aKolosi 1 - Izere New Testament

Ashou

¹ Mi aBulus, aya Adakunom tá kasa nong a tá te amanzo aYeso Kiristi, mak be aronyining yir aTimoti ne i ta zibir yin kufumung na,

² yin ároneng ázhe̱l'e, aya a ta be katsak áya a ta se na aKolosi. Ritek be kameneng riye̱ Adakunom a ta nye Ada yir se mak be yin.

Riye̱ rikan ne aduwa

³ Yir tonong yir Adakunom riye̱ rikan yir ye̱rye̱r, Ada Agwo̱m Ágwo̱m yir aYeso Kiristi, nizen iya yir tá sen nye yir aduwa kamok yin.

⁴ Kamok yir n fok yir kuri kuno̱o̱k katsak yin ta be yin kaye̱e̱r aYeso Kiristi ne kuri kushim kuya yin ta shim yin ázhe̱l'e cice̱r.

⁵ Yin nye yin anong kamok yin min te yin riye̱ natoon ike̱re̱ itek iya a ta ma ka sak yin'e kaye̱e̱r kaza. Iyuna ne i nye itak katsak iya a tá ka tak yin kum ni ime̱se̱ng'e, Rife̱ Ritek, a tá ka tak yin ame.

⁶ Rife̱ Ritek na sak ánerawe shining ne áya kasho̱o̱n kaye̱e̱r kazatse cei, kyo̱ndi ri tá nye kaye̱e̱r yin kum nizen ife yin tá san ku fok yin itak ritek Adakunom, ne i ren yin ye i nye katsak.

⁷ Abafaras, afudang itomong yir a tá nye asam Adakunom kyo̱ndi yir gip, aya a ta be katsak kaye̱e̱r itomong aKiristi ne a be̱ a tá ka tak yin Rife̱ Ritek'e, a nye itomong'e rice yir.

⁸ Wu ne a ti tak yir kuri kushim kuya yin ta shim yin anerawe kaye̱e̱r Kabik.

⁹ Kamok anong ne isak kum nizen iya yir tá fok yir itak natoon yin, yir won kunye yir aduwa kamok yin baꞌ. Yir nye yir izong ye Adakunom ra ka tonong yin ike̱ng iya wu ta shim dim nong ase̱ yin ta se̱ yin kukyem Kabik, ne i ren yin ike̱ng kunye.

¹⁰ Yir nye yir aduwa nong ase̱ yin ta sor yin kusor kuri kuya ku ta tas kufe áfikuus Agwo̱m Ágwo̱m ne i nye yin ike̱re̱ iya i tana ku kare̱p riye̱ na koakye kuri iren. Kuri kusor yin ta sor yin ta tonong ye kuse kutek ne yin ni barang yin kurasak kaye̱e̱r kuren Adakunom.

¹¹ Yir bun i nye yir aduwa ye yin ta te yin gbugbong be ayiik kukyem wu nong yin ta se̱ yin ku naka tsesek ne i yiir yin aye̱. Won yin tu sor yin áfe riye̱ rikan,

¹² ne i yiir nye yin riye̱ rikan be Ada, kamok wu ne a sak yir ta kyem i te yir áfe kuya kutse ike̱re̱ na, iya a tá nye kamok ázhe̱l'e kaye̱e̱r rigwo̱m akanang.

¹³ Kamok wu ne a ti tun yir kaye̱e̱r rigwo̱m awhi, a tá tseng be yir kaye̱e̱r rigwo̱m Igon wu kaya wu ta shim.

¹⁴ Kamok wu ne yir tin se̱ yir kashesh a tin re̱ng yir rine̱n yir.

Kuyiik aKiristi

¹⁵ aKiristi ne a nye aner aya a ta tas Adakunom afe sang a tu ku di baꞌ, wu ne a nye igon ime̱se̱ng'e kaye̱e̱r ike̱re̱ Adakunom tá nye cice̱r.

