2 aTasalonika 1 - Izere New Testament

Ashou

¹ Mi aBulus be aSila ne aTimoti, ta nye yin áfikuus aTasalonika ashou, yin áya i ta nye yin áfe Adakunom Ada yir ne Agwo̱m Ágwo̱m yir aYeso Kiristi.

² Ritek be kameneng riye̱ Adakunom a ta nye Ada yir ne Agwo̱m Ágwo̱m yir aYeso Kiristi se mak be yin.

Riye̱ rikan be aduwa

³ Ároneng, i se gye̱r yir ta yiir i tonong yir Adakunom riye̱ rikan yir ye̱rye̱r kamok yin. Anong se gye̱r kamok kuno̱o̱k katsak yin ta ya kasho̱o̱n dide̱ng, kushim yin tana ka shim yin nye ne kuni barang.

⁴ Kamok anong, yir be rice yir i ti ya yir kuka be yin nasho̱o̱n áfikuus Adakunom kamok kutsesek yin ne kuno̱o̱k katsak yin kaye̱e̱r amaan kutabak ne iriri kubo̱so̱p yin tin tsesek yin kaye̱e̱r'e.

⁵ Ike̱re̱ na cice̱r tonong ye amok Adakunom se gye̱r ne i bun tonong ye yin kyem tà sor yin kaye̱e̱r rigwo̱m Adakunom rife yin ta sen ni so̱ yin risam kamok'e.

⁶ Adakunom be katsak, kamok anong ba áya a tá ka nyesek yin risam, a tu ku karang be risam,

⁷ ne a ka tun yin kaye̱e̱r risam'me mak be yir gip. A tà nye anong nizen iya aYeso Agwo̱m Ágwo̱m tana wuruk kanang naza be rigyem kuro̱ng ne ámaleka wu áya a ta ba kukyem.

⁸ A tà nees áya a tá raba Adakunom ne á gaar kukuus Rife̱ Ritek Agwo̱m Ágwo̱m yir aYeso.

⁹ Á tù ku te̱n ba amok riku rife izen izen, á tù ku ro ba nasho̱o̱n Agwo̱m Ágwo̱m'me ne nasho̱o̱n kukyem kuyiik wu