3 aYohana 1 - Izere New Testament

Ashou

¹ Mi, ako̱k kasho̱o̱n ikilisiya, wan aGayus, i ta nye aferime̱ mi. Mi ta shim dide̱ng.

² Are̱, wan aya mi ta shim, mi nye aduwa ye wan nye atser ne koakye tseng gye̱r kyo̱ndi mi ta ka ren nabik.

³ I ti no̱o̱k riye̱ rikan dide̱ng, mi tá nyim be ároneng ákak á ti tak yir ye wan tsang tseng kaye̱e̱r katsak ne wan yiir katsak.

⁴ Ike̱ng ikak kuse i tin kare̱p riye̱ kyo̱ndi mi ta fok ye áya a ta nye inoon'i nabik ta kuus katsak'e baꞌ.

⁵ Are̱, wan aya mi ta shim, wan nye itomong itek, wan ta tobok áronyining yir áya a ta se ni itomong Adakunom, á nye átsen nufuan.

⁶ Ákak ba taas afikuus aze kuri kutonong kushim wan tú ku tonong ba. I ta se gye̱r ke wan tu tes ba niren kyo̱ndi Adakunom ta shim.

⁷ Áner na tsang á tseng kamok riyerek aYeso, á shan kutobok nibo̱k aya á ta won dar á nye ikilisiya baꞌ.

⁸ Kamok anong, i se gye̱r nong yir ikilisiya ta tobok yir áner kuri ayu, nong ta gung yir rice ni itomong katsak.

⁹ Mi kun zibir ikilisiya ife azong kufumung amma aDiyotirifes rawu ku ni fok kamok a tá shim a tá tonong ye wu nye ike̱ng ikak.

¹⁰ Kamok anong ke mi be̱, mi tà ko̱ro̱k ánerawe kuto natoon kuri abo̱o̱s aDiyotirifes'e ta tsang a bo̱s natoon yir. Sang anong tsek baꞌ, a rawu kushan áronyining yir áya a ta sen nye itomong Adakunom. Ne a roon ákak kushan ánerawe'me gip, ma a ta ro ba kaye̱e̱r ikilisiya.

¹¹ Are̱, wan aya mi ta shim, sang tu kuus ike̱re̱ iya i ta nye imaan'e baꞌ, kuus iya i ta nye itek. Koangan a ta nye ike̱ng i ta se gye̱r tonong ye wu nye igon Adakunom. Amma aner a ta nye amaan ike̱re̱ tonong ye sang wu ren Adakunom baꞌ.

¹² Koangan naro̱ kuya Adakunom iben yin fe̱ ye aDemetiriyus be kuse kutek, ne a nye kusor ku ta tonong ye wu ren katsak. Yir aze gip yir fe̱ yir itak wu, yin ren yin ye ike̱re̱ yir ta fe̱ yir nye katsak.

¹³ Mi be ike̱re̱ whe̱r mi ta shim ta ka taas, amma mi shim ta zibir baꞌ.

¹⁴ Kamok mi mok ye mi tà be̱ azong kyo̱o̱rna nong tà fe̱ yir rife̱'me anyisi be anyisi. Mi ta won caang. Áro̱ aze ta nye ashou. Ku nye shou ribir aro̱ azong azizirik azizirik.