aMarkus 13 - Izere New Testament

aYeso fe̱ ike̱ng i tana se̱ kutu kuya Adakunom iben

¹ aYeso ta se be kuwuruk kaye̱e̱r agbang kutu kuya Adakunom iben, azining kaye̱e̱r álimazhiri wu akak fe̱ be wu ye, “Aner Kubo̱so̱p, di, kuri ata azhing na be kuri rino̱k na.”

² Ayong aYeso fe̱ be wu ye, “Wan di kuri rino̱k na wa? A tà won kuzining natoon kufudang baꞌ. A ta yirik cei.”

Risam ime̱se̱ng'e

³ Nizen iya aYeso ta se nusonong natoon Kawhanang kata be nafar bubarak be agbang kutu kuya Adakunom iben yong aBitrus be aYakub ne aYohana ne Adarawus, tú ku rip kyo̱o̱n ye,

⁴ “Ni tak yir, nizing ne a ta nye ike̱re̱'ong e̱? Ka akye̱ ne yir tà di yir nong tà ren yir ye izen'e m be̱ barak e̱?”

⁵ Ayong aYeso fe̱ be ba ye, “Sak yin riye̱, fan akak ba ka wo̱ro̱k yin.

⁶ Ánerawe whe̱re̱ tà be̱s kaye̱e̱r riyerek'i ne á fe̱ ye ba ne á nye mi, ne á wo̱ro̱k anerawe whe̱re̱.

⁷ Ke yin fok yin itak itsom ka riwo̱ng'e ayi, sang tu te yin febek baꞌ. Ma ike̱re̱ kuri iyong nye, nizham igang'e ta ra nye.

⁸ Iben ze̱r ze̱r tà ko̱n be ifudang ne rigwo̱m dorok natoon rigwo̱m. Ne kaben zu ninaro̱ ze̱r ze̱r ne a nye izong dide̱ng. Iyong ne i nye ime̱se̱ng risam'me.

⁹ “Sak yin riye̱ be rice yin, á tà ka yising yin ne á tsees be yin ninaro̱ amok ne á ka tsosok yin natu aduwa. A ta tseng be yin nufe ágwomna ne ágwo̱m, kamok mi nong ta se̱ yin iren tú ku taas yin ba Rife̱ Ritek natoon'i.

¹⁰ Amma ni ime̱se̱ng'e, a ta taas ánerawe Rife̱ Ritek cice̱r ma koakye irem fok nizham.

¹¹ Izen iya ne á ta yising yin nong á ta tseng be yin naro̱ amok, sang tu yin daam yin be ike̱ng iya yin tana fe̱ yin baꞌ. Fe̱ yin ike̱ng iya i ta ka be̱ yin nizen iyong, kamok sang yin ne i fe̱ yin kanu baꞌ, amma Kabik Kazhe̱l'e.

¹² “Aronyining tà sok aronyining wu nong a tà no̱o̱k a tà fe̱r, atek inoon tà sok inoon ba nong á tà no̱o̱k. Inoon tà shonong átek ba'me, ma a tà ka fe̱s ba.

¹³ Ánerawe cice̱r tà ka ranyin kamok mi. Amma aner aya ne a nyeseng ma nigang'e, a ta se̱ kashesh.

Amaan risam

¹⁴ “Izen iya ne yin di yin amaan itsi iya i ta be̱e̱n kubeseng, i ta se naro̱ kakak ka ta se gye̱r baꞌ (afe ifa'me ra ren ike̱ng iya rife̱ na ta sor) won afe a ta se niben aYahuda ra teng á ta be rifan.

¹⁵ Aner aya a ta se natoon kutu tu tiik kaben ye nong a ta no̱ nutu a ta tun ike̱ng kakak baꞌ.

¹⁶ Aner aya a ta se riko̱ tu ku bun kari, ye nong a ta se kok ares wu baꞌ.

¹⁷ I ta sor ike̱ng kuro̱ riye̱ be áfe a tana se be nafa ne áya a ta sen ngasa inoon nizen iyong.

