aLuka 1 - Izere New Testament

Na san'e

¹ Ánerawe whe̱re̱ n nye ike̱re̱ iya ba tá kyem á nye nong á ta zibir ike̱ng ikak natoon ike̱re̱ iya i tá shining kaye̱e̱r yir na.

² Kyo̱ndi áya a tin se ni ime̱se̱ng'e tin no̱o̱k yir, ne áfe a tá nye itomong kutaas rife̱'me tin tak yir.

³ Kamok anong, mi be rice mi n nye nong tá ren koakye kum ni ime̱se̱ng'e. I ti se gye̱r gip, nong ta ka zibir ike̱re̱ na nye̱k nye̱k, wan aTiyofilus ako̱k kasho̱o̱n,

⁴ nong ase̱ wan tà ren katsak ike̱re̱ iya a tá ka bo̱so̱p'e.

A fe̱ itak kutes aYohana aner abatisma

⁵ Nizen iya aHiridus tá nye agwo̱m iben aYahuda. Atsi akak tuse azong riyerek wu tá nye aZakariya, aya a tá nye aner izo̱ro̱k atsi a tú ku yis ye, Abizha. Abining wu Alisabatu nye abafe kasa aHaruna gip.

⁶ Cice̱r ba, á nye áner aya kutseng ba tá se gye̱r nasho̱o̱n Adakunom, á kuus Itsi be ike̱re̱ Adakunom tá fe̱ ye a ra kuus cei gye̱r gye̱r.

⁷ Amma á ra be igon baꞌ, kamok Alisabatu'e kun tes baꞌ, cice̱r ba tsang á kop dide̱ng.

⁸ Katuk kakak, aZakariya tá se be itomong ritsi kaye̱e̱r agbang kutu kuya Adakunom iben, kyo̱ndi i ta se ni igo̱o̱n ba.

⁹ A tú ku kasa be kubarak ikiriwhe̱r, kyo̱ndi igo̱o̱n kukasa atsi ta se, nong a tá se no̱ kaye̱e̱r agbang kutu kuya Adakunom iben'e nong a tà shosh name a ta be iko̱o̱n itek.

¹⁰ Izen kushosh name'me tá fa nye, rigwo̱m ánerawe áfe kuya Adakunom iben cei se nufang ninye aduwa.

¹¹ Ayong amaleka Adakunom ti wuruk na aZakariya'me, a nyeseng nabas kubo̱k riya kyo̱ndi karo̱ a tú ku shosh ike̱re̱ iko̱o̱n'e.

¹² Nizen iya aZakariya tú ku di, a te febek, ne inyim ku ro̱ dide̱ng.

¹³ Amaleka'me fe̱ be wu ye, “Sang tu fok inyim baꞌ, aZakariya, an fok aduwa wan. Abining wan Alisabatu tà ka tes igon, wan tú ku te riyerek ye aYohana.

¹⁴ A tà sor ike̱ng riye̱ rikan dide̱ng nufuan. Ánerawe whe̱re̱ tà nye riye̱ rikan kamok kutes wu.

¹⁵ Kamok a tà se yiik nasho̱o̱n Adakunom, a tà so̱ kugbe̱re̱ ka ike̱ng iya i tana ku sak a tà feng baꞌ. A tú ku shining be Kabik Kazhe̱l'e kum nutes wu.

¹⁶ A tà sak ánerawe Isarela whe̱r tú ku bun nufe Adakunom ba.

¹⁷ A tà tseng nasho̱o̱n Agwo̱m Ágwo̱m kaye̱e̱r kabik be kukyem kuri kufe Iliya nong a tà sak aye̱ átek inoon tà ku bun ni inoon ba, ne a sak áya a ta shonong, ta kuus kutseng aner a ta se gye̱r nasho̱o̱n Adakunom. A tà sak ánerawe tà nye kanye̱k kamok Agwo̱m Ágwo̱m.”

¹⁸ Ayong, aZakariya rip amaleka'me ye, “Mi tà san ane̱ tà ren ye iyu nye katsak e̱? Mi n kop, abining'i gip an bo̱ aye̱ dide̱ng.”

¹⁹ Ne amaleka'me fe̱ be wu ye, “Mi ne i nye aGyebel. Mi se nasho̱o̱n Adakunom. A min tom nufuan nong tà ka tak Rife̱ Ritek na.

²⁰ Kyo̱o̱rna, wan tà te agbanu, tà kyem i fe̱ kanu baꞌ, ma izen iya ne rife̱ na shining, kamok wan ti no̱o̱k katsak rife̱ mi baꞌ, ri tà shining be katsak ke izen'e nye.”

²¹ Ánerawe daam dide̱ng be kutor aZakariya, kamok aZakariya'me mak a sor dide̱ng kaye̱e̱r agbang kutu kuya Adakunom iben'e.

²² Nizen iya a tá wuruk, a ba kyem a fe̱ kanu be ba baꞌ. Ánerawe ma ren ye Adakunom mu ku tonong ike̱ng ikak kaye̱e̱r agbang kutu'me, kamok a kpaan kufe̱ be ibo̱k, a kyem a fe̱ kanu baꞌ.

