aLuka 19 - Izere New Testament

aYeso no̱ nasa aZaka aner kushashang itso̱m iben

¹ aYeso no̱ kaye̱e̱r kuwo̱p aZheriko, a tá sen gor.

² Aner akak tuse azong riyerek wu tá nye aZaka. A nye agbang'e kaye̱e̱r áfe ku shashang itso̱m iben, ne a nye arum'e dide̱ng.

³ A shim ke a di aYeso, a ra nye akum'me. A kyem a di aYeso'me baꞌ, kamok ánerawe tú te̱ne̱ng'e.

⁴ Ayong a tseng zizirik a ta se ngarak ritin atafo rikak nasho̱o̱n nong a tá di aYeso, kamok aYeso tà gor niren iyong.

⁵ Nizen aYeso tá be̱ naro̱'me yong a sok anyisi naza a tá fe̱ ye, “aZaka tiik kaben, mi tà no̱ kari wan katuur.”

⁶ Ayong a wor a tiik gbashak nong a tú ku shan be riye̱ rikan.

⁷ Ánerawe cice̱r tá fa di anong, ne á san anyinye̱m ye, “A be numa aner rine̱n.”

⁸ Ayong aZaka dorok a tá fe̱ be aYeso ye, “Atekasa, mi tà no̱o̱k áfe rizor ribir kurum'i aze kyo̱o̱rna. Ke mi n mo̱o̱r akak natoon ike̱ng ikak, mi tu ku karang ko kutak kunaas.”

⁹ Ne aYeso fe̱ be wu ye, “Katuur kashesh m be̱ nasa na, kamok aner na gip a nye igon Ibrahim.

¹⁰ Kamok Igon Anerawe be̱ nong a tà tse̱r ne a shesh ike̱ng i tan wei.”

Kumaas natoon íca itso̱m kuso̱k

¹¹ Kum ne á ru foos ike̱re̱ na, aYeso ya kasho̱o̱n be ku ka taas ba kumaas, kamok a se bubarak be aUshalima, ba sor ye rigwo̱m Adakunom'me tà wor ri be̱ nizen izining.

¹² Ayong aYeso tú tak ba ye, “Aritek akak tuse a shim a ta be nuwo̱p kukak gugo̱k nong a tà se ya rigwo̱m ne a ku bun.

¹³ Ayong a yis ásam wu kuso̱k nong a ta no̱o̱k koangan ba itso̱m i ta se kyo̱ndi itso̱m ife̱n itaar alebura nong a tá fe̱ be ba ye, ‘Ni nye yin rizhik be itso̱m na ma mi be̱.’

¹⁴ “Áner wu tú shim baꞌ. Ayong á tom ákak nong á tú ku kuus nama nong a tá se tak'e ye, ‘Yir shim yir aner na tà te agwo̱m yir baꞌ.’

¹⁵ “Gip be anong a ya rigwo̱m'e yong a tú bun kari, ne a tom nufe ásam wu ame ye á ru ku no̱o̱k itso̱m ame, nong a tà di ka akye̱ ne á min se̱ natoon'e.

¹⁶ “Afe ime̱se̱ng'e be̱ a tá fe̱ ye, ‘Atekasa, mi ti se̱ kutak kuso̱k natoon ike̱ng wan tin no̱o̱k.’

¹⁷ “Ayong atekasa wu'me fe̱ be wu ye, ‘Dazha asam'i atek, wan tonong katsak natoon ike̱ng ihiir'e, ninye rigwo̱m natoon agbang iwo̱p kuso̱k.’

¹⁸ “Afe afa'me tá be̱ a fe̱ ye, ‘Atekasa, mi ti se̱ kutak kutoon natoon ike̱ng wan tin no̱o̱k.’

¹⁹ “Ayong atekasa'me fe̱ be wu ye, ‘Wan ninye rigwo̱m natoon iwo̱p itoon.’

²⁰ “Asam'me akak bun a be̱ a fe̱ ye, ‘Atekasa, inga ike̱ng wan. Mi roos i tá sak kaye̱e̱r ares.

²¹ Mi fok inyim wan, kamok kuse wan ro̱, wan shim kusok ike̱ng naro̱ wan tá sak baꞌ, ne i nye ishamang naro̱ afe sang wan ta tuus baꞌ.’

²² “Ayong atekasa wu ame fe̱ be wu ye, ‘Wan nye amaan asam! Mi tà ka to̱ amok be ike̱ng wan ta fe̱ be kanu wan. Aser, wan ren ye kuse mi ro̱, ne mi shim kusok ike̱ng naro̱ afe sang mi tá sak baꞌ, ne i nye ishamang naro̱ afe sang mi tá tuus baꞌ a?

²³ To̱, akye̱ sak wan ti sak itso̱m'i ningme̱ itso̱m nikum ke mi be̱ i ta be̱ se̱ i min barang baꞌ e̱?’

²⁴ “Ayong a fe̱ be áfe a tá se nunyeseng azong ye, ‘Ni shan yin itso̱m'ong nubo̱k wu, nong tà no̱o̱k yin afe a ta be kuso̱k.’

