aLuka 23 - Izere New Testament

A tseng be aYeso nufe aBilatus

¹ Ágwo̱m ame sok aYeso nong á tá tseng'e nasho̱o̱n aBilatus.

² Á tá fe̱ ye, “Yir tú se̱ yir a sen wo̱ro̱k ánerawe yir, ne a ku roon ba kukarang rigwo̱m itso̱m iben. Ne a sok rice wu ye wu ne a nye aKiristi, a ta nye agwo̱m.”

³ Ayong aBilatus rip aYeso ye, “Wan ne i nye agwo̱m áner aYahuda a?” aYeso fe̱ be wu ye, “Ei, wan ne i fe̱ anong.”

⁴ Ne aBilatus fe̱ be ágbang átsi ne rigwo̱m ánerawe'me ye, “Mi se̱ aner na be rine̱n ike̱ng ikak baꞌ.”

⁵ Amma ánerawe'me yiir'e kar kar ye, “Aye̱ ánerawe niben aYahuda cei n dorok naza be kubo̱so̱p wu. A san'e na aGalili yong a n be̱ ma aze.”

Á tseng be aYeso nufe aHiridus

⁶ aBilatus tá fa fok anong ne a rip ye, “A nye aner aGalili a?”

⁷ A tá fa fok ye aYeso se niben ife aHiridus tú ku nye rigwo̱m, yong a fe̱ ye a ra tseng be wu nufe aHiridus, a ta se na aUshalima nizen iyong gip.

⁸ Nizen aHiridus tá di aYeso riye̱ wu kare̱p dide̱ng, kamok an shim ku ku di gbugbang. A shim ke a tú di kamok ike̱re̱ wu tá foos natoon wu, nong a tà nye ike̱re̱ ikak ife azhing.

⁹ A yiir ku risim iriri ike̱re̱ dide̱ng, ka aYeso tú sak ko'me baꞌ.

¹⁰ Ágbang átsi ne áfe kubo̱so̱p Itsi áya a tá se nunyeseng azong be̱s be rife̱ natoon wu.

¹¹ aHiridus be ásozha wu te̱n be wu fe̱re̱, ne á ku kok ko'me. Á tú te kukpiin ágwo̱m ta tes, á tá bun á tseng be wu nufe aBilatus.

¹² Katuk kayong ne aBilatus be aHiridus te aner be aferime̱, á tá tsang á nye aner be amudo̱n.

A te̱n aYeso amok riku

¹³ aBilatus yis ágbang átsi ne áfe rigwo̱m be ribir ánerawe cei,

¹⁴ nong a tá fe̱ be ba ye, “Yin ti be̱e̱n yin aner na ye a tees ánerawe nong á ta ko̱n be rigwo̱m. Mi mu ku risim nasho̱o̱n yin mi tú se̱ be rine̱n ike̱ng ikak kyo̱ndi yin tá fe̱ yin baꞌ.

¹⁵ Anong ne aHiridus gip, a tú se̱ be rine̱n baꞌ, iyong ne i sak a tú bun ko nufe yir. Yin di yin gip, ko a nye ike̱ng i ta tas ke a ku fe̱r baꞌ.

¹⁶ Kamok anong mi tu ku whereng ne i ku won.”

¹⁷ [Ni igo̱o̱n ba, koakye izen aPasova aBilatus ta tun aner akak nitso̱m.]

¹⁸ Amma ánerawe cei ta kuto̱ ye, “A ku fe̱r, ne a ni tun yir aBarabas.”

¹⁹ aBarabas nye aner a tú ku te nitso̱m kamok a tá sak ánerawe tá ko̱n be rigwo̱m iben kaye̱e̱r kuwo̱p ma a ti fe̱r aner akak.

²⁰ aBilatus shim ke a won aYeso yong a bun a fe̱ be ba gbak,

²¹ amma ánerawe'me bun á yiir tang kuto̱ ye, “A ku tigak! A ku tigak!”

²² Ayong aBilatus bun a fe̱ be ba kutak kufe ataar gbak ye, “Kamok akye̱ e̱? A nye rine̱n akye̱ e̱? Sang mi tú se̱ be rine̱n ri ta kyem a tú ku fe̱r baꞌ. Kamok anong mi tà sak a tu ku whereng nong a tu ku won.”

²³ Á yiir kutasak kar kar ye a ru ku tigak, kutasak ba sak ma a kuus rifuba.

²⁴ aBilatus tá di anong a tú nye ba ike̱ng iya ba tá shim.

²⁵ A tú won ba aner aya a tá tsang a ku te nitso̱m kamok kuren a ta sak ánerawe ta ko̱n be rigwo̱m iben ma á ti fe̱r aner akak, ayong a tú no̱o̱k ba aYeso nong á tin nye ike̱ng iya ba tá shim.

A tigak aYeso

²⁶ Nizen á tá sen tseng be aYeso, á nyim be aner aSirin akak, a tú ku yis ye aSiman. A se be kutseng wu, a ta no̱ kaye̱e̱r aUshalima. Á tú sak ye ma a ra cer kukon a tanin tigak aYeso nong a tin kuus aYeso nama.

²⁷ Ánerawe whe̱re̱ ti kuus na aYeso'me. Ákak nye ányining áfe a tá nye riye̱ riwe, ne á tsang á tos.

²⁸ Ayong aYeso kirik a tá fe̱ be ba ye, “Ányining aUshalima, tu tos yin kamok'i baꞌ, tos yin kamok rice yin ne inoon yin.

²⁹ Kamok izen saase iya ánerawe tana fe̱ yin ye, ‘Áner riye̱ rikan ne á nyining áya sang tá kun tes baꞌ, áya a tá nye asang igon, ka áya a tá kun ngasa igon baꞌ.’

³⁰ Nizen iyong, “ ‘ánerawe tà fe̱ be nawhanang ye, “Ni kpas yin natoon yir.” Ne á fe̱ be agung ye, “Ni kis yir.” ’

³¹ “Ke i se ye ánerawe ta nye ike̱re̱ na be kakon ne ka ruresek kashirim, to̱ ane̱ ne á tà nye ke kakoor e̱?”

³² Á tseng be áner ákak ba afa á tá nye rine̱n nong á tà su ku fe̱s ba mak be aYeso.

³³ Á tá fa be̱ naro̱ a ta yis ye Aho̱karo̱k Ace, ne á tigak aYeso'me azong mak be áfe rine̱n ame, azining nubo̱k riya, ne afe afa nubo̱k rimen.

³⁴ Ne aYeso fe̱ ye, “Ada, ku re̱ng ba'me, kamok á ren ike̱ng ba ta nye baꞌ.” Ne á kasap ares wu be ku ni barak ica ikiriwhe̱r.

³⁵ Ánerawe nyeseng nong á tu ku ye̱re̱k, ne áko̱k kasho̱o̱n'e ku kok'e, ne á fe̱ ye, “A shesh ákak, a ra shesh rice wu, ke wu ne a nye aKiristi afe Adakunom tá kasa.”

³⁶ áSozha gip á be̱ bubarak nong á tú ku kok'e, ne á ku no̱o̱k ashi anap aya a tá se kpukpak.

³⁷ Ne á fe̱ be wu ye, “Ke wan ne i nye agwo̱m aner aYahuda ne i shesh rice wan.”

³⁸ Izibir tuse nukon'e dim rice wu, i tá fe̱ ye, “AYUNA NE A NYE AGWO̱M ANER aYAHUDA.”

³⁹ Azining kaye̱e̱r aya a tú ku tigak ba mak, tú barak amaan rife̱ ye, “Wan ne i nye aKiristi aꞌa? Shesh rice wan ne i ni shesh yir.”

⁴⁰ Amma afe afa'me tú zhe̱e̱r a tá fe̱ ye, “Wan fok inyim Adakunom aꞌa? Wan di wan ta sen so̱ risam kuri rifu aꞌa?

⁴¹ Risam a tin no̱o̱k yir se gye̱r, kamok kunye yir nye kumaan'e, aner na nye rine̱n ike̱ng ikak baꞌ.”

⁴² Ayong a bun a fe̱ be aYeso ye, “Yiring be mi kaye̱e̱r rigwo̱m wan.”

⁴³ aYeso fe̱ be wu ye, “Won ta ka tak katsak'e, katuur wan tà se mak be na aParadis.”

Riku aYeso

⁴⁴ Nabas itso̱m kuso̱k be afa nunom, karo̱ te whi koake̱ nazatse ma nabas itso̱m itaar nunom,

⁴⁵ kamok sang kunom tar baꞌ. Alaple a tá se kaye̱e̱r agbang kutu kuya Adakunom iben sarak natite.

⁴⁶ aYeso tá kuto̱ naza a tá fe̱ ye, “Ada, nubo̱k wan, ne mi won kutser mi.” A tá fa fe̱ anong, ne a ko̱ro̱k isong wu ife igang'e.

⁴⁷ Izen iya aritek ásozha'me akak tá fa di anong yong a kerek Adakunom, ne a fe̱ ye, “Katsak'e aner na nye azhe̱l'e.”

⁴⁸ Áfe a tá be̱ nong á ta di kutigak aYeso, tá fa di ike̱re̱'ong, korok ibo̱k nuto̱ nong á tú ku burung.

⁴⁹ Amma cice̱r áfe a tá ren aYeso'me ne ányining á tá tsang á ku kuus kum na aGalili nyeseng gugo̱k nong á tá ye̱re̱k ike̱re̱'ong cei.

Kune̱r aYeso

⁵⁰ Aner Arimatiya akak tuse riyerek wu tá nye aYusufu niben aYahuda, a nye azining kaye̱e̱r áko̱k kasho̱o̱n aner aYahuda. A nye aner atek, ne a se gye̱r nasho̱o̱n Adakunom.

⁵¹ A shim ibo̱ro̱ng be ike̱ng iya ba tá nye baꞌ. A se be kutor kube̱ rigwo̱m Adakunom.

⁵² A be nufe aBilatus a tá se fe̱ ye, a ra ku no̱o̱k kukom aYeso.

⁵³ A tiik'e a tá kunung be kures kukan a tá yis ye alilin a tá se ne̱r kaye̱e̱r kure̱k a tá ta nifang agudong kuya sang a tá kun ni ne̱r akak baꞌ.

⁵⁴ I se nawhe̱shirim, izen kunye kanye̱k kunom Asabar.

⁵⁵ Ányining áya a tá kuus aYeso kum na aGalili ame tseng mak be aYusufu, nong á tá se di karo̱ kure̱k'e be karo̱ a tú ku sak kukom'e.

⁵⁶ Nama anong ányining'e tú bun kari, á ta se nye ike̱re̱ i ta be iko̱o̱n itek nong á tà sen te nukom'e. Á fan katuk Asabar kyo̱ndi Itsi Adakunom ta fe̱.