Afisa 2 - Izere New Testament

I nye yir atser kaye̱e̱r aKiristi

¹ Gbugbang yin tsang i se yin kyo̱ndi ikom'e, kamok kuraar yin ne rine̱n yin tin sor yin kaye̱e̱r'e,

² riya yin tin se yin nizen iya yin tá kuus yin kuri kutseng kazatse na ne i kuus yin agwo̱m, aya a tin nye rigwo̱m natoon nabik naya na tase natoon kaza. Wu ne a nye kabik kaya ka ta whap aye̱ ánerawe áya a ta gaar ku kuus Adakunom.

³ Yir cice̱r, yir i tsang i se yir kyo̱ndi ba gip ne i shim kunye yir ike̱re̱ imaan'e iya aye̱ yir ta shim ne i kuus yir kuse be kuto̱ro̱ng yir. Kyo̱ndi koangan ta se, be anong kaye̱e̱r kuse rinerawe yir gip riye̱ kubeseng Adakunom se natoon yir kyo̱ndi ri ta se natoon ba gip.

⁴ Amma Adakunom be kuro̱ riye̱ dide̱ng, kushim wu natoon yir se makiyi,

⁵ iyong sak kun ne yir ru nye yir ikom'e kamok rine̱n yir, ne i sor yir be kutser mak be aKiristi. Kaye̱e̱r ritek wu ne yir ti se̱ yir kashesh.

⁶ Adakunom ti dorok yir be kutser mak be aKiristi, kamok aYeso aKiristi'me ne yir ti se̱ yir karo̱ kusor kaye̱e̱r kaza.

⁷ Adakunom nye anong, nong ase̱ a tà tonong izam ife i tana be̱ kuri ritek riya sang ri ta be igak baꞌ. A ti tonong yir anong kamok ritek wu kaye̱e̱r aYeso Kiristi.

⁸ Ei, kamok ritek Adakunom ne yin ti se̱ yin kashesh ne kamok kuno̱o̱k katsak yin, sang kamok kunye yin baꞌ, amma Adakunom ne a no̱o̱k,

⁹ sang kamok itomong itek yin baꞌ, nong akak tin ya kuka baꞌ.

¹⁰ Kamok yir be rice yir, yir nye yir ike̱ng iya Adakunom'me tá nye. A tin shishing yir kamok aYeso aKiristi nong tá nye yir itomong itek, iya Adakunom'me tá tsang a sak ta nye yir.

aKiristi ne a gung ánerawe cice̱r

¹¹ Kamok anong, yiring yin kuri kusor yin agbugbang. Yin nye yin áner aYahuda baꞌ nutes. Ba áya a ta yis rice ba ye, “áfe izhak'ong” ne á ka yis yin ye, “ashurukur.” Izhak'ong a nye be ibo̱k natoon kuro̱m tse̱k.

¹² Yiring yin nizen iyong, yin tsang i se yin mak be aKiristi baꞌ, a ta sok yin ye yin nye yin áner Isarela baꞌ, ye, yin be yin ike̱ng ikak kaye̱e̱r kushu Adakunom tá nye be átukop yir baꞌ. Kaye̱e̱r kazatse na yin se yin dar kute riye̱ ne yin be yin Adakunom baꞌ.

¹³ Amma kyo̱o̱rna kaye̱e̱r aYeso Kiristi, yin áfe i tá tsang i se yin aza gugo̱k, a be̱ be yin bubarak kamok naso̱k aKiristi makong.

¹⁴ Kamok aKiristi be rice wu ne a ti be̱e̱n yir kusor caang, wu ne a sak áner aya a ta nye áner aYahuda be áya sang á ta nye áner aYahuda baꞌ, ta te azining. Kubar ku tá se natite ba, a yirik, ku tá nye ku won dar ku naka shim.

¹⁵ A wobok Itsi áner aYahuda'ong be itsi wu ne igo̱o̱n wu be riku. A nye anong be kutes iri ifa'ong nong a tá se̱ kutes kuzining kufas. A nye anong, nong a ta be̱e̱n kusor caang natite ba.

¹⁶ Kyo̱ndi kuro̱m kuzining a tu bun be ba cice̱r afa'ong nufe Adakunom. A nye anong be riku wu natoon kukon nong a tà tun rifub ri ta se natite ba.

¹⁷ A be̱ a tà ka taas yin, áya sang i ta nye yin áner aYahuda baꞌ, ne yin áner aYahuda Rife̱ Ritek rife̱ kusor caang.

¹⁸ Kamok wu ne yir ti se̱ yir iren ku be nufe Ada, iren izining, iya ita se kaye̱e̱r Kabik.

¹⁹ Kamok anong, kyo̱o̱rna yin ba nye yin átsen ka áner aduk baꞌ, amma yin te yin azining be áner Adakunom ne ribir áner kasa Adakunom'me.

²⁰ A tá sak yin cice̱r natoon ritin'e, riya ámanzo be áner kuzarap tá no̱k. aYeso aKiristi be rice wu ne a nye atuk agbang kuta itsik ribor'e.

²¹ Natoon wu ne a ti sok rino̱k cice̱r nong ku ta te agbang kutu kuya Adakunom iben kamok Agwo̱m Ágwo̱m.

²² Natoon wu ne a ta sak yin mak gip nong ta te yin karo̱ kusor Adakunom kamok kukyem be Kabik wu.