aKolosi 3 - Izere New Testament

Kusor zhe̱l

¹ Kum a tá ma ka dorok yin mak be aKiristi, to̱, ni te yin riye̱ natoon ike̱re̱ iya i ta se kaye̱e̱r kaza, naro̱ aKiristi ta mu ku sonong nabas kubo̱k riya Adakunom.

² Ni te yin riye̱ natoon ike̱re̱ iya i ta se kaye̱e̱r kaza sang ife kazatse baꞌ.

³ Kamok yin tsang i kus yin, kutser yin se nune̱re̱ng nufe aKiristi kaye̱e̱r Adakunom.

⁴ Nizen iya aKiristi, aya a ta nye kutser yin, tana wuruk de̱s, yin gip, yin ta wuruk yin de̱s mak be wu kaye̱e̱r kuyiik wu.

⁵ Kamok anong ni tun yin riye̱ natoon ike̱re̱ kazatse na, ike̱re̱ kyo̱ndi, kunye rikuna be kunye kpe̱de̱ng be rinyisi rikan be amaan kuse ne amaan kudi ike̱ng, iyong gip i se kyo̱ndi ku kuus itsi.

⁶ Kamok amaan kunye'ong ne riye̱ kubeseng Adakunom sen ni tiik natoon ánerawe.

⁷ Yin be rice yin, tsang i nye yin ike̱re̱ na, nusor yin gbugbang.

⁸ Amma kyo̱o̱rna, kam yin be ike̱re̱ kuri iyuna cice̱r dim. Won yin riye̱ kubeseng be riye̱ rife ne amaan kuto̱ro̱ng ne ritok be amaan rife̱.

⁹ Sang tu naka bo̱s yin abo̱o̱s baꞌ, kum yin tan kam yin be kuse yin kufe agbugbang ne amaan kunye'ong,

¹⁰ nong i ta sok yin kuse kufas. Iyu ne i nye aner afas, aya Adakunom, aner a ta nye'me, yiir shishing'e nong a tu ku tas nong a ta sak yin tù ku ren yin dide̱ng.

¹¹ Kamok anong sang tu ye̱re̱k yin ye áner aYahuda se ze̱e̱r be áner aya sang á ta won dar á nye áner aYahuda baꞌ. Áya a tá mu ku nye ba izhak ka áya a tá won dar a ka nye ba izhak baꞌ. Aner aya a ta nye kye̱re̱ se ze̱e̱r be aner aya a ta won dar a karak rice baꞌ. Asam se ze̱e̱r be igon kari baꞌ, kamok aKiristi ne a nye koakye ne a se kaye̱e̱r koakye.

¹² Kamok anong, kyo̱ndi ánerawe áya Adakunom tá kasa, ázhe̱l'e ne áfe riye̱ wu, naka kis yin be kuro̱ riye̱ ne kuse kutek be ku mees rice ne kuse tatan ne ku naka tsesek.

¹³ Naka tsesek yin be áfudang yin, ke akak kaye̱e̱r yin nye afudang wu rine̱n ne a ku re̱ng'e. Naka re̱ng yin rine̱n yin kyo̱ndi Agwo̱m Ágwo̱m ta ka nye yin'e.

¹⁴ Natoon ike̱re̱'ong, nibarang yin kushim iyong ne i gung ike̱re̱'me cice̱r kaye̱e̱r kugung rice kutek.

¹⁵ Won kameneng riye̱ aKiristi tin nye rigwo̱m kaye̱e̱r aye̱ yin. Kamok kyo̱ndi kuro̱m kuzining ne a tá yis yin nong ta sor yin áfe caang. Sor yin áfe kunye riye̱ rikan be Adakunom koakye izen.

¹⁶ Won rife̱ aKiristi tu nyeseng be agap dide̱ng kaye̱e̱r aye̱ yin, ne i naka bo̱so̱p yin'e, ne i naka nyesek yin ibo̱ro̱ng, be koakye kuri kukyem, ne i bom yin abom aZabura, ne i kerek yin Adakunom, ne i bom yin abom afe a ta nye afe Kabik, ne i nye yin riye̱ rikan kaye̱e̱r aye̱ yin be Adakunom.

¹⁷ Koakye ike̱ng iya yin tana nye yin, ko kaye̱e̱r kufe̱ kanu ko kaye̱e̱r kunye ike̱ng, nye yin cice̱r kaye̱e̱r riyerek aYeso Agwo̱m Ágwo̱m, ne i tonong yin Adakunom riye̱ rikan kamok wu.

Kusor kasa áfikuus

¹⁸ Yin ányining iwe̱ne̱ng kuus yin ike̱ng iya atek yin ta fe̱ be yin, i se gye̱r ta nye yin anong kamok yin nye yin áfikuus.

¹⁹ Yin átekasa, shim yin ányining yin, tu se yin hash be ba baꞌ.

²⁰ Yin inoon, fok yin áda be ángo̱ yin kuto kaye̱e̱r koakye kuri ike̱ng, kamok ike̱ng Agwo̱m Ágwo̱m ta shim'ong.

²¹ Yin átek inoon, tu mak i firik yin inoon yin baꞌ, nong fan á bu te dar ifeng.

²² Yin ásam, fok yin atek kasa yin kuto kaye̱e̱r koakye kuri ike̱ng. Sang tu nye yin kamok ba ta min sak anyisi natoon yin baꞌ, ye nong ase̱ a ta ka kerek yin tsek baꞌ. Amma nye yin be riye̱ rizining kyo̱ndi áner a ta fok inyim Agwo̱m Ágwo̱m.

²³ Koakye ne yin ta nye yin, nye yin be riye̱ rizining kamok yin sen nye yin Agwo̱m Ágwo̱m'me sang anerawe'me baꞌ.

²⁴ Kum yin ta ren yin ye Agwo̱m Ágwo̱m ta ka karang yin ishorong yin be kutse yin tana ya yin. Kamok aKiristi Agwo̱m Ágwo̱m ne yin sen ku nye yin itomong.

²⁵ Aner aya ne a nye amaan ike̱ng iya a tù ku karang'e be imaan'e, kamok sang Adakunom be kushim rice baꞌ.