aGalati 5 - Izere New Testament

Kusor ne̱k kaye̱e̱r aKiristi

¹ Kamok nong ta sor yir ne̱k ne i sak aKiristi ti tun yir kaye̱e̱r kukuus Itsi. Kamok anong nyeseng yin be agap, sang tu ba sor yin kyo̱ndi ásam baba baꞌ.

² To̱, yin di yin wa! Mi, aBulus, ne i fe̱ be yin, ke yin shim a ta ka nye yin izhak i nye ye yin se̱ yin ike̱ng ikak nufe aKiristi baꞌ.

³ Mi bun i fe̱ be koangan afe a ta shim a tu ku nye izhak ye ke a ta kuus Itsi to̱, ma a ra kuus Itsi'me cice̱r dim.

⁴ Yin áfe i ta shim ta sor yin kyo̱ndi azhe̱l'e nasho̱o̱n Adakunom kamok i kuus yin Itsi, tonong ye yin kam yin be aYeso ne ritek Adakunom.

⁵ Yir te yir riye̱ ye Adakunom ta sak yir ta te yir azhe̱l'e ike̱ng ife i ta sak yir ta tor yir nye Kabik Adakunom kaya ka ta nye itomong kaye̱e̱r kuno̱o̱k katsak yir.

⁶ Kamok ke yir se yir kaye̱e̱r aYeso Kiristi, ku nye yir izhak ka ku won dar ku nye'me, sor ike̱ng ikak baꞌ, ike̱ng i ta nar nye kuno̱o̱k katsak a ta kyem a di kaye̱e̱r kushim.

⁷ Yin tsang i ya yin kasho̱o̱n gye̱r. Angan a ta roon yin kukuus katsak'e e̱?

⁸ Kunye kuri kuyong nye kufe Adakunom aya a ta ka yis yin baꞌ.

⁹ Kyo̱ndi a ta man ne a fe̱ ye, “Kabayisti cie̱k ne ka sak ku abiredi kusum ta dorok.”

¹⁰ Mi ti no̱o̱k katsak na Adakunom be riye̱ rizining ye yin ta kirik yin nong ta kuus yin rife̱ rikak ze̱e̱r baꞌ. Aner a ta sak yin ta te yin titak ta fok be amok, ko a tu nye angan.

¹¹ Ároneng, ke mi ru nye awazi natoon kunye izhak, to̱, akye̱ sak a ta ru ni tabak e̱? Ke i nye ye anong, i nye ye Rife̱ Ritek mi ta fe̱ natoon riku aKiristi nakon ta sak akak tin tu atak baꞌ.

¹² Akye̱ fa sak áfe a ta ka daam yin'ong ta ya kasho̱o̱n nong a ta tse̱k rimetek ba nigaan'e.

¹³ Ároneng, a ta yis yin nong ta sor yin ne̱k, amma sang tu sok yin kusor ne̱k'e nong i ta sor iren afe yin tana nye yin ike̱re̱ iya kuro̱m yin ta shim baꞌ, amma naka tobok yin kaye̱e̱r kushim.

¹⁴ Kamok Itsi fe̱ natoon ike̱ng izining ye, “Shim afegbak wan kyo̱ndi rice wan.”

¹⁵ Amma ke yin yiir ko̱ro̱ng yin ne i naka ros yin kyo̱ndi agabu, sak yin riye̱ ke anong baꞌ, cice̱r yin ta wei yin.

Kabik Adakunom be kuse rinerawe

¹⁶ Ike̱ng mi tin fe̱ nye ye, i ri won yin Kabik Adakunom ta ka ko̱k yin kuse̱, nong fan yin bu kuus yin kuse rinerawe.

¹⁷ Kamok kuse rinerawe shim ike̱re̱ iya i ta nye ife Kabik baꞌ ne Kabik shim ike̱re̱ iya i ta nye ife kuro̱m baꞌ. Kuse iri ifa na nye aner be amudo̱n. Iyong ne isak yin kyem i nye yin ike̱re̱ yin ta shim ke i nye yin baꞌ.

¹⁸ Amma ke Kabik ne ka ta ko̱k yin kuse̱, Itsi ba be ike̱ng ikak natoon yin baꞌ.

¹⁹ Kuse rinerawe se de̱s, kunye ike̱re̱ kyo̱ndi: rikuna be amaan kuse, ne kunye kyo̱ndi agabu,

²⁰ ne kukuus ike̱re̱ itsi be rikur. Ánerawe naka di kye̱re̱ ne á ko̱ro̱ng ne á naka shishim, be riye̱ kubeseng dide̱ng, ne kushim rice be ku naka kaa ne kuwon dar kugung rice,

²¹ be rishishim ne kufeng ne a na ka yis naro̱ kazining nong a ta ya ne a so̱ ne a nye kyo̱ndi agabu ne a nye ike̱re̱ ikak kyo̱ndi anong. Mi ta ko̱ro̱k yin kuto kyo̱ndi mi tà tsang i fe̱ ye áfe a ta nye ike̱re̱ kuri iyuna ta no̱ kaye̱e̱r rigwo̱m Adakunom baꞌ.

²² Amma kuse kuri kufe Kabik nye: kushim ne riye̱ rikan be kameneng riye̱ ne ku naka tsesek ne kuse kutek be kunye kutek ne kunye katsak,

²³ be kuse whiwhe̱ ne ku yiir rice. Itsi ikak kuse i ta roon ike̱re̱ na baꞌ.

²⁴ Áfe a ta nye afe aYeso Kiristi n fe̱r kuse rinerawe be kunye amaan ike̱re̱ iriri'me ne iya kuro̱m ta shim.

²⁵ Kum Kabik ne ka tin no̱o̱k yir kutser, won kabik'e tin ko̱k yir kuse̱.

²⁶ I tu kok yir rice yir naza ka ne i na beseng yir aye̱, ka ne i naka shishim yir baꞌ.