2 aTimoti 1 - Izere New Testament

Ashou

¹ Mi aBulus, amanzo aYeso Kiristi, nushim aya Adakunom. Adakunom ti tom nong ta tak itak kutser kuya wu tá tsang a no̱o̱k kuto̱ kaye̱e̱r aYeso Kiristi.

² Wan, aTimoti, igon riye̱ mi. Ritek be kuro̱ riye̱ ne kameneng riye̱ Adakunom a ta nye Ada yir ne Agwo̱m Ágwo̱m yir aYeso Kiristi se mak be wan.

Riye̱ rikan ne kutsesek

³ Mi be riye̱ rikan be Adakunom aya mi tu ku nye itomong be riye̱ rizining kyo̱ndi átukop'i tu ku nye'me. Katuk be kunom mi nye aduwa ne i yiring be wan ye̱r ye̱r.

⁴ Izen iya ne mi yiring be nanyisi wan ne a ni te ke mi ka di nong ase̱ riye̱ mi ta men.

⁵ Mi yiring be kuri kuno̱o̱k katsak kufe katsak kuya wan ta be, kuri kufe akaka wan aLoyis ne kufe ango̱ wan, aYunis, mi no̱o̱k katsak ye wan be kuri'me gip.

⁶ Kamok anong ne mi bun i ka yiring'e ye i rin nye itomong dide̱ng be kunang kuya Adakunom tá ka no̱o̱k kum nizen mi tin sak kubo̱k ritek natoon wan.

⁷ Kamok kabik kaya Adakunom ti no̱o̱k yir nye kabik kufok inyim baꞌ, amma kafe kukyem ne kushim be kuyiir rice.

⁸ Kamok anong sang tú fok isum kufe̱ itak natoon Agwo̱m Ágwo̱m yir baꞌ, ka isum'i kamok a tin te nitso̱m kamok wu baꞌ. Amma gung rice be mi kaye̱e̱r risam'me kamok Rife̱ Ritek'e ne i ni fereng nukyem Adakunom.

⁹ Wu ne a ti shesh yir ne a ni kasa yir nong ta sor yir kusor kuzhe̱l'e. A ti kasa yir sang kamok yir tá nye yir ike̱ng ikak itek baꞌ, amma kamok ike̱ng ife wu tá shim'ong ne ritek wu. A tin no̱o̱k yir ritek'e kamok aYeso Kiristi nizham a ta ra nye kazatse,

¹⁰ Amma kyo̱o̱rna a ti tonong yir'e be kube̱ Aner Kashesh yir, aYeso Kiristi. Wu ne a canang riku ne a ni tonong yir kutser kufe izen izen kanang be Rife̱ Ritek.

¹¹ Kamok Rife̱ Ritek'e ne Adakunom ti kasa mi nong tá te aner kunye awazi ne i te amanzo ne i te aner kubo̱so̱p ánerawe'me.

¹² Ike̱ng i ta sak mi ta sen so̱ risam kuri riyuna'ong. Gip be anong mi fok isum baꞌ, kamok mi ren kuri aner aya mi tin no̱o̱k katsak ni wu ne i bun i ren tse̱ng tse̱ng ye a be kukyem kufe a tanin sak riye̱ nike̱ng iya a tin won amana'me ma Katuk'ong.

¹³ Yiir kuri kubo̱so̱p na kufe katsak kuya wan tá fok nunaan, i tu sor ike̱ng wan tanin nye kumaas. Yiring ta sor kaye̱e̱r kuno̱o̱k katsak ne kushim kuya wan ta be kaye̱e̱r aYeso Kiristi.

¹⁴ Ni sak riye̱ be kubo̱so̱p kufe katsak a tá ka won amana'me. Kabik Kazhe̱l'e a ta se kaye̱e̱r aye̱ yir ta ka se̱ mo nong tin nye itomong.

¹⁵ Wan ren ye koangan niben Asiya ti kirik kama, ma be aFizhilus ne aHamozhanis gip.

¹⁶ Won Agwo̱m Ágwo̱m tu ro̱ riye̱ áfekasa aOnesiforus, kamok koakye izen a yiir ni tsesek a fok isum ye mi se nitso̱m baꞌ.

¹⁷ Amma nizen a tá se na aRom, a ban a tsang a tse̱r karo̱ mi tú ku se̱ ma a ti se̱.

¹⁸ Mi mok ye Agwo̱m Ágwo̱m ta sak Katuk kayong aOnesiforus ta se̱ ritek nufu. Ei, wan ren tseng tseng kuri itomong iya wu tin nye'me na Afisa.