2 aTasalonika 3 - Izere New Testament

Nye yin aduwa kamok yir

¹ Ni igang'e ároneng, nye yin aduwa kamok yir nong ase̱ rife̱ Agwo̱m Ágwo̱m yir tà ya kasho̱o̱n zizirik kaye̱e̱r ánerawe nong ri ta se̱ kuyiik, kyo̱ndi ri ta se̱ kaye̱e̱r yin.

² Nye yin aduwa kamok yir nong ase̱ yir ta wher yir nubo̱k ámaan ánerawe áfe anyas kamok sang ánerawe'me cice̱r ne á ti no̱o̱k katsak baꞌ.

³ Amma Agwo̱m Ágwo̱m yir be katsak, a tà ka tsesek yin ne a ka fek yin nubo̱k amaan aner'ong, a ta nye Ishetan.

⁴ Yir ti no̱o̱k yir katsak dim na Agwo̱m Ágwo̱m ye yin sen kuus yin ike̱re̱ yir tá ka taas yin, ye yin ta ya yin kasho̱o̱n be kunye'me.

⁵ Won Agwo̱m Ágwo̱m tu sak yin tu ren yin agbang kushim Adakunom ne kutsesek kuya ku ta nes nufe aYeso Kiristi.

Koangan ra nye itomong be ibo̱k wu

⁶ Ároneng, kaye̱e̱r riyerek Agwo̱m Ágwo̱m yir aYeso Kiristi, yir fe̱ yir be yin be agbang kuto̱ ye, yin ra kam yin be áronyining yin áya a ta be karuur sang á ta kuus ike̱ng iya yir tá ka bo̱so̱p yin'e baꞌ.

⁷ Yin be rice yin, yin ren yin ye, gye̱r ke yin kuus yin kutak yir. Nizen yir tá se yir mak be yin, yir be yir karuur baꞌ,

⁸ ka yir ya yir naya akak na awarak baꞌ. Wayo, yir ban i can yir ni inye itomong yir katuk be kunom be rice yir fan yir ba ka sor yin acer.

⁹ Yir nye yir anong sang i se ye yir won dar i kyem yir baꞌ. Yir nye yir anong nong yin ta kuus yin ane̱e̱ yir. Yir nye yir anong, nong ase̱ yin ta bo̱so̱p yin ike̱ng ikak nufe yir.

¹⁰ Kum nizen iya yir ta rusek yir be yin, yir fe̱ yir be agbang kuto̱ ye, “Ke anerawe rawu kunye itomong, to̱, sang a tu ya naya baꞌ.”

¹¹ Yir fok yir ye ákak kuse kaye̱e̱r yin á ta be karuur, sang á shim kunye itomong baꞌ, amma á tsang ni tes nanu rife̱ ánerawe.

¹² Kyo̱o̱rna'me kaye̱e̱r riyerek Agwo̱m Ágwo̱m yir aYeso Kiristi, yir ta no̱o̱k yir ba itabak ne ibun i fe̱ yir be agbang kuto̱ ye, á ra nye itomong ba gbik nong á ta rice ba.

¹³ Amma yin ároneng, sang tu ro̱n yin be kunye kunye ritek baꞌ.

¹⁴ Ke aner akak rawu ku kuus ike̱ng yir tá zibir kaye̱e̱r kufumung na, to̱, ni sak yin riye̱ ni wu. Sang tu gung yin rice be wu baꞌ, nong ase̱ a tà fok isum.

¹⁵ Sang tu nye yin be wu kyo̱ndi amudo̱n yin baꞌ, amma ku no̱o̱k yin ibo̱ro̱ng kyo̱ndi aronyining yin.

Atato̱

¹⁶ To̱, won Agwo̱m Ágwo̱m'me be rice wu aya a ta nye afe kameneng riye̱ ta ka no̱o̱k yin kameneng riye̱ koakye izen ne kaye̱e̱r koakye iren. Agwo̱m Ágwo̱m tu se mak be yin cice̱r.

¹⁷ Mi aBulus, mi ne i tá zibir yin ashou na be kubo̱k'i. Iyu ne i nye izibir'i, i ta kam be ribir'e. A na ne mi nye izibir'i.

¹⁸ Ritek Agwo̱m Ágwo̱m yir aYeso Kiristi se mak be yin cice̱r.