aGalati 6 - Izere New Testament

Tonong yin koangan kuse kutek

¹ Ároneng, ke yin se̱ yin akak afe a ta yiir kunye rine̱n, yin áfe i ta nye yin afe Kabik, ku bun yin be wu niren kaye̱e̱r awhiwhe̱, amma sak yin riye̱ be rice yin, ke anong baꞌ, yin gip ta bun tin no̱ yin kaye̱e̱r rine̱n'e.

² Naka tobok yin kaye̱e̱r risam yin, be anong ne yin ta shining yin ike̱ng iya Itsi aKiristi ta fe̱.

³ Ke aner akak di ye wu nye ike̱ng ikak, amma sang i ra se anong baꞌ, a wo̱ro̱k rice wu.

⁴ Koangan ra ye̱re̱k itomong wu a ta di, nizham a ta rin tsor kafok natoon'e, sang a tin maas rice wu be ife akak baꞌ.

⁵ Kamok i se gye̱r koangan tin ne̱ na acer wu.

⁶ Koangan afe a tu ku bo̱so̱p rife̱ aKiristi, ra kasap ike̱re̱ wu itek, be aner aya a tu ku bo̱so̱p'e.

⁷ Sang tu wo̱k yin rice yin baꞌ, a ta kyem a wo̱ro̱k Adakunom baꞌ. Ike̱ng anerawe ta tuus, iyong ne a ta se̱.

⁸ Aner aya a ta tuus ike̱ng kaye̱e̱r kuse rinerawe, iyong tà tseng be wu riku. Amma aya ne a tuus kaye̱e̱r Kabik, a tà se̱ kutser kufe izen izen.

⁹ Kamok anong sang tu ro̱n yir be kunye kutek baꞌ, kamok izen saase ife i tana se̱ yir ishorong itomong yir, ke yir te yir wa baꞌ.

¹⁰ To̱, kamok anong, ke i se̱ yir izen, i tonong yir koangan kuse kutek, abaan áfikuus baꞌ.

Rife̱ rife igang'e

¹¹ Di yin kuri izibir'i igbang'e mi ta ka zibir yin'e be kubo̱k'i.

¹² Áner aya a ta shim yin tu ku di ba kyo̱ndi ba nye ike̱ng ikak, a shim a ta ka sak yin ta nye yin izhak. Ike̱ng i ta sak ba ta nye anong, nye fan a ba ka tabak ba kamok itak kutigak aKiristi.

¹³ Áfe a tu ku nye ba izhak'e gip, kuus Itsi'me baꞌ, gip be anong ba shim ke yin nye yin nong ba tin nye kuka ni yin.

¹⁴ Adakunom rin roon kuka ma ke mi tin ya kuka be kutigak Agwo̱m Ágwo̱m yir aYeso Kiristi nukon, be riku wu ne mi ku ni ike̱re̱ kazatse na, ne ike̱re̱ kazatse ne ku ni mi.

¹⁵ Ke kunye izhak be ku won dar kunye'me nye ike̱ng ikak baꞌ, ike̱ng iya i ta nye igbang'e nye nong ta te aner afas.

¹⁶ Won kusor kutek be kuro̱ riye̱ Adakunom tu se be afe a ta kuus iren na, ba ne a nye aner Isarela afe Adakunom áfe katsak.

¹⁷ Ni igang'e ároneng, akak yin tú ba daam ike̱ng ikak baꞌ, ye kamok íbin íya mi ta be nuro̱m mi baꞌ. I tonong ye mi nye asam aYeso.

¹⁸ Ároneng, ritek Agwo̱m Ágwo̱m yir aYeso Kiristi se mak be yin cice̱r. Anong!