aLuka 5 - Izere New Testament

aYeso yis álimazhiri wu áfe ime̱se̱ng'e

¹ Katuk kakak aYeso se nunyeseng nanu kudung aZhanisarat yong ánerawe'me tú ku firik nong á tà fok rife̱ Adakunom.

² A di akpara ashi afa nukim kudung'e, aya áfe kuyising izos tan sak, á tá sen kusu agunung ba.

³ Ayong aYeso no̱ kaye̱e̱r kukpara'me kukak, ku ta nye kufe aSiman, a tá fe̱ be wu ye, a ra sees be kukpara ame kaye̱e̱r ashi'me nong a tin sonong kaye̱e̱r'e nong a tà se̱ karo̱ a tú ku bo̱so̱p ánerawe'me.

⁴ A tá fa gang kufe̱ kanu, ne a fe̱ be aSiman ye, “Sees be kukpara'me naro̱ kudung'e ta se tsik nong ta barak agunung'e tà se̱ izos.”

⁵ Ayong aSiman fe̱ be aYeso ye, “Atekasa, yir ko̱so̱ yir itomong, i se̱ yir ike̱ng ikak baꞌ. Amma kum wan tá fe̱ anong, won yir ta barak yir agunung'e.”

⁶ Á tá fa nye anong ne á yising izos whe̱r ma águnung'e kpaan kusarak.

⁷ Ne á yis áfudang á tá se kaye̱e̱r kukpara kukak be ibo̱k nong á tá be̱ á tu ku se̱ mo ba. Á tusung izos'e zung zung kaye̱e̱r akpara'me ma ku san kuno̱o̱s kaye̱e̱r ashi.

⁸ aSiman Bitrus tá fa di anong, ne a tigbok akuur wu kaben nasho̱o̱n aYeso nong a tá fe̱ ye, “Kam be mi Agwo̱m Ágwo̱m, mi nye aner rine̱n.”

⁹ Kamok wu be áfudang wu cei fok azhing be kuri izos ba tá yising,

¹⁰ anong ne aYakub be aYohana inoon aZabedi, áferime̱ itomong aBitrus'me. Ayong aYeso fe̱ be aSiman ye, “Sang tu fok inyim baꞌ, kyo̱o̱rna wan tà ma yising ánerawe makong kyo̱ndi wan ta yising izos.”

¹¹ Iyong á ko̱k akpara ba á tá saas nukim kudung'e, nong á tá won koakye, á tú ku kuus.

aYeso sak akparo̱ng akak te atser

¹² Nizen iya aYeso ta se kaye̱e̱r kuwo̱p kukak, aner akak rikparo̱ng tá tsang ri kuya dide̱ng, a tá fa di aYeso ne a kpa kaben a tú ku nye akusuk ye, “Atekasa, ke wan shim, wan ta kyem i ni sak ta te zhe̱l.”

¹³ Ayong aYeso nabak kubo̱k nong a ta ra aner ame, ne a fe̱ be wu ye, “Mi shim, te zhe̱l!” Ne rikparo̱ng'e wor ri ku won.

¹⁴ Ne aYeso fe̱ be wu ye, “Sang tu tak akak baꞌ, tseng tá se tonong rice wan nufe atsi, ne i nye asidaka aya aMusa tá fe̱ ye a ra nye kamok kute zhe̱l wan nong i ta sor ike̱ng ife koangan tana ren.”

¹⁵ Gip be anong, itak natoon aYeso ti barang kutseng gugo̱k ma rigwo̱m ánerawe be̱s nong á tú ku foos, ne a ku sak ba á tá te atser.

¹⁶ Amma aYeso yiir itseng ninaro̱ nakak nong a tá se nye aduwa kama wu gak.

aYeso sak akun akak tá te atser

¹⁷ Katuk kakak aYeso tá se be kubo̱so̱p áner aFarisi'me be áfe kubo̱so̱p Itsi, áfe a tá nes ni iwo̱p izhizhe̱k'e niben aGalili be ife aYahuda ne aUshalima se nusosok azong. Kukyem Adakunom tuse azong nong ase̱ aYeso tà sak áfe iro̱k tà te atser.

¹⁸ Áner akak be̱ be akun akak natoon ike̱ng kameneng, á shim á tá no̱ be wu kaye̱e̱r kasa'me nong á tú ku mees nasho̱o̱n aYeso.

