aLuka 14 - Izere New Testament

aYeso sak aner akak te atser

¹ Katuk Asabar akak, nizen aYeso tá tseng nong a tà se yas numa ako̱k kasho̱o̱n aner aFarisi akak, ánerawe tú ye̱re̱k kyur kyur.

² Aner akak tuse azong, atak be ibo̱k tá mos

³ aYeso rip áner aFarisi'me be áfe a tá ren Itsi dide̱ng ye, “I nye Itsi aner ta sak akak ta te atser katuk Asabar a?”

⁴ Iyong á te gbik. Ne aYeso yiir aner ame a tú ku sak a tá te atser ne a ku te niren.

⁵ aYeso tú rip ba ye, “Ke igon akak yin ka amung akak yin kpa kaye̱e̱r ribong ri ta be ashi katuk Asabar, a ta tun zizirik aꞌa?”

⁶ Ka á ba be rife̱ á tanin sak baꞌ.

Mees rice

⁷ Nizen aYeso tá di ákak kaye̱e̱r átsen tá kasa naro̱ kusosok natek naro̱ kuya naya'me, ne a ku tak ba kumaas na ye,

⁸ “Ke aner akak ta tak riye̱ rikan kuwe̱ne̱ng, tu se sonong naro̱ kayiik'e baꞌ, kamok kashim an tak aner akak a tá ka nar yiik gip.

⁹ Ke anong baꞌ, aner a tá ka tak yin riye̱ rikan'e tà be̱ fe̱ be wan ye, ‘Dorok ta no̱o̱k aner akak karo̱ kusonong wan.’ Ne wan ma ku bun naro̱ kusonong kahiir'e be isum.

¹⁰ Ke a tá tak riye̱ rikan, se sonong naro̱ kahiir'e, nong ke aner a tá ka tak riye̱ rikan'e be̱, a tà fe̱ be wan ye, ‘Are̱, be̱ ta se sonong naro̱ kusonong aze, ne a ka tiyiik nasho̱o̱n ribir átsen áfudang wan.’

¹¹ Kamok koangan ne a mees rice wu a tú ku tiyiik, aner aya ne a sok rice naza a tà te be wu fe̱re̱.”

¹² Ne aYeso fe̱ be aner a tú ku yis kari wu ame ye, “Ke wan tà yis ánerawe nong á tà be̱ yas, tu tak áferime̱ wan ka áronyining wan ka afe iri wan ka áfe a ta se bubarak be wan á ta nye arum baꞌ. Ke wan nye anong, ba tà ma ka yis gip, ne á ka karang.

¹³ Ke wan tà yis ánerawe nong á tá be̱ yas, yis áfe rizor be ákun ne áfe a ta yising ne ákpato̱o̱n.

¹⁴ Wan tà se̱ ishorong, ba ta kyem á ka karang baꞌ gye̱rtatan, a tà ka karang nizen iya a tana dorok azhe̱l'e áya a ta n kus.”

Kumaas natoon agbang riye̱ rikan

¹⁵ Aner akak kaye̱e̱r áfe a ta sen yas mak be aYeso tá fa fok anong, ne a fe̱ be aYeso ye, “Aner a ta be riye̱ rikan nye áya a tana yas nizen riye̱ rikan kaye̱e̱r rigwo̱m Adakunom.”

¹⁶ Ne aYeso fe̱ be wu ye, “Aner akak se be kanye̱k agbang riye̱ rikan, ayong a taas ánerawe whe̱r.

¹⁷ Izen riye̱ rikan'e tá fa nye ne a tom asam wu nong a ta se yis áner áfe wu tá ku taas ba ame ye, ‘Be̱ yin, an gang koakye!’

¹⁸ “Amma cice̱r be̱s be naban ike̱re̱ ikak. Afe ime̱se̱ng'e fe̱ ye, ‘Kyo̱o̱rna ne mi shan karo̱. Kusuk, won ma mi se di karo̱'me dim nizham.’

¹⁹ “Ne akak bun a fe̱ ye, ‘Mi n shan inyak ikap kuso̱k. Kusuk, ni won ta se bo̱mo̱ng nizham.’

²⁰ “Ne akak bun a fe̱ ye, ‘Kaye̱e̱r inom na ne mi ra nye kuwe̱ne̱ng, kamok anong mi ta kyem i se̱ ta be̱ baꞌ.’

²¹ “Asam'me tú bun a tá be̱ tak atekasa wu kuto̱'me. Riye̱ atekasa'me beseng, yong a fe̱ be asam'me ye, ‘Tseng, ni nanu íren ne atsirik agbang kuwo̱p gbashak nong ta be̱ be áfe rizor be ákun ne ákpato̱o̱n ne áfe a ta yising.’

²² “Ayong asam'me fe̱ ye, ‘Atekasa, mi n nye ike̱ng wan tá fe̱ ye i ra nye, gip be anong karo̱ ru kuse.’

²³ “Ne atekasa'me fe̱ be asam wu ye, ‘Tseng ni nanu íren nong tu ku yis ba ye á ra be̱ nong kasa mi tà shining.

²⁴ Mi ta ka tak yin, ko aner azining kaye̱e̱r áner aya mi tá tsang i ka yis ba riye̱ rikan'e tà re̱e̱r naya mi tan nye baꞌ.’ ”

Risam kute afikuus

²⁵ Katuk kakak rigwo̱m ánerawe se be kutseng be aYeso. Ayong a kirik nong a tá fe̱ be ba ye,

²⁶ “Ke aner aya a shim a tin kuus ma a rawu atek be anyining ne abining be inoon wu, ne áronyining be ángasnyining wu, be rice wu gip. Sang ke anong baꞌ, a tà kyem a te alimazhiri mi baꞌ.

²⁷ Aner aya ne a sok kukon ku kutigak mo nong a tin kuus baꞌ, a tà kyem a te alimazhiri mi baꞌ.

²⁸ “Ke akak yin shim a ta no̱k rino̱k, aser a tà sonong nizham nong a ta di ike̱ng iya wu tanin fe̱r natoon'e ne a bun a di ka wu be itso̱m i tana kyem kugang rino̱k'e aꞌa?

²⁹ Kamok ke a barak ribor'e a ra kyem a gang rino̱k'e baꞌ, áfe a ta gosok ne á ye̱re̱k tu ku mas.

³⁰ Ne á fe̱ ye, ‘Aner na san rino̱k a kyem a gang baꞌ.’

³¹ “Ke agwo̱m akak tse̱r a ta se kpa kuwo̱p kukak be itsom, aser a tà sonong nizham nong a tà to̱ ka áner izungu kuso̱k wu ta be ta kyem á nyeseng, nong a ta ko̱n be aya afe a ta be ánerawe izungu iso̱k ifa aꞌa?

³² Ke a ta kyem'me baꞌ, aser sang a tà tom átom ákak kum ne aner'e rusek gugo̱k, nong a tà tse̱r iren a tana sor caang aꞌa?

³³ Anong ne yin gip, koangan ne ke a won koakye wu ta be nong a tin kuus baꞌ, a tà kyem a te alimazhiri mi baꞌ.

Ito̱k ta

³⁴ “Ito̱k nye ike̱ng itek, amma ke kurereng ito̱k'e gang, a ta nye ne ane̱ nong i ta bun i rereng e̱?

³⁵ I ta ba se gye̱r kamok riko̱ ka narik baꞌ. A tà nyosong. “Aner a ta be ato kufok a ra fok.”