Afisa 3 - Izere New Testament

Itomong aBulus kaye̱e̱r áya sang á ta nye áner aYahuda baꞌ

¹ Kamok anong, mi aBulus a min te nitso̱m kamok aYeso aKiristi ne kamok yin áya sang yin ta nye yin áner aYahuda baꞌ.

² Mi ren tse̱ng tse̱ng ye yin n fok yin kuri ritek Adakunom tin no̱o̱k nong tin nye itomong na kamok yin.

³ Iyong ne i nye ike̱ng Adakunom tin te̱s'e kaye̱e̱r kanye̱k wu kaya sang akak ta ren baꞌ, kyo̱ndi mi tá tsang i ka zibir yin'e cie̱k.

⁴ Kum yin tan fa yin, yin ta kyem i se̱ yin akanang ike̱ng ife mi ta ren natoon kuse aKiristi.

⁵ Gbugbang sang a taas ánerawe itak'e, kyo̱ndi Kabik Adakunom'me tá taas ámanzo azhe̱l ne áner kuzarap azhe̱l'e kyo̱o̱rna baꞌ.

⁶ Kanye̱k'e se ye kamok kutaas Rife̱ Ritek Adakunom, nong áner aya a ta nye áner aYahuda baꞌ ta se̱ kuya kutse mak be áner Isarela. Ba te kyo̱ndi aner azining ne á se̱ kukap mak be áner Isarela, kaye̱e̱r ike̱ng iya Adakunom tá tsang a fe̱ ye wu ta no̱o̱k kamok aYeso Kiristi.

⁷ Mi te asam kutaas Rife̱ Ritek na kamok Adakunom tin sak ta nye anong kaye̱e̱r ritek be itomong kukyem wu.

⁸ Mi ne i ti raar dide̱ng kaye̱e̱r ánerawe Adakunom cice̱r gye̱r tatan, gip be anong a ti no̱o̱k ritek na nong ta taas áner aya a ta nye áner aYahuda baꞌ, kuri kurum aKiristi kuya sang ku ta be igak baꞌ,

⁹ Kamok Adakunom nye itomong be mi nong ase̱ a ta tonong kanye̱k itomong wu kanang kaye̱e̱r yin cice̱r. Kanye̱k Adakunom aya a ta nye ike̱re̱ cice̱r, a ta ne̱r áfe izam agbugbang'e.

¹⁰ Adakunom nye anong be áfikuus nong ase̱ áfe rigwo̱m be áfe a ta nye rigwo̱m natoon kaza ta ren kukyem Adakunom kaye̱e̱r koakye.

¹¹ Iyong se tite̱re̱ be kushim riye̱ Adakunom kuya a tá nye kanye̱k'e kum nizham a ta ra nye kazatse, a shining be Agwo̱m Ágwo̱m yir aYeso Kiristi.

¹² Kamok i ta se yir mak be wu ne kuno̱o̱k katsak yir natoon wu, yir ta kyem i tseng yir nasho̱o̱n Adakunom ne̱k be riye̱ rizining.

¹³ Kamok anong, mi ta nye yin akusuk ye, sang tu ku bun yin kama kamok yin ta di yin kuri risam mi ta so̱ kamok yin baꞌ. Katsak'e, risam'me ta ka be̱e̱n yin kuyiik.

Aduwa aBulus kamok áner Afisa

¹⁴ Kamok anong, mi tigbok akuur nasho̱o̱n Ada yir nong i ta nye aduwa,

¹⁵ wu aya a ta nye koakye irem naza be kaben cice̱r.

¹⁶ Mi nye aduwa ye kaye̱e̱r agbang kuyiik wu, a ta ka tsesek yin be kukyem wu, nong ta sor yin be agap kaye̱e̱r aye̱ yin kamok Kabik wu,

¹⁷ nong ase̱ aKiristi ta sor kaye̱e̱r aye̱ yin kamok kuno̱o̱k katsak yin. Mi nye aduwa ye, kushim ta nyeseng be agap kaye̱e̱r aye̱ yin. Won kushim tu nye ritin'e,

¹⁸ nong ta se̱ yin kukyem mak be ázhe̱l'e áfe Adakunom cei nong yin ta ren yin ye kushim aKiristi se saa ne ku nye kuso̱p ne ku se garang ne ku se tsik.

¹⁹ Ne yin ren yin kushim aKiristi kuya ku ta gor agap kuren anerawe nong ase̱ ta shining yin be kunik kuse Adakunom dide̱ng.

²⁰ Kuyiik nye kufe wu aya a ta kyem a nye koakye be ike̱re̱ iya yir tana ku rip yir ne iya yir tanin nye yir kuto̱ro̱ng.

²¹ Kuyiik nye kufu kaye̱e̱r ikilisiya be kaye̱e̱r aYeso Kiristi ma izam izam cice̱r ma izen izen. Anong.