne i nye agwo̱m áner aYahuda a?” Ayong aYeso fe̱ be wu ye, “Ei, i se kyo̱ndi wan ta fe̱.”

³ Ayong ágbang atsi ame ti bo̱s naborok natoon wu dide̱ng.

⁴ aBilatus bun a tú ku rip ye, “Wan fok ike̱re̱ á ta fe̱ natoon wan, wan tin sak aꞌa?”

⁵ Amma aYeso tú ku sak ko'me, ma aBilatus te zhing.

⁶ I sor igo̱o̱n, nizen aPasova, agwo̱mna tana tun aner akak aya a ta se nitso̱m aya ánerawe ta shim, ye a ra tun.

⁷ Aner akak a tú ku yis ye, aBarabas se nitso̱m'e be ákak áya a tá ko̱n be rigwo̱m iben nizen kuren'e ma á fe̱s ánerawe.

⁸ Ayong ánerawe'me be̱ nufe aBilatus nong á tá fe̱ be wu ye a ra ka nye ba ike̱ng iya wu tan me̱ ne a ku nye ba'me.

⁹ aBilatus tú rip ba ye, “Yin shim yin mi ta ka tun yin agwo̱m áner aYahuda a?”

¹⁰ aBilatus tá ren ye, kamok rishishim ne ágbang átsi'me ti no̱o̱k aYeso.

¹¹ Amma ágbang átsi'me tees ánerawe'me ye, á ra fe̱ be aBilatus ye a ra ka tun ba aBarabas ingya.

¹² Ayong aBilatus tú ku rip ba ye, “To̱, yin shim yin ye mi ra nye ane̱ be aner yin tú ku yis yin ye, ‘Agwo̱m áner aYahuda a?’ ”

¹³ Ayong á tá kuto̱ ye, “A ku tigak!”

¹⁴ Ayong aBilatus tú ku rip ba ye, “Kamok akye̱? A nye rine̱n akye̱ e̱?” Amma á ti barang ku tasak be agap ye, “A ku tigak.”

¹⁵ aBilatus tá shim nong á ta kare̱p ánerawe'me riye̱, yong a tú ku won ba aBarabas. Nama a tá sak a ta whereng aYeso ne ku no̱o̱k ba nong á tá su ku tigak.

áSozha nye kye̱re̱ be aYeso

¹⁶ áSozha ame tseng be aYeso kaye̱e̱r agbang azuri agwo̱mna'me, kuya a tá yis ye “aPireyum.” Á tin tusung rigwo̱m ásozha natoon wu cice̱r.

¹⁷ Ne á kute kukpiin kukak kuso̱p kuseng kuri kufe ágwo̱m ne a karam ikiritsan nong a tú ku te'me rice kyo̱ndi ribong rigwo̱m.

¹⁸ Ne á san i ku nye ashou ye, “Kunom ra be rigwo̱m, agwo̱m áner aYahuda!”

¹⁹ Ne á yiir ku tsosok rice be ishe̱n ne á ku tang ace̱ ne á nye gbok akuur kaben ye ba sen i ku ya iben.

²⁰ Á tá fa gang ku kukok ko'me ne á ma tun kukpiin kuseng ame nong á tá bun á ku te ares wu. Á tá ma tseng be wu nong á tá su ku tigak.

A tigak aYeso

²¹ Á tá se be kutseng ne a nyim be aner aSirin akak, a tú ku yis ye aSiman, atek Alekzanda ne aRufus, a ta ne nutseng wu, ne ásozha ame ku sak ye, ma a ra cer kakon a tanin tigak aYeso ame.

²² Á tseng be aYeso'me naro̱ a tá yis ye, “aGolgota,” ka ta sor, karo̱ áho̱karo̱k ace.

²³ Ne á no̱o̱k aYeso'me ashi anap akak aya a tin kare̱ be amuur, amma aYeso gaar kuso̱'me.

²⁴ Ayong á tú tigak. Á kasap ares wu be ku nibarak ica ikiriwhe̱r nong á ta di ike̱ng iya koangan tana se̱.

²⁵ Nabas itso̱m katonbo̱k ife kadiding ne á tú ku tigak.

²⁶ Natoon kukon'e a tin zibir kuri amok aya a tú ku te̱n'e ye; “AGWO̱M ÁNER aYAHUDA.”

²⁷ A tigak ágbang ákpatang ákak afa mak be wu, azining nabas kubo̱k riya ne akak nabas kubo̱k rimen wu.

