aMarkus 10 - Izere New Testament

Ike̱ng aYeso ta fe̱ natoon kam kuwe̱ne̱ng

¹ Ayong aYeso won karo̱ kayong nong a tá be niben aYahuda, ne a tar isho̱ng aUrdun. Rigwo̱m ánerawe be̱s nufu gbak ne a bun ku bo̱so̱p ba'me kyo̱ndi a tan me̱ ne a nye.

² Ayong áner aFarisi ákak be̱ nufu nong á tú ku bo̱mo̱ng, á tú ku rip ye, “I nye rine̱n anerawe ta kam be abining wu a?”

³ Ayong aYeso fe̱ be ba ye; “Akye̱ ne aMusa fe̱ be yin e̱?”

⁴ Ayong á fe̱ be aYeso ye, “aMusa no̱ anerawe iren kuno̱o̱k kufumung kukam kuwe̱ne̱ng ne a ku te niren.”

⁵ Ne aYeso fe̱ be ba ye; “Kamok kushonong yin, ne aMusa ta no̱o̱k yin iren anong.

⁶ Amma kum ni ime̱se̱ng, ‘Adakunom nye aner amitek be aner abining.’

⁷ Kamok anong, anerawe ta won atek wu be anyining wu nong a tin gung be abining wu,

⁸ ba ba afa'ong tá te kuro̱m kuzining ne á sor kyo̱ndi aner azining. Á tà ba se kyo̱ndi áner afa baba baꞌ, amma kyo̱ndi aner azining.

⁹ Kamok anong, ike̱ng iya Adakunom tá gung, akak tu kam baꞌ.”

¹⁰ Nizen iya á tú ku bun kari gbak, yong álimazhiri'me rip aYeso itak'e.

¹¹ Ayong aYeso fe̱ be ye, “Koangan ne a kam be abining wu nong a ta sok akak, i nye ye a nye rikuna be abining wu tá sok'ong.

¹² Anong ne ke abining kuwe̱ne̱ng kam be amitek wu nong a tá sok akak, i nye ye a nye rikuna be amitek ayong'e.”

aYeso be inoon nazhizhe̱k'e

¹³ Ánerawe yiir be̱s be inoon nazhizhe̱k'e nufe aYeso nong a tu ku nye ba aduwa, amma álimazhiri wu zhe̱e̱r ánerawe'me.

¹⁴ aYeso tá fa di anong, yong a nye riye̱ riwe, a fe̱ be álimazhiri'me ye, “Won yin inoon nazhizhe̱k'e tu be̱s nunaan, sang tu ku roon yin ba kube̱ baꞌ, kamok rigwo̱m Adakunom nye rife̱ áner kuri áyuna.

¹⁵ Katsak ne mi ta ka tak yin, koangan ne a shan rigwo̱m Adakunom kyo̱ndi igon kahiir'e baꞌ, a ta kyem a no̱ kaye̱e̱r rigwo̱m Adakunom baꞌ.”

¹⁶ Ayong a kok inoon'e azizirik nong a tú ku te kuce̱.

Acam akak a tá nye arum'e

¹⁷ aYeso tá se be kutseng kutsang wu, yong aner akak tsang a teng nong a tá be̱ a tigbok akuur nasho̱o̱n wu nong a tá fe̱ be aYeso'me ye, “Aner Kubo̱so̱p atek, akye̱ ne mi ta nye nong ta se̱ kutser kufe izen izen e̱?”

¹⁸ Ne aYeso fe̱ be wu ye, “Akye̱ sak wan tin yis ye aner atek e̱? Akak kuse a ta nye atek ze̱e̱r be Adakunom baꞌ.

¹⁹ Wan ren ike̱ng iya Itsi tá fe̱ ye a ra nye, ‘Sang tu nye rikuna baꞌ. Sang tu fe̱r akak baꞌ. Sang tu nye itsang baꞌ. Sang tin bo̱ naborok nakak baꞌ. Sang tu mok akak baꞌ. Tiyiik ada be ango̱ wan.’ ”

²⁰ Ayong acam ame fe̱ be aYeso ye, “Aner Kubo̱so̱p, mi kuus ike̱re̱ na cei, kum ne mi ru nye igon.”