¹⁶ Kamok be wu ne Adakunom nye ike̱re̱ cice̱r, iya i ta se kaye̱e̱r kaza be iya i ta se kaye̱e̱r kazatse, iya a ta di be iya sang a ta kyem a di baꞌ. Be wu ne Adakunom nye koakye ike̱ng i ta be kukyem kaye̱e̱r kaza, be áko̱k kasho̱o̱n ne áfe rigwo̱m cei ne ike̱re̱ Adakunom tá nye cice̱r, a nye mak be wu ne kamok wu.

¹⁷ aKiristi tu se ni ime̱se̱ng'e nizham a tá ra nye koakye, kamok wu ne ike̱re̱ cice̱r se na gung.

¹⁸ Wu ne a nye rice kuro̱m'e ku ta nye áfikuus cice̱r. Wu ne a nye ritin'e ne a nye ime̱se̱ng'e kaye̱e̱r áya a tá san kudorok nure̱k, nong a se̱ kaye̱e̱r koakye wu ne a ta nar be kuyiik.

¹⁹ Adakunom be riye̱ rikan kamok kuse wu cice̱r ta se kaye̱e̱r Igon wu.

²⁰ Kamok wu ne Adakunom bun a tu ku bun be ike̱re̱ wu tá nye cice̱r nufu, ike̱re̱ i ta se kaye̱e̱r kazatse be kaye̱e̱r kaza. A ti be̱e̱n yir kameneng riye̱ be kunyosong naso̱k Igon wu natoon kukon.

²¹ Gbugbang, yin tsang i se yin gugo̱k be Adakunom ma i te yin ámudo̱n wu kaye̱e̱r aye̱ yin kamok amaan kunye yin.

²² Amma kyo̱o̱rna Adakunom mu ku bun be yin kamok riku aKiristi nuro̱m nong yin ta se yin zhe̱l nasho̱o̱n Adakunom dar rizik, dar kufe̱ imaan'e natoon yin,

²³ ke yin ya yin kasho̱o̱n be kuno̱o̱k katsak yin, ne i nyeseng yin kpa natoon'e. Sang tu won yin a ta ka zuur yin ma ta won yin ku ni te riye̱ riya yin ta min te yin nizen iya yin tá fok yin Rife̱ Ritek'e baꞌ. Rife̱ Ritek yin tá tsang i fok yin'ong ne a taas koakye kuri ánerawe á ta se nazatse ne mi aBulus ti te aner itomong'e.

Itomong aBulus tá nye áfikuus'e

²⁴ Mi be riye̱ rikan kyo̱o̱rna be risam mi ta so̱ natoon yin, nong kamok risam'me mi tà shining ike̱ng iya i tà rusek kaye̱e̱r risam aKiristi tá so̱ kamok kuro̱m wu ku ta nye ikilisiya.

²⁵ Adakunom ne a ti kasa nong ta te asam ikilisiya nong ta nye awazi rife̱ Adakunom mumak,

²⁶ riya ri ta se nune̱re̱ng aye̱ be aye̱ ne izam izam amma kyo̱o̱rna an te̱s ázhe̱l'e.

²⁷ Ba di ye Adakunom tá kasa ba nong á ta taas áner aya sang á nye áner aYahuda baꞌ, ku yiik ku ta se nune̱re̱ng, ike̱ng iya a ta ren'e baꞌ, nye aKiristi a ta se kaye̱e̱r yin. Iyong tonong ye yin ta sor yin mak be wu kaye̱e̱r kuyiik'e.

²⁸ Iyong ne i sak yir ta taas yir itak aKiristi, yir kpam yir koangan ne ibo̱so̱p yir ánerawe'me be koakye kuri kukyem yir nong ta tseng yir be koangan mumak kaye̱e̱r aKiristi.

²⁹ Kamok anong ne mi nye itomong ma i ti te iso̱r be kuri agap aya aKiristi tin no̱o̱k, aya a ta nye itomong dide̱ng kaye̱e̱r'i.