aLuka 18 - Izere New Testament

Kumaas natoon akumung akak a yiir kunye aduwa

¹ aYeso tak álimazhiri wu kumaas na nong a tú ku bo̱so̱p ba ku yiir nye aduwa, sang á tu ro̱n baꞌ.

² Ayong a tú tak ba kumaas na ye, “Aner i to̱ amok akak tuse nuwo̱p kukak afe sang a tá fok inyim Adakunom baꞌ, a daam be ákak baꞌ.

³ Akumung akak tuse nuwo̱p'e, a yiir be̱s nufe aner i to̱ amok'e ne a ku nye izong ye, ‘Ni se̱ mo na amok'i be amudo̱n'i.’

⁴ “Ni ime̱se̱ng'e a rawu, nigang'e a bun a fe̱ ye, ‘Mi fok inyim Adakunom baꞌ, ne i ti daam be ánerawe baꞌ, gye̱rtatan,

⁵ amma kamok akumung na ta yiir ni daam, ma mi di a se̱ katsak wu ta shim, fan a bin daam be kube̱s.’ ”

⁶ Ne Agwo̱m Ágwo̱m fe̱ ye, “Fok yin ike̱ng iya amaan aner i to̱ amok'ong tá fe̱.

⁷ Aser, Adakunom tà tonong katsak wu natoon aya wu tan kasa, áfe a ta tos nufu katuk be kunom aꞌa? A tà yiir kufe̱ be ba ye, ‘Ma whe̱ nizham’ a?

⁸ Won ta ka tak yin, a tà di ma ba se̱ katsak ba ta shim zizirik. Ke Igon Anerawe be̱, a tà se̱ áfe kuno̱o̱k katsak nazatse a?”

Kumaas natoon aner aFarisi ne afe kushashang itso̱m iben akak

⁹ aYeso tú tak ba kumaas na kamok áner aya a ta ca kafok ye, ba se zhe̱l ne a zhe̱e̱sh koangan. Ayong a tú tak ba kumaas na ye,

¹⁰ “Áner ákak ba afa tseng na agbang kutu kuya Adakunom iben nong á tà se nye aduwa, azining nye aner aFarisi ne áfe afa'me nye áfe kushashang itso̱m iben.

¹¹ Aner aFarisi ame dorok nong a tá nye aduwa ye, ‘Adakunom, mi shim tá ka tonong riye̱ rikan'i, kamok sang mi se kyo̱ndi ribir ánerawe, á ta nye ákpatang, ka áfe amaan kunye baꞌ. Mi nye rikuna ne i se kyo̱ndi afe kushashang itso̱m iben na baꞌ.

¹² Mi nye azumi kutak kufa na asate ne i nyesek izining kaye̱e̱r kuso̱k koakye mi ta se̱.’

¹³ “Amma afe ku shashang itso̱m iben ame nyeseng gugo̱k, a kyem a sok anyisi naza baꞌ, a korok ibo̱k nafok a tá fe̱ ye, ‘Adakunom, ro̱ riye̱ mi, mi nye afe rine̱n.’

¹⁴ “Ne aYeso fe̱ be ba ye, mi tà ka tak yin afe ku shashang itso̱m iben'ong tú bun kari an te zhe̱l nasho̱o̱n Adakunom, Sang aner aFarisi ame baꞌ. Koangan ne a tiyiik rice wu a ta te be wu fe̱re̱, aner aya a tá mees rice wu a tu ku tiyiik.”

aYeso nye inoon nazhizhe̱k'e aduwa

¹⁵ Ánerawe be̱s be inoon ba gip nufe aYeso nong a tin nye aduwa. Nizen álimazhiri wu tá di anong, yong á tu ro ánerawe'me.

¹⁶ Ayong aYeso yis inoon'e nong a tá fe̱ ye, “Won yin inoon nazhizhe̱k'e tu be̱s nunaan, tu ku roon yin ba kube̱ baꞌ, kamok rigwo̱m Adakunom nye rife áner kyo̱ndi áyuna.

¹⁷ Katsak ne mi ta ka tak yin, koangan ne a shan rigwo̱m Adakunom kyo̱ndi igon kahiir'e baꞌ, a tà kyem a no̱ kaye̱e̱r rigwo̱m Adakunom baꞌ.”

Ako̱k kasho̱o̱n akak a tá nye arum'e

¹⁸ Ako̱k kasho̱o̱n akak rip aYeso ye, “Aner Kubo̱so̱p atek, akye̱ ne mi tà nye nong tà se̱ kutser kufe izen izen e̱?”

¹⁹ Ne aYeso fe̱ be wu ye, “Akye̱ sak wan tin yis ye aner atek e̱? Akak kuse a ta nye atek ze̱e̱r be Adakunom baꞌ.

