2 aYohana 1 - Izere New Testament

Ashou

¹ Mi, ako̱k kasho̱o̱n ikilisiya, angasneng be inoon wan Adakunom tá ka kasa nong tu ku kuus. Mi ta shim yin be riye̱ rizining. Mi tsek ne i ta shim yin baꞌ, cice̱r áya a ta ren katsak natoon Adakunom ta shim yin.

² Mi ta shim yin kamok yin ren yin katsak kaya yir ta be yir natoon Adakunom, yir ta yiir yir katsak'e ma izen izen.

³ Mi mok ye ritek be kuro̱ riye̱ ne kameneng riye̱ Adakunom a ta nye Ada'me ne kufe aYeso Kiristi Igon wu se mak be yir kaye̱e̱r katsak be kushim.

⁴ Mi nye riye̱ rikan dide̱ng i ta se̱ inoon wan nakak á ta se nikuus be agap, kyo̱ndi Ada yir Adakunom tin tak yir.

⁵ Kamok anong angasneng, sang natoon itsi ifas ne mi sen ka zibir'e baꞌ, amma iya yir tá fok yir kum ni ime̱se̱ng'e. Mi shim ta ka tak ye i ra naka shim yir.

⁶ Kushim kufe katsak nye kunye ike̱ng iya Adakunom tá fe̱ ye i ra nye yir. Kyo̱ndi yin tá fok yin Adakunom tá fe̱ kum ni ime̱se̱ng'e, ye i ra yiir naka shim yir.

⁷ Áfe kuwo̱ro̱k ánerawe whe̱re̱ ye sang aYeso Kiristi be̱ nuro̱m baꞌ, án no̱ kaye̱e̱r kazatse. Ke aner akak fe̱ anong i nye ye a be abo̱o̱s ne i nye ye a nye amudo̱n aYeso Kiristi.

⁸ Kamok anong sak yin riye̱, fan yin bin wei yin nishorong itomong yin, amma nong ta se̱ yin ishorong yin mumak nufe Adakunom.

⁹ Katsak'e, mi ta ka tak yin, koangan afe sang a ta kuus kubo̱so̱p aKiristi ta shim baꞌ, a yiir nye ike̱re̱ wu ta shim tsek, an te azining be Adakunom baꞌ. Aner aya a ta yiir kuus kubo̱so̱p aYeso Kiristi an te azining be Ada ne aYeso Igon Adakunom'me.

¹⁰ Ke aner akak be̱ nufe yin amma a bo̱so̱p rife̱ na baꞌ, tu tseng yin be wu na nasa yin baꞌ, ka tu ku nye yin ashou baꞌ.

¹¹ Koangan ne a nye aner kuri ayong ashou, i nye ye a kuus kama amaan kunye aner'e.

¹² Mi be rife̱ whe̱r amma mi shim ta zibir baꞌ. Kamok mi mok ye mi tà be̱, tà be̱ fe̱ be yin anyisi be anyisi nong ase̱ riye̱ rikan yir tà shining dide̱ng.

¹³ Inoon angasnyining wan aya Adakunom tá kasa aze ta nye ashou gip.