aGalati 4 - Izere New Testament

¹ Mi fe̱ ye, kum ke i nye ye aya kutse'me rusek igon, to̱ i nye ye a kam be asam baꞌ, wu ne a ta ya kutse'me gye̱r gye̱rtatan.

² Ne a rusek igon a se nibo̱k áfe ku ni sak riye̱ ni wu be áfe a tu ku won nibo̱k ba, ma izen iya ada wu tù ku sak'e.

³ Anong ne i se gip, nizen iya i ta ru nye yir inoon, i se yir kaye̱e̱r risam ku kuus igo̱o̱n kazatse na

⁴ Amma izen'e ta fa shining Adakunom tom igon wu, aner abining tá tes nizen Itsi aner aYahuda tá ru nye itomong,

⁵ nong ase̱ a ta shesh áya a ta kuus Itsi, nong yir ta sor yir inoon Adakunom.

⁶ Kamok yin ta nye yin inoon wu, yong Adakunom tom Kabik Igon wu kaye̱e̱r aye̱ yir, Kabik'e ta kuto̱ ye “Abba, Ada.”

⁷ Kamok anong, wan ba nye asam baba baꞌ, amma wan nye igon, kum wan ta nye igon, Adakunom ma ka sak wan n te aya kutse gip.

aBulus daam kamok áfe aGalati

⁸ Nizen iya yin ta tsang i ren yin Adakunom baꞌ, yin nye yin ásam nike̱re̱ iya nuse ba i ta nye Adakunom afe katsak baꞌ.

⁹ Amma kyo̱o̱rna yin ta ren yin Adakunom be katsak, ka a ta fe̱ ye Adakunom ta ren yin, akye̱ sak yin bun i sen kuburung yin na kpe̱de̱ng igo̱o̱n i ta won dar i be agap anong e̱? Yin bun i shim yin, ta te yin ásam ba gbak a?

¹⁰ Yin ti yiik yin inom ikak ne ife̱n ikak ne izen ikak be aye̱ akak ne i nar yin'e.

¹¹ Anong ti no̱o̱k inyim, mi di ye risam mi tin so̱ ni yin te riduk'e.

¹² Ároneng, mi ta nye yin izong, te yin kyo̱ndi mi, kamok mi n te kyo̱ndi yin. Yin min beseng yin ike̱ng ikak baꞌ.

¹³ Kyo̱ndi yin ta ren yin, kamok mi ta nye atser baꞌ, ne mi be̱ ni ime̱se̱ng'e nong ta ka tas yin Rife̱ Ritek'e baꞌ.

¹⁴ Kuro̱k'i sor ike̱ng kudaam nufe yin, gip be anong yin ti tonong yin akye̱re̱ ka kuzhe̱e̱sh baꞌ. Amma yin ban i ti shan yin ibo̱k ifa, kyo̱ndi mi nye amaleka Adakunom, ka mi ne i nye aYeso Kiristi'me.

¹⁵ Yin se yin kaye̱e̱r riye̱ rikan, yong akye̱ ta se̱ yin e̱? Mi ta kyem i taas ye ke a fa fe̱ ye yin ta kyem i turung yin ányisi yin tin no̱o̱k yin, ke yin nye yin anong.

¹⁶ Mi n te amudo̱n yin kyo̱o̱rna kamok mi ta ka taas yin katsak'e a?

¹⁷ Áfe kubo̱so̱p ánerawe abo̱o̱s'ong tonong ye ba ka shim yin amma kunye kufe katsak baꞌ. Ike̱ng ba ta shim nye nong á ta ka kam yin be yir, nong ase̱ yin tu ku shim yin ba dide̱ng.

¹⁸ I se gye̱r kushim tuse anong ke kushim'e nye kufe katsak, i tuse anong akye̱ izen, sang ma mi se be yin tsek baꞌ.

¹⁹ Inoon'i naya mi ta sen niso̱ risam kyo̱ndi aner abining ta te̱s ma yin te yin kyo̱ndi aKiristi.

²⁰ Akye̱ fa nye mi se mak be yin kyo̱o̱rna, ke mi ren ike̱ng i tana fe̱ be yin, kamok mi daam be yin dide̱ng.

Kumaas natoon aHazhara be aSaratu

²¹ Ni tak yin, yin áfe i ta shim yin Itsi tin nye rigwo̱m natoon yin, yin ren yin ike̱ng iya Itsi'me tin fe̱ aꞌa?

²² I se ni izibir ye Ibrahim be inoon nafa. A tes kazining be kanamang kasa wu ne a tes kakak be atuk abining wu.

²³ A tes igon wu be abining a tá nye asam'me kyo̱ndi á tan me̱ ne á tes inoon nakak tsek, amma a tes igon wu be atuk abining wu aSaratu'me nong a tá shining ike̱ng Adakunom tá tsang a no̱o̱k kuto̱.

²⁴ A ta kyem a sok ike̱re̱ na kyo̱ndi kumaas kamok ányining afa na sor kushu kufa. Kushu kuzining Adakunom no̱o̱k nawhanang aSinai, áfe a ta kuus kushu'me nye ásam. Kushu kuyu se kyo̱ndi aHazhara be inoon wu.

²⁵ aHazhara'me sor kyo̱ndi kawhanang aSinai niben Arabiya, afe a tana bun a sor kyo̱ndi agbang kuwo̱p aUshalima kufe kyo̱o̱r kamok kuwo̱p aUshalima'me be inoon wu nye asam.

²⁶ Amma aUshalima afe a ta se naza se nye̱k, wu ne a nye ango̱ yir.

²⁷ I se ni izibir ye, “Nye riye̱ rikan wan abining, afe sang i tá tes baꞌ. Ta kukun riye̱ rika wan afe sang i ta kun fok kuro̱ kutes baꞌ, kamok inoon abining aya amitek wu tú ku won, se whe̱r ne na nar nafe abining aya a ta be amitek.”

²⁸ To̱ kyo̱o̱rna ároneng, yin nye yin inoon nafe Adakunom tin no̱o̱k kuto̱ natoon'e kyo̱ndi Ishaku ta se.

²⁹ Nizen iyong igon kafe a tá tes kyo̱ndi a tan me̱ ne a tes mama tabak igon kafe a tá tes be kukyem Kabik Adakunom anong ne i be yir kyo̱o̱rna gip.

³⁰ Amma akye̱ ne kufumung rife̱ Adakunom fe̱ e̱? Rife̱ ye, “Ro abining afe a tá nye asam'me be igon wu, kamok igon asam'me tà ya kutse be igon atuk abining wan baꞌ.”

³¹ Kamok anong ároneng, yir nye yir inoon abining afe a tá nye asam baꞌ, amma yir nye yir inoon nafe abining afe a tá sor ne̱k.