²³ Izen kunye itomong wu tá fa gang, a tú bun kari.

²⁴ Nama izen cie̱k ne abining wu Alisabatu be kafa, yong a yiir ine̱se̱k rice wu ma ife̱n itoon.

²⁵ Ayong Alisabatu'e fe̱ ye, “Agwo̱m Ágwo̱m ne a ti nye iyu, nizen na ne a ti tonong ritek wu ne a ni tun kaye̱e̱r isum nasho̱o̱n ánerawe.”

Amaleka fe̱ itak kutes aYeso

²⁶ Nizen iya kafa Alisabatu'me tá se ife̱n igataar, Adakunom tom amaleka wu aGyebel na aNazaret, kaye̱e̱r kuwo̱p kukak niben aGalili,

²⁷ nufe agbik kanamang kakak, ka tá tsang ka sak ka tà nye kuwe̱ne̱ng be aner akak riyerek wu tá nye aYusufu. A nye aner kasa aDauda, a tá nye agwo̱m. Riyerek agbik kanamang'e nye aMarya.

²⁸ Amaleka'me tseng nufu a tá se fe̱ be wu ye, “Dazha, Agwo̱m Ágwo̱m se mak be wan, a ma ka no̱o̱k agbang ritek wu.”

²⁹ aMarya daam dide̱ng be rife̱ wu'me, a yiir kuto̱'me ka akye̱ kuri ashou'ong'e.

³⁰ Ayong amaleka'me fe̱ be wu ye, “Sang wan tu fok inyim baꞌ, aMarya, wan n se̱ ritek Adakunom.

³¹ Wan tà shan kafa, tà tes igon kamitek'e, a tù ku te riyerek ye, aYeso.

³² A tà se yiik, ne a ku yis ye, Igon Adakunom ayiik'e. Agwo̱m Ágwo̱m yir Adakunom tù ku no̱o̱k itsik rigwo̱m atukop wu aDauda.

³³ A tin i nye rigwo̱m nasa aYakub ma izen izen, rigwo̱m wu tà gang ze̱e̱r baꞌ.”

³⁴ Ayong aMarya tú ku rip ye, “I tà san'e ane̱ i tà se anong, sang mi tan ren aner amitek baꞌ e̱?”

³⁵ Ayong amaleka'me fe̱ be wu ye, “Kabik Kazhe̱l'e tin tiik natoon wan ne kukyem Adakunom ka kis. Kamok anong, a tà yis azhe̱l'e ayong, wan tana tes'ong ye Igon Adakunom.

³⁶ Afuri wan Alisabatu, tà se̱ igon ko be riko̱p wu'ong gip, wu aya sang a tá kun tes baꞌ, se be kafa, kufe̱n wu kufe igataar na.

³⁷ Kamok ike̱ng ikak nar agap Adakunom baꞌ.”

³⁸ Ayong aMarya fe̱ be wu ye, “Mi nye asam Adakunom, won i tu se anong be mi kyo̱ndi wan tá fe̱.” Ne amaleka'me tseng a tú ku won.

aMarya tseng nufe Alisabatu

³⁹ Nizen iyong aMarya dorok a tá nye kanye̱k nong a tá tseng zizirik nuwo̱p kukak kaye̱e̱r nawhanang iben aYahuda.

⁴⁰ A no̱ nasa aZakariya nong a tá nye Alisabatu ashou.

⁴¹ Alisabatu tá fa fok ashou aMarya'me ne igon'e, naka borok be agap kaye̱e̱r kafa wu. Ne a shining Alisabatu be Kabik Kazhe̱l'e.

⁴² Ayong Alisabatu tá kuto̱, a tá fe̱ ye, “Wan nye aner aya i ta se̱ ritek Adakunom kaye̱e̱r ányining, igon wan tana tes nye aner aya a ta se̱ ritek Adakunom gip.

⁴³ Akye̱ sak mi se̱ ritek Adakunom ana, ango̱ Agwo̱m Ágwo̱m mi kusum tá be̱ nunaan e̱?

⁴⁴ Kum mi tá fa fok ashou wan, ne igon ka ta se nafa mi naka borok be riye̱ rikan.

⁴⁵ Aner aya a ta se̱ ritek Adakunom ne a nye wan aya i tin no̱o̱k katsak ye, ike̱ng Agwo̱m Ágwo̱m tá fe̱ be wan tà shining.”

Abom aMarya

⁴⁶ Ayong aMarya fe̱ ye, “Riye̱ mi sen kerek Adakunom mi.

⁴⁷ Ne kabik'i nye riye̱ rikan be Adakunom aner kashesh'i.

⁴⁸ Kamok wu ti sak riye̱ ni imees rice asam wu tin se kaye̱e̱r'e. Kyo̱o̱rna ma izen izen, koakye izam tin yis ye, aner aya a ta se̱ ritek Adakunom.