¹⁸ Nye yin aduwa nong a tu nye ike̱ng na nizen kuwun baꞌ.

¹⁹ Nizen iyong ne a ta nye amaan risam kuri rikak, kuri riya sang a tá kun nye nazatse na baꞌ, kum nizen Adakunom ta nye kazatse, ma kyo̱o̱rna. A ta baꞌ, bun a nye kuri'me baꞌ, ma izen izen.

²⁰ Ke a fa nye ye, kamok Agwo̱m Ágwo̱m ta te̱e̱k inom'e baꞌ, ko ke aner akak gaar baꞌ. Amma kamok áya wu tá tsang a kasa ne wu te̱e̱k inom'e.

²¹ Nizen iyong koangan ne a fe̱ be yin ye, ‘Di yin, aKiristi'me na! Ka, aya aza'me!’ Sang tin no̱o̱k yin katsak baꞌ.

²² Kamok ákiristi abo̱o̱s, ne áner kuzarap afe abo̱o̱s tà wuruk á ta nye ike̱re̱ azhing ne itomong azhing nong a ta wo̱k aya Adakunom tan kasa, ke a fa nye ba ta kyem a nye anong.

²³ To̱, sak yin riye̱, mi ma ka tak yin koakye nakuruk.

Kube̱ Igon anerawe kufe afa

²⁴ “Amma nizen iyong, nama amaan risam'ong, “ ‘Kunom tà te whi ne kufe̱n ba kare̱p baꞌ.

²⁵ Ne ádar nes naza ne á kpas, ne agbang ike̱re̱ i ta se naza zuur cice̱r.’

²⁶ “Nizen iyong ne ánerawe tà di Igon Anerawe ta saase kaye̱e̱r ane̱n be kukyem dide̱ng ne kuyiik.

²⁷ A tà tom ámaleka wu nong a tà tusung áya wu tan kasa kaye̱e̱r ikes kazatse inaas. A ta san ne kaye̱e̱r kazatse ma kaye̱e̱r kaza.

Itak natoon ritin atafo

²⁸ “Ye̱re̱k yin ritin atafo na, izen iya ne ato'me suruk, ke i san kufunung to̱, ren yin ye kushik n nye.

²⁹ Anong ne i ta se gip ke yin di yin a sen kunye ike̱re̱ na, to̱ ne iren yin ye izen'e m be̱ bubarak, a se nanukutu dim.

³⁰ Mi ta tak yin katsak'e, anerawe izam na ta kus baꞌ, ma ike̱re̱ na gor nizham.

³¹ Kaza be kaben ta gor amma rife̱ mi sen gor ze̱r baꞌ.

Akak ren izen'e ka kunom'me baꞌ

³² “Amma akak ren kunom'e ka izen'e dim baꞌ, ko ámaleka a ta se natoon kaza ka Igon'e gip, ma ke Ada'me wu ze̱r tsek ne a ren.

³³ Sak yin riye̱ ne i nye yin kanye̱k kamok sang yin tá ren yin izen iya a tana be̱ baꞌ.

³⁴ I se kyo̱ndi atekasa ta won kasa wu nong wu a ta be nutseng ne a won kasa'me nubo̱k ásam wu, ne a no̱o̱k ásam ame koangan be ike̱ng iya a tana nye. Ne a fe̱ be áner kutor kasa'me ye á ra sor ne á ye̱re̱k kasa'me ne á tor kube̱ wu.

³⁵ “Kamok anong, sak yin riye̱ kamok sang yin ren yin izen atekasa'me tana bun a be̱ baꞌ, ka shim i ta se nawheshirim ka natite katuk ka nusetson ka nadiding ayi.

³⁶ Fan a bu be̱ a ta ka se̱ yin nida.

³⁷ Ike̱ng iya mi ta fe̱ be yin, mi fe̱ be koangan gip ye, i ra sak yin riye̱!”