²¹ aYeso tu ye̱re̱k be kushim. Ayong a fe̱ be wu ye, “Wan ru raar nike̱ng izining tsek. Tseng ta se re̱e̱s koakye wan ta be, kasap áfe rizor itso̱m'e. Wan ta se̱ kurum naza nong ta be̱ tin kuus.”

²² Acam ame tá fa fok anong yong a roos kanyisi. A tú bun be riye̱ riwe, kamok wu tá nye arum dide̱ng.

²³ Ayong aYeso ye̱re̱k ánerawe ne a gorok'e, ne a fe̱ be álimazhiri wu ame ye, “I ta ro̱ dide̱ng arum ta no̱ kaye̱e̱r rigwo̱m Adakunom!”

²⁴ Álimazhiri'me te zhing be rife̱'me. Ayong aYeso bun a fe̱ be ba ye, “Inoon'e, i ta ro̱ dide̱ng anerawe tana no̱ kaye̱e̱r rigwo̱m Adakunom!

²⁵ I ta se we̱e̱r we̱e̱r arakumi tana gor ribong kufer be arum tana no̱ kaye̱e̱r rigwo̱m Adakunom.”

²⁶ Be kufok anong, álimazhiri'me ti barang kute zhing, yong á naka risim ye, “To̱, yong angan ne a ta se̱ kashesh'e makong e̱?”

²⁷ aYeso tá ye̱re̱k ba ne a fe̱ ye, “Be anerawe, iyu ta ro̱. Amma be Adakunom, i ta ro̱ baꞌ. Kamok Adakunom kyem a nye koakye ike̱ng.”

²⁸ Ayong aBitrus fe̱ be wu ye, “Di, yir n wosong yir koakye nong ta ka kuus yir.”

²⁹ aYeso fe̱ be ba ye, “Katsak ne mi ta ka tak yin, akak kun won kasa wu ka áronyining wu ka ángasnyining wu ka ango̱ wu ka ada wu inoon wu ne ako̱ wu kamok mi ne rife̱ mi,

³⁰ ike̱ng iya a tana se̱ nizen iyu, i ta nar anong kutak kuso̱k inyak whe̱r, be nasa, ne áronyining, ángasnyining, ángo̱, inoon, ako̱, amma mak be kutabak. Nama anong nasho̱o̱n kutser kufe izen izen.

³¹ Amma ánerawe whe̱r kaye̱e̱r áya a tá nye áfe ime̱se̱ng'e, á ta te áfe igang'e, ne áfe igang'e te áfe ime̱se̱ng'e.”

aYeso bun a nye kuzarap natoon kuri riku wu

³² Á tseng á ngarak ba á be na aUshalima, aYeso se nasho̱o̱n ba, álimazhiri wu tsang á ku kuus, an te zhing. Áner áya a tú ku kuus ba nama fok inyim. Ayong aYeso fok ko̱ro̱k kuso̱k be afa ame nukim nong a tú ku tak ba ike̱ng iya, i tana ku se̱.

³³ Ayong a fe̱ be ba ye, “Yir ngarak yir i be yir na aUshalima, a ta se no̱o̱k Igon Anerawe nubo̱k ágbang átsi be áner kubo̱so̱p Itsi. A tù ku to̱ amok riku, ne a ku won nubo̱k áner aya sang á ta aner aYahuda baꞌ.

³⁴ Á tu ku kok ko'me, ne á ku tang ace̱, ne á ku whereng ne á ku fe̱r. Nama inom itaar a ta bun dorok be kutser.”

aYakub be aYohana nye aYeso izong

³⁵ Ayong aYakub be aYohana inoon aZabedi be̱ nufe aYeso nong á tá fe̱ be wu ye, “Aner kubo̱so̱p, yir shim yir wan tin nye yir ike̱ng ikak.”