⁴⁹ Kamok wu aya a ta nye ayiik'e min nye agbang ike̱re̱, riyerek wu se zhe̱l.

⁵⁰ Kuro̱ riye̱ wu se natoon áfe a ta fok inyim wu, ma izam izam.

⁵¹ A nye ayiik ike̱re̱ be ibo̱k wu. A sak áfe a ta be kuka tsik kaye̱e̱r aye̱ ba n te shaam.

⁵² A tisik ágwo̱m natoon ítsik rigwo̱m ba, a tiyiik áfe a ta mees rice.

⁵³ A sak áfe a ta fok izong ta whas be ike̱re̱ itek, a ro árum dar ike̱ng ikak.

⁵⁴ A min se̱ asam wu Isarela, ne a yiring be wu a ta fok kuro̱ riye̱ wu,

⁵⁵ ne Ibrahim be nabon wu ma izen izen, kyo̱ndi wu tá fe̱ be áda yir.”

⁵⁶ aMarya sor be Alisabatu kyo̱ndi ife̱n itaar nizham a tá ra kubun kari.

Kutes aYohana aner abatisma

⁵⁷ Izen tá fa nye Alisabatu tana tes igon'e, yong a tes igon kamitek'e.

⁵⁸ Áfegbak wu ne afe iri wu tá fa fok ye, Agwo̱m Ágwo̱m n fok kuro̱ riye̱ wu dide̱ng, yong á tú se̱ mo be riye̱ rikan.

⁵⁹ Nama inom ikara be kutes'e, á be̱ nong á tá nye igon'e izhak, á shim ke á tú yis be riyerek atek wu, aZakariya.

⁶⁰ Amma anyining igon'e fe̱ ye, “Wayo, a tù ku yis ye, aYohana.”

⁶¹ Ayong á fe̱ be wu ye, “Akak kuse kaye̱e̱r afe iri wan á ta be riyerek'ong baꞌ”

⁶² Ayong á rip atek igon'e be ibo̱k ye ka wu shim a tá ye̱re̱k igon'e angan e̱?

⁶³ A fe̱ ye a ru ku no̱o̱k ike̱ng izibir, ne a zibir ye, “Riyerek'e nye aYohana.” Koangan te zhing.

⁶⁴ Nizen iyong aYohana bun a kpaan kufe̱ kanu, yong a san kukerek Adakunom.

⁶⁵ Áfegbak'e te zhing. Ánerawe yiir kufe̱ itak natoon ike̱re̱ na cei niwo̱p i ta se nawhanang niben aYahuda.

⁶⁶ Koangan aya a tá fok itak'e daam kaye̱e̱r riye̱ wu, ne a ma to̱ ye, “Ko̱ igon'e tà te akye̱ e̱?” Kamok kukyem Adakunom se mak be wu.

Abom aZakariya

⁶⁷ A shining ada wu aZakariya be Kabik Kazhe̱l'e yong a nye kuzarap ye,

⁶⁸ “Nakerek nye nafe Ada Adakunom áner Isarela, kamok an be̱ an shesh ánerawe wu.

⁶⁹ A min no̱o̱k yir aner kashesh aya a ta be kukyem, kaye̱e̱r kasa asam wu aDauda.

⁷⁰ Kyo̱ndi wu tá fe̱ ni nanu áner kuzarap wu azhe̱l'e agbugbang'e.

⁷¹ Ye, wu tin shesh yir nubo̱k ámudo̱n yir ne áya a tin di yir kye̱re̱ cei.

⁷² A fok kuro̱ riye̱ áda yir, ne a yiring be rife̱ wu rizhe̱l'e riya sang a tana bur baꞌ,

⁷³ be kushu a tá nye be ada yir Ibrahim ye,

⁷⁴ a tin shesh yir nubo̱k ámudo̱n yir, nong a tin sak yir tà ku nye yir itomong dar inyim

⁷⁵ kaye̱e̱r kuse kuzhe̱l'e ne kunye kutek nasho̱o̱n wu nusor yir cei.

⁷⁶ Wan, igon'i, a tà ka yis ye aner kuzarap Adakunom Ayiik'e, wan tà tseng nasho̱o̱n Agwo̱m Ágwo̱m nong tà nye kanye̱k iren kamok wu.

⁷⁷ A tà no̱o̱k ánerawe wu kuren itak kashesh kaye̱e̱r kure̱ng rine̱n ba,

⁷⁸ kamok kuro̱ riye̱ Adakunom yir, ne akanang kashesh a ta ne naza tin wuruk ni yir

⁷⁹ nong ku ta tonong áfe a ta se kaye̱e̱r awhi be áfe a ta se na nawu riku akanang. Ne a ni tonong yir iren i ta be̱ be kameneng riye̱.”

⁸⁰ Ne igon'e rasak, ne ka kpa agap kaye̱e̱r Kabik. A sor kaye̱e̱r katse ma izen iya a tin wuruk kanang natoon ánerawe Isarela.