Afisa 4 - Izere New Testament

Kugung rice kaye̱e̱r aKiristi

¹ Kamok anong, mi aya mi ta se nitso̱m kamok mi ta kuus Agwo̱m Ágwo̱m, mi ta nye yin akusuk ye yin ra sor yin kusor kutek kuya ku ta se kyo̱ndi agbang kuyis kuya a tá ka yis mo yin.

² Mees yin rice yin ne i se yin tatan. Te yin ata naye̱ ne i naka be yin kaye̱e̱r kutatan kushim.

³ Nye yin koakye yin tana kyem i nye yin nong ta ya yin kasho̱o̱n be kugung rice kaye̱e̱r Kabik kamok kusor caang ne ku ta ka gung yin.

⁴ Yir se yir kyo̱ndi kuro̱m kuzining ne Kabik Kazhe̱l'e se kazining. Anong ne yin be yin ku ni te riye̱ kuzining kuya a tá ka yis mo yin.

⁵ Agwo̱m Ágwo̱m se azining, kuno̱o̱k katsak se kuzining, abatisma se azining.

⁶ Adakunom se azining, wu ne a nye Ada yir cice̱r. Wu ne a se natoon yir cice̱r, ne a ninye itomong be yir cice̱r ne a se kaye̱e̱r yir cice̱r.

⁷ Amma a no̱o̱k koangan yir kunang ritek aKiristi kaye̱e̱r kushim wu.

⁸ Kyo̱ndi rife̱ Adakunom ta fe̱ ye, “Izen iya a tá ngarak naza a sok áya wu tá yising ne a no̱o̱k ánerawe kunang iriri'me.”

⁹ Akye̱ nye ye “a ngarak e̱?” I tonong ye, ni ime̱se̱ng'e a se tsik ma kaye̱e̱r kaben!

¹⁰ Wu aya a tá tiik'e ne a nye aya a tá bun a ngarak ring ring natoon kaza, nong a ta shining koakye naza be kaben be kukyem wu.

¹¹ Wu ne a no̱o̱k ákak kunang ku te ámanzo ne ákak te áner kuzarap ne ákak sor áfe kutaas Rife̱ Ritek ne ákak te áner á tanin sak riye̱ na ánerawe be áner kubo̱so̱p ánerawe'me.

¹² A nye anong, nong a tá nye kanye̱k áner Adakunom tu ku nye itomong ne a no̱k kuro̱m aKiristi.

¹³ Be anong ne yir cice̱r i se̱ yir kuno̱o̱k katsak kuzining natoon Agwo̱m Ágwo̱m ne i te yir azining natoon kuren Igon Adakunom. Yir ta te yir áner aya a tan te ánerawe nong ta se yir natoon kagarang kaya ka ta se gye̱r kyo̱ndi aKiristi.

¹⁴ Yir ta ba se yir kyo̱ndi inoon nazhizhe̱k'e, á tana kuzim ba baꞌ, a ta ka zim ba aze be aza be koakye kuri kubo̱so̱p ne kuri rife̱ ritse̱ng a tin wo̱ro̱k ánerawe baꞌ.

¹⁵ I ban i fe̱ yir katsak kaye̱e̱r kushim ne i rasak yir cei kaye̱e̱r koakye kuri ike̱ng kaye̱e̱r wu, aKiristi aya a ta se kyo̱ndi rice nuro̱m anerawe.

¹⁶ Wu ne a gung ikap kuro̱m'e cei, kuro̱m'e sor nagung kamok koakye ifun be ikap kuro̱m'e rasak ne i no̱k rice wu kaye̱e̱r kushim kamok koakye ikap kuro̱m'e ta nye itomong wu.

Sor yin kyo̱ndi inoon akanang

¹⁷ Kamok anong, mi ta ko̱ro̱k yin kuto kaye̱e̱r riyerek Agwo̱m Ágwo̱m ye, sang tu ba sor yin kyo̱ndi áfurin ta sor be kuri kuto̱ro̱ng ba kufe rifunam baꞌ.

¹⁸ Kuren ike̱ng ba se whi ne á be kutser kufas kuri kuya Adakunom ta nyesek baꞌ, kamok kuri agbik rice ba ta be ne kushonong ba.

¹⁹ Á te be rice ba dar isum. Á no̱o̱k rice ni inye ike̱re̱ isum, á be shim kunye ike̱re̱ ife isum dide̱ng.

²⁰ Iyong ne i nye ike̱ng yin tá bo̱so̱p yin natoon aKiristi baꞌ.

²¹ Katsak'e, yin a ta tak yin itak wu ne a ka bo̱so̱p yin rife̱ katsak natoon aYeso.

²² A tá bo̱so̱p yin'e natoon ye yin riwon yin kuri kuse yin kufe agbugbang nong ta kam yin be kuse yin kuzen ku ta nye kumaan'e, ku ta ka wo̱ro̱k yin i ta nye yin kushim riye̱ yin ma ku ta ra beseng yin.

²³ Fa gye̱ ke yin shishing yin kuto̱ro̱ng yin nong ku ta te kufas.

²⁴ Sok yin kuse kufas'ong, kuya Adakunom ta nye, ku tu ku tas, ku ta se kaye̱e̱r katsak ne kuzhe̱l kusor.

²⁵ Kamok anong koangan kaye̱e̱r yin ra won naborok nong a tà tak afegbak wu katsak, kamok cice̱r yir i nye yir áner aner azining.

²⁶ Ke riye̱ yin beseng sang tin nye yin rine̱n baꞌ, sang akak tu won kunom tu kpa ne wu rusek be riye̱ kubeseng'e baꞌ.

²⁷ Sang tu no̱o̱k yin Amaan Aner iren, ko cie̱k baꞌ.

²⁸ Aner a ta tsang a nye itsang tu ba nye baꞌ, a ra nye itomong ne a nye ike̱ng ikak itek be ibo̱k wu nong a ta se̱ ike̱ng ikak a tana nang aya sang a tà be baꞌ.

²⁹ Sang akpe̱de̱ng rife̱ tu wuruk kaye̱e̱r kanu yin baꞌ, amma fe̱ yin rife̱ ritek riya ri tana no̱o̱k ákak kuya kasho̱o̱n natoon ike̱ng ba ta sen tse̱r'e nong áfe a ta ka foos'e ta se̱ kutobok.

³⁰ Sang tu beseng yin Kabik Adakunom Kazhe̱l'e riye̱ baꞌ, kamok be wu ne a ta te mo yin izizo̱ nong ta sor yin afu ma katuk a tana shesh ánerawe.

³¹ Kam yin be koakye kuri riye̱ riwe be riye̱ rife ne riye̱ kubeseng be kuren be ritok ne koakye kuri amaan kunye.

³² Sor yin gye̱r be áfudang yin, naka di yin be kuro̱ riye̱ ne i naka nye yin igaas kyo̱ndi Adakunom ta ka re̱ng yin rine̱n yin kaye̱e̱r aKiristi.