aMarkus 1 - Izere New Testament

aYohana aner abatisma ne a nye iren

¹ Iyuna ne i nye ime̱se̱ng Rife̱ Ritek natoon aYeso Kiristi, Igon Adakunom'me.

² Kyo̱ndi a tá zibir kaye̱e̱r kufumung Ishaya, aner kuzarap ye: “Mi tà tom atom mi nasho̱o̱n wan, aya a tana ka nye iren,”

³ “Kuto̱ akak yis kaye̱e̱r katse ye, ‘Nye yin Agwo̱m Ágwo̱m iren, ku nye yin iren'e cop.’ ”

⁴ aYohana be̱ be kunye abatisma kaye̱e̱r katse, ne a fe̱ rife̱ natoon abatisma kushishing kuse nong a ta ku re̱ng ba rine̱n.

⁵ Ánerawe iben aYahuda ne áfe aUshalima wuruk cice̱r nong a tá be̱s nufu. Á taas rine̱n ba, ne a ku nye ba abatisma kaye̱e̱ isho̱ng aUrdun.

⁶ aYohana tes ares a tá nye be nakuyo̱ng arakumi, ne a rosom kudun kukpa nutin wu, ne a ya kubep be ashi ritong.

⁷ A fe̱ be ba ye, “Nama mi, aner akak, aya afe a tin nar be kukyem ta be̱, aya afe mi tana kyem i tiguum nong ta bis idun akpatak wu baꞌ.

⁸ Mi ta nye yin abatisma be ashi, amma wu tà ka nye yin abatisma be Kabik Kazhe̱l'e.”

A nye aYeso aBatisma

⁹ Nizen iyong aYeso dorok na aNazaret ni iben aGalili nong aYohana ta su ku nye abatisma ni isho̱ng aUrdun.

¹⁰ Kum be kuwuruk wu kaye̱e̱r ashi'me ne a di kaza nukarak ne Kabik Kazhe̱l'e kyo̱ndi abo̱p ti tiik ni wu.

¹¹ Ne kuto̱ ne naza ye, “Wan ne i nye Igon'i kaya mi ta shim. Mi fok kusas wan dide̱ng.”

Ishetan bo̱mo̱ng aYeso

¹² Nizen izining Kabik'e wor ka tseng be aYeso kaye̱e̱r katse,

¹³ a sor azong kuko̱s iso̱k inaas ne Ishetan yiir kubo̱so̱p. aYeso se be ámaan ikewum azong ne ámaleka ni sak riye̱ ni wu.

aYeso san itomong na aGalili

¹⁴ Nama a tá te aYohana ni itso̱m, aYeso no̱ kaye̱e̱r aGalili, ne a taas Rife̱ Ritek Adakunom,

¹⁵ ye, “Izen'e n nye, rigwo̱m Adakunom m be̱ bubarak. Shishing yin kuse yin ne i ni no̱o̱k yin katsak Rife̱ Ritek'e!”

aYeso yis áner anaas á tá se be kuyising izos

¹⁶ Nizen aYeso tá sen gor nukim agbang kudung aGalili, a di aSiman ne aronyining wu Adarawus. A sen te águnung ba kaye̱e̱r kudung'e, kamok ba nye aner kuyising izos.

¹⁷ Ne aYeso fe̱ be ba ye, “Be̱ yin, ni kuus yin. Mi ta ka sak yin ta te yin áya a tana yising ánerawe kyo̱ndi i ta yising yin izos.”

¹⁸ Zizirik á wor á won águnung ba ame, nong á tú ku kuus.

¹⁹ Nizen iya a tá ra kutseng cie̱k, ne aYeso di aYakub igon aZabedi, ne aronyining wu aYohana kaye̱e̱r kukpara ashi, á se be kunye kanye̱k águnung ba.

²⁰ Ne aYeso wor a tú yis ba ne won atek ba aZabedi ne áfe itomong itso̱m kaye̱e̱r kukpara'me, nong á tá kuus aYeso.

aYeso ton aner akak ítseng

²¹ aYeso be áya a tú ku ku kuus be̱ kaye̱e̱r kuwo̱p aKapanum. Kunom Asabar tá fa nye, aYeso no̱ kaye̱e̱r kutu aduwa nong a tá bo̱so̱p ánerawe'me.

²² Ánerawe'me te zhing be kubo̱so̱p wu, kamok a tú ku bo̱so̱p ba'me kyo̱ndi aner aya a ta be kukyem, sang kyo̱ndi aner aya a ta bo̱so̱p ánerawe Itsi baꞌ.