²⁸ Be anong ne rife̱ Adakunom riya ri tá fe̱ ye, “A tú ku fa mak be amaan aner,” shining.

²⁹ Áner aya a tá gosok niren'e, tú ku kas ne á zim rice ne á fe̱ ye, “Ahap! Wan aya ayu i tana yirik agbang kutu kuya Adakunom iben ne i bun no̱k kaye̱e̱r inom itaar,

³⁰ ko̱, tiik kaben nong ta shesh rice wan!”

³¹ Anong ne ágbang átsi be áfe kubo̱so̱p Itsi gip tú ku kok ko'me ne á fe̱ ye, “A shesh ákak, amma ko a kyem a shesh rice wu baꞌ!

³² Won aKiristi na, ye wan nye Agwo̱m Isarela, tiik kaben kyo̱o̱rna nong yir ta di yir nong tin no̱o̱k yir katsak!” Ágbang ákpatang áya a tú ku tigak ba mak be wu ame, tú ku kok ko'me gip.

Riku aYeso

³³ Nabas itso̱m kuso̱k be afa nunom, awhi whe̱e̱n kazatse cei ma nitso̱m itaar nawheshirim.

³⁴ Nabas itso̱m itaar'e, aYeso tá kuto̱ be agap ye, “Eloi, Eloi lama sabatani,” i ta sor, “Adakunom mi, Adakunom mi, akye̱ sak wan ti won ana e̱?”

³⁵ Áner ákak aya a tá se nyeseng azong tá fa fok anong yong á fe̱ ye, “Fok yin a ta yis Iliya.”

³⁶ Ayong azining kaye̱e̱r ba teng nong a ta se shumung asoso kaye̱e̱r ashi anap aya a tan te kpukpak, a tubuk nukon nong a tá ma nabak aYeso'me ye a ra so̱, ne a fe̱ ye, “Ku won yin tsek. Won ta di yir ka Iliya'me ta be̱ nong a tu ku tiik e̱.”

³⁷ Ayong aYeso ta kuto̱ dide̱ng naza ne a ko̱ro̱k isong wu ife igang'e.

³⁸ Alaple aya a ta se kaye̱e̱r agbang kutu iya Adakunom iben ame wor a sarak natite kpak ma kaben'e.

³⁹ Nizen ako̱k kasho̱o̱n ásozha aya a ta se azong nyeseng a ta di riku'me, yong a fe̱ ye, “Katsak'e, aner na nye Igon Adakunom.”

⁴⁰ Ányining akak sor tsik ne a ye̱re̱k, kaye̱e̱r ba nye aMarya abafe aMagadaliya be aMarya anyining aYakub awusong'e be aYusufu ne aSalomi,

⁴¹ Kum na aGalili ne ányining na tsang á kuus aYeso ne á ni sak riye̱ ni wu. Ányining akak whe̱r a tá be̱ mak be wu na aUshalima se azong gip.

Kune̱r aYeso

⁴² Kawheshirim tá fa nye ne a san kunye kanye̱k kamok kaya katson'e nye Kunom Asabar.

⁴³ Ayong aner Arimatiya akak a tú ku yis ye, aYusufu. Wu ne a nye akak kaye̱e̱r áya a tá nye itomong be agwo̱m, a be kuyiik dide̱ng, ne a shim kube̱ rigwo̱m Adakunom. A ros riye̱ nong a tá tseng nufe aBilatus, ye a ru ku no̱o̱k kukom aYeso.

⁴⁴ aBilatus fok azhing nizen a tá fok ye, aYeso n ku. Ayong a tom nufe ako̱k kasho̱o̱n ásozha ame ye a ra ku rip ka aYeso kuse be katsak e̱?

⁴⁵ Nizen iya a tá fok nufe ako̱k kasho̱o̱n ásozha'me ye i se anong, yong a no̱o̱k aYusufu kukom aYeso'me.

⁴⁶ Ayong aYusufu ame se shan kures kukan ne a se tiik be kukom aYeso'me ne a kunung be kures kukan ame nong a tá se ne̱r kaye̱e̱r kure̱k kukak a tá rum nifang agudong. A ti tomong agbang kuta nanu kure̱k'e.

⁴⁷ aMarya abafe aMagadaliya be aMarya anyining aYusufu di karo̱ á tú ku ne̱r aYeso'me.