³⁶ aYeso tú ku rip ba ye, “Akye̱ ne yin shim yin mi ta ka nye yin e̱?”

³⁷ Ayong ba fe̱ ye, “Katuk wan tana no̱ kaye̱e̱r kuyiik wan, won akak yir tu sor nabas kubo̱k riya wan, ne akak sor nabas kubo̱k rimen wan.”

³⁸ Amma aYeso fe̱ be ba ye, “Yin ren yin ike̱ng iya yin ta rip yin baꞌ. Yin ta kyem i so̱ yin kaye̱e̱r ako̱p aya mi tanin so̱ a? Ka a ta ka nye yin abatisma kuri aya a tanin nye'me a?”

³⁹ Ayong ba fe̱ ye, “Yir ta kyem yir.” Ne aYeso fe̱ be ba ye; “Be kures mi tanin so̱ ne yin tin so̱ yin, ne a ka nye yin abatisma a tanin nye'me.

⁴⁰ Yin ta so̱ yin gye̱r, amma kusor nabas kubo̱k riya mi ka nabas kubo̱k rimen'i, i nye karo̱ mi tana no̱o̱k akak baꞌ. Naro̱ nayong nye nafe áya a ta nye kanye̱k'e kamok ba.”

⁴¹ Izen álimazhiri'me kuso̱k'ong ta fa fok itak'e, aye̱ ba beseng be aYakub ne aYohana.

⁴² aYeso tu yis ba naro̱ kazining a tá fe̱ be ba ye, “Yin ren yin a tu ku di ba kyo̱ndi áko̱k kasho̱o̱n áner aya a ta nye áner aYahuda baꞌ, ti nye rigwo̱m natoon ba ne ribir ako̱k kasho̱o̱n'e ti nye ni ba.

⁴³ I tu se anong be yin baꞌ, amma aya ne a shim a ta ti ayiik'e kaye̱e̱r yin to̱, a ta sor kyo̱ndi asam kaye̱e̱r yin ingya.

⁴⁴ Aner aya a ta shim a ta nar áfudang be kuyiik, i nye ye ma a te asam cice̱r,

⁴⁵ kamok Igon Anerawe be̱ nong a tu ku nye itomong baꞌ, amma nong a ta nye anerawe itomong, ne a no̱o̱k kutser wu nong a tin sheshek ánerawe whe̱re̱.”

aBatimawus, akpato̱o̱n se kudi karo̱

⁴⁶ Nizen iya a tá be̱ na aZheriko, aYeso be álimazhiri wu ne rigwo̱m anerawe whe̱r a ta se be kuwon kuwo̱p'e. A di akpato̱o̱n akak a tú ku yis ye, aBatimawus. A ta nye igon aTimawus, nusonong nukim iren, a se be kunye izong.

⁴⁷ Nizen iya a ta fok ye aYeso afu aNazaret'ong, yong a ta kuto̱ ye; “aYeso Igon aDauda ro̱ riye̱ mi!”

⁴⁸ Anerawe dide̱ng tu tigba ye, a ra sor gbik, amma a bun a ti barang kuyis be agap dide̱ng ye, “Igon aDauda ro̱ riye̱ mi!”

⁴⁹ Ayong aYeso nyeseng a tá fe̱ ye; “Ku yis yin.” Iyong, ba fe̱ be akpato̱o̱n ame ye, “Naka tsesek, dorok, a ta yis.”

⁵⁰ Ayong akpato̱o̱n ame barak kukpiin wu nong a tá furuk, ne a be nufe aYeso.

⁵¹ Ne aYeso ku rip ye, “Akye̱ ne wan shim mi ta ka nye'me e̱?” Akpato̱o̱n ame fe̱ ye; “Aner kubo̱so̱p, mi shim ta di karo̱.”

⁵² aYeso fe̱ be wu ye, “Tseng, kuno̱o̱k katsak wan sak wan te atser.” A wor a kpaan i di karo̱ ne a kuus aYeso. A tsang a tseng mak be aYeso.