²³ Nizen iyong aner akak tuse azong a tá be amaan kabik. A ta kuto̱,

²⁴ ye, “aYeso afu aNazaret, wan tse̱r akye̱ be yir e̱? Wan m be̱ ta bin fe̱s yir a? Mi ta ren, wan nye Azhe̱l'e afe Adakunom!”

²⁵ Ayong aYeso tigba ámaan nabik'e ye, “Tigbik! Wuruk kaye̱e̱r aner na!”

²⁶ Ámaan nabik'e tú zuur aner ame. I tá kukun nong i tá wuruk.

²⁷ Ánerawe cice̱r te zhing ma á kpaan ku naka risim ye, “Kai, akye̱ na e̱? Kubo̱so̱p kufas be kukyem! Aner na fe̱ be ámaan nabik ne i ku fok.”

²⁸ Itak'e wor i tseng koake̱ kaye̱e̱r iben aGalili.

aYeso sak anyining abining aBitrus te atser

²⁹ Be kuwuruk ba kaye̱e̱r kutu aduwa, á no̱ nasa aBitrus be Adarawus mak be aYakub ne aYohana.

³⁰ Anyining abining aBitrus se nameneng be kuro̱m kuzhoosh, yong á tak aYeso itak'e.

³¹ Ayong aYeso tseng nufu, ne a yiir kubo̱k wu nong a tú ku ko̱ro̱k nong a tá sonong tsik. Kuro̱m kuzhoosh'e tú won yong a tú nyes ba.

aYeso sak ánerawe whe̱re̱ te atser

³² Nawheshirim'ong, nama kunom tá kpa, ánerawe be̱s be áfe iro̱k ne áfe amaan nabik nufe aYeso.

³³ Ánerawe kuwo̱p'e cice̱r nyim nanu kasa'me,

³⁴ ne aYeso sak áya a tá be iriri iro̱k whe̱r tá te atser. A turung ámaan nabik dide̱ng. A won ámaan nabik'e tá fe̱ kanu baꞌ, kamok ba ren ka wu nye angan'e.

aYeso be ninye aduwa

³⁵ Bop nadiding ne karo̱ rusek whi, aYeso dorok a tseng naro̱ kakak wu ze̱r, nong a tá se nye aduwa.

³⁶ Ayong aBitrus be áfudang akak tsang á ku tse̱r.

³⁷ Á tá fa ku se̱ ne á fe̱ be wu ye, “Koangan sen tsang a ka tse̱r.”

³⁸ aYeso fe̱ be ba ye, “I tseng yir nuwo̱p kukak ku bubarak'e nong a se̱ mi ta taas rife̱ Adakunom azong gip. Iyu ne i sak mi tá be̱.”

³⁹ Iyong á tsang á tseng koake̱ kaye̱e̱r iben aGalili ne a tsang á taas rife̱ Adakunom kaye̱e̱r atu aduwa ba ne á turung ámaan nabik.

aYeso sak akparo̱ng akak te atser

⁴⁰ Aner akak a tá be rikparo̱ng be̱ nufe aYeso, a tá be̱ tigbok akuur a tú ku nye izong nong a tá fe̱ be wu ye, “Ke wan shim, wan ta kyem i ni sak ta te zhe̱l.”

⁴¹ Kaye̱e̱r kuro̱ riye̱, aYeso nabak kubo̱k nong a tá ra aner ame. Ne a fe̱ be wu ye, “Mi shim, te zhe̱l!”

⁴² Rikparo̱ng ame wor ri won aner ame. Aner'e te atser.

⁴³ Ayong aYeso tú ku te ni iren be rife̱ be agap ye,

⁴⁴ “Sang a tu tak akak ike̱ng ikak natoon'e baꞌ. Amma tseng tá se tonong rice wan nufe atsi, ne i nye asidaka aya aMusa tá fe̱ ye a ra nye kamok kute zhe̱l wan nong i ta sor ike̱ng ife koangan tana ren.”

⁴⁵ Kum aner ame tá fa wuruk ne a kpaan kutaas'e koake̱ ma a sak aYeso ba kyem a no̱ kaye̱e̱r kuwo̱p'e baꞌ, a sor naro̱ anerawe tuse baꞌ. Gip be anong, ánerawe nes na naro̱ ze̱r ze̱r nong á be̱s nufu.