²⁰ Wan ren ike̱ng iya Itsi tá fe̱ ye a ra nye, ‘Sang tu nye rikuna baꞌ. Sang tu fe̱r akak baꞌ. Sang tu nye itsang baꞌ. Sang tin bo̱ naborok nakak baꞌ. Tiyiik ada be ango̱ wan.’ ”

²¹ Ne aner ame fe̱ ye, “Ei, mi kuus ike̱re̱ na cei, kum ne mi ru nye igon.”

²² aYeso tá fa fok anong, ne a fe̱ be wu ye, “Wan ru raar nike̱ng izining. Re̱e̱s koakye wan ta be, kasap áfe rizor itso̱m'e. Wan tà se̱ kurum naza nong ta be̱ tin kuus.”

²³ Nizen aner ame tá fok anong, a nye riye̱ riwe dide̱ng, kamok a nye arum'e dide̱ng.

²⁴ aYeso tá di riye̱ riwe wu, yong a fe̱ be wu ye, “I tà ro̱ dide̱ng arum ta no̱ kaye̱e̱r rigwo̱m Adakunom!

²⁵ I tà se we̱e̱r we̱e̱r arakumi tana gor ni izobok kufer be arum tana no̱ kaye̱e̱r rigwo̱m Adakunom.”

²⁶ Ánerawe tá fa fok anong yong á rip aYeso ye, “To̱, yong angan ne a tà se̱ kashesh'e makong e̱?”

²⁷ Ne aYeso fe̱ be ba ye, “Ike̱ng iya i ta nar agap ánerawe, i nar agap Adakunom baꞌ.”

²⁸ Ayong aBitrus fe̱ be aYeso ye, “Di, yir n wosong yir koakye yir tá be yir nong ta ka kuus yir!”

²⁹ aYeso fe̱ be ba ye, “Katsak'e ne mi tà ka tak yin, aner akak n won kasa wu ka abining ka atek be áronyining ka inoon wu kamok rigwo̱m Adakunom,

³⁰ nong a tana won dar a se̱ ike̱ng i ta nar whe̱r kyo̱o̱rna ne nizen a tana se̱ kutser kufe izen izen nasho̱o̱n baꞌ.”

aYeso bun a nye kuzarap natoon kuri riku wu

³¹ aYeso na ka korok be álimazhiri wu kuso̱k be afa nukim nong a tá fe̱ be ba ye, “Yir ngarak yir i be yir na aUshalima nong koakye áner kuzarap tá zibir natoon Igon Anerawe ta shining.

³² A tu ku sok a tà no̱o̱k áner aya a ta nye áner aYahuda baꞌ, a tú ku kok ko'me ne a ku kas ne a ku tang ace̱, ne a ku whereng ne a ku fe̱r.

³³ Katuk afe ataar a tà bun a dorok be kutser.”

³⁴ Amma álimazhiri'me ren ike̱ng iya a tin fe̱ natoon'e baꞌ. A tu ne̱r ba ike̱ng iya rife̱'me tá sor, ba ren ike̱ng iya a tin fe̱ natoon'e baꞌ.

aYeso sak akpato̱o̱n akak a tú ku nye izong te atser

³⁵ Nizen aYeso tá be̱ bubarak be aZheriko, akpato̱o̱n akak se nusonong nukim iren a ta sen nye izong.

³⁶ A tá fa fok rigwo̱m ánerawe ta sen gor, a rip ike̱ng iya a ta sen nye'me.

³⁷ Iyong ánerawe tu tak ye, “aYeso aner aNazaret ne a sen gor.”

³⁸ Ayong a tá kuto̱ a ta yis ye, “aYeso, Igon aDauda, ro̱ riye̱ mi!”

³⁹ Ánerawe áya a tá se nasho̱o̱n tú tigba ye a ra te gbik. Amma a bun a ti barang kuyis be agap dide̱ng ye, “Igon aDauda, ro̱ riye̱ mi!”

⁴⁰ Ayong aYeso nyeseng a tá fe̱ ye á ru ku be̱e̱n aner'e. A tá fa be̱ bubarak ne aYeso ku rip ye,

⁴¹ “Akye̱ ne wan shim mi ta ka nye'me e̱?” Ne aner'e fe̱ ye, “Atekasa, mi shim ta di karo̱.”

⁴² Ayong aYeso fe̱ be wu ye, “Di karo̱, kuno̱o̱k katsak wan sak wan te atser.”

⁴³ A wor a kpaan i di karo̱ ne a kuus aYeso, ne a kerek Adakunom. Ánerawe'me tá fa di anong ne á kerek Adakunom gip.