¹⁹ Ba tá kyem á se̱ iren kuno̱ be wu baꞌ, kamok ánerawe tá nar agap, yong á ngarak natoon kutu ku ta se kyo̱ndi azho̱ro̱ng, nong á tú ku tiik nike̱ng kameneng wu ame. Á ta sak katoon kutu'me nong á ta tiik be wu natite ánerawe ma nasho̱o̱n aYeso.

²⁰ aYeso tá fa di kuno̱o̱k katsak ba, yong a fe̱ ye, “Are̱, a ma ka re̱ng rine̱n wan.”

²¹ Áner aFarisi be áfe kubo̱so̱p Itsi ame, kpaan kuto̱ naye̱ ba ye, “Angan ne a zhe̱e̱sh Adakunom na e̱? Angan ta kyem a re̱ng anerawe rine̱n wu, sang ke Adakunom baꞌ e̱?”

²² aYeso tá ren ike̱ng iya ba ta to̱ kaye̱e̱r aye̱ ba yong a fe̱ be ba ye, “Kamok akye̱ yin to̱ yin anong kaye̱e̱r aye̱ yin e̱?

²³ Inyaka ro̱ ne i nar e̱? A tana fe̱ ye, ‘A ma ka re̱ng rine̱n wan,’ ka a ta fe̱ ye, ‘Dorok, ta tseng e̱?’

²⁴ Amma nong yin ta ren yin ye Igon Anerawe be kukyem a tanin re̱ng rine̱n nazatse.” Ayong aYeso fe̱ be aner a tá we̱ abas azining ame ye, “Mi fe̱ be wan ye, dorok ta sok ike̱re̱ kameneng wan ta be kari.”

²⁵ Aner ame wor a dorok nasho̱o̱n ba, nong a tá sok ike̱ng kameneng wu ame. A tá be kari, ne a tsang a kerek Adakunom.

²⁶ Koangan te zhing, ne á kerek Adakunom. Á fok inyim, ne á fe̱ ye, “Yir n di yir ike̱re̱ azhing katuur.”

Kuyis aLawi

²⁷ Nama anong, aYeso wuruk, a di aner akak afe a tá shashang itso̱m iben, á tú ku yis ye, aLawi nusonong naro̱ itomong wu yong aYeso fe̱ be wu ye, “Ni kuus.”

²⁸ Ayong aLawi ame dorok, a tá won koakye a tú ku kuus.

²⁹ Ayong aLawi'me nye agbang riye̱ rikan kari wu kamok aYeso. Áfe ku shashang itso̱m iben ne áner akak whe̱re̱ be̱s nong á tá be ya naya mak be ba.

³⁰ Áner aFarisi ne áfe kubo̱so̱p Itsi aya a ta se nigung rice ba san anyinye̱m be álimazhiri wu ye, “Akye̱ sak yin yas ne i so̱ yin be áfe ku shashang itso̱m iben ne áfe rine̱n e̱?”

³¹ Ayong aYeso fe̱ be ba ye, “Aner aya a ta nye atser tse̱r abok baꞌ, amma afe iro̱k tse̱r.

³² Sang mi be̱ nong ta yis azhe̱l'e baꞌ, amma áfe rine̱n nong a ta shishing kuse ba, ne á shishing kunye ba.”

Kurip natoon kunye azumi

³³ Áner ákak rip aYeso ye, “Álimazhiri aYohana yiir inye azumi ne á nye aduwa, anong ne álimazhiri áner aFarisi sor gip, akye̱ sak afuan ta yas ne á so̱ e̱?”

³⁴ Ne aYeso fe̱ be ba ye, “Yin ta kyem i sak yin áfertseng aner aya a ta sok abining afas ta nye azumi kum ne ba rusek mak be wu a? Wayo.

³⁵ Izen saase ife á tana kam aner a tá sok abining afas'e be ba. Nizen iyong ne ba ta nye azumi.”

³⁶ Ne aYeso ku tak ba kumaas na ye, “Akak ta sarak kukpiin wu kufas nong a tin tos kuzen baꞌ, ke a nye anong, kukpiin'e tin barang kusarak ne i tan'e iyong sak kukpiin'e ta risik.

³⁷ A korok ashi anap afas kaye̱e̱r ariding kukpa kuzen baꞌ. Ke a nye anong, ashi anap afas'e ta feneng ma ka ta sarak ariding'e ne ka nyosong.

³⁸ Ei, a korok ashi anap afas kaye̱e̱r ariding kukpa kufas.

³⁹ Akak tà so̱ ashi anap azen ne a bun a shim a tin so̱ afas baꞌ, ne a tà fe̱ ye, ‘Azen'e ta ne a nar ingya.’ ”