²⁵ “Amma á fe̱ be wu ye, ‘Atekasa, a be ishika kuso̱k nubo̱k wu kyo̱o̱rna, so̱!’

²⁶ “Ayong a fe̱ ye, ‘Mi ta ka tak yin, koangan a ta be ike̱ng iya a tú ku barang mo, afe a ta be ike̱ng ikak baꞌ, ike̱ng iya wu ta be cie̱k'ong a tin shan ni wu.

²⁷ Be̱e̱n yin be ámudo̱n'i áfe a tá shim mi tin nye rigwo̱m niba baꞌ, nong tu ku fe̱s yin ba aze nasho̱o̱n'i.’ ”

aYeso no̱ na aUshalima

²⁸ Nama aYeso tá fe̱ anong yong a ya kasho̱o̱n a tá tseng na aUshalima.

²⁹ A tá fa be̱ bubarak be kuwo̱p aBatafazhi be aBetani, nawhanang a ta yis ye Kawhanang Nafar, ne a tom álimazhiri wu afa. A tá fe̱ be ba ye,

³⁰ “Tseng yin nabuwo̱p kya nasho̱o̱n, ke yin no̱ yin nuwo̱p'e yin tà di yin kaban azhaki kaya akak tá kun ni ngarak baꞌ, nurosom azong. Bisik yin tà be̱e̱n yin'e aze.

³¹ Ke aner akak ta rip yin ye, ‘Kamok akye̱ yin sen bisik yin'e e̱?’ Ne i ku tak yin ye, ‘Atekasa ne a tse̱r.’ ”

³² Áya a tú ku tom ba ame tseng á tá se se̱'me kyo̱ndi aYeso tú ku tom ba.

³³ Nizen iya a tá sen bisik kaban azhaki'me ne atek'e tú rip ba ye, “Akye̱ sak yin sen bisik yin kaban azhaki'me e̱?”

³⁴ Ne á fe̱ be ba ye, “Atekasa yir ne a tse̱r.”

³⁵ Á be̱e̱n aYeso kaban azhaki'me ne á ni tarak ares ba natoon'e ne a ni sak aYeso natoon'e.

³⁶ Nizen iya a tá se be kutseng, ánerawe tarak ares ba niren.

³⁷ A tá fa be̱ bubarak be kutisik Kawhanang Nafar, áfe a ta se be i kukuus ame ta kuto̱ naza ne á kerek Adakunom be riye̱ rikan kamok ike̱re̱ azhing ba tá ye̱re̱k cei.

³⁸ Ne á fe̱ ye, “Aner riye̱ rikan nye a nye agwo̱m aya a ta saase kaye̱e̱r riyerek Agwo̱m Ágwo̱m. kameneng riye̱ kuse kaye̱e̱r kaza ne kuyiik nye kufe Adakunom.”

³⁹ Áner aFarisi ákak á tá se kaye̱e̱r rigwo̱m ánerawe'me fe̱ be aYeso ye, “Aner Kubo̱so̱p, zhe̱e̱r álimazhiri wan á ra tigbik.”

⁴⁰ Ayong aYeso fe̱ be ba ye, “Won tà ka tak yin, ke ba tigbik ata na tà kpaan tang kuto̱ ne á ni kerek.”

aYeso daam be aUshalima

⁴¹ aYeso tá fa be̱ bubarak be aUshalima, a sok anyisi a ta ye̱re̱k kuwo̱p'e, yong a tos kamok kuwo̱p'e.

⁴² A tá fe̱ ye, “Akye̱ fa sak wan ren ike̱ng i tana ka be̱e̱n kameneng riye̱ katuur, amma kyo̱o̱rna a ma ka ne̱r yin'e.

⁴³ Kamok izen tin be̱ ni wan, ámudo̱n wan tana no̱k kubar nong á tà ka gorok mo, ko nabas anyaka.

⁴⁴ Á tà ka tosom yin ma kaben, be ánerawe wan a ta se kaye̱e̱r'e, a tà won kuta kuzining natoon kufudang baꞌ, kamok wan ti sak riye̱ nizen iya Adakunom tá be̱ nufuan baꞌ.”

aYeso no̱ kaye̱e̱r agbang kutu kuya Adakunom iben

⁴⁵ Ayong aYeso no̱ nubang agbang kutu kuya Adakunom iben, a ta kpaan i ro áfe a ta se be kure̱e̱s ike̱re̱.

⁴⁶ Ne a fe̱ be ba ye, “I se ni izibir ye, ‘Kasa mi tà sor kasa aduwa,’ amma yin n sok yin i ta min nye yin kutas ágbang ákpatang.”

⁴⁷ aYeso bo̱so̱p ánerawe'me koakye katuk kaye̱e̱r agbang kutu kuya Adakunom iben'e, ágbang átsi be áfe kubo̱so̱p Itsi ne áko̱k kasho̱o̱n kaye̱e̱r ánerawe'me tse̱r á tú ku fe̱r.

⁴⁸ Gip be anong á kyem á se̱ iren á tana ku fe̱r baꞌ, kamok rife̱ wu tsang ri no̱ naye̱ ánerawe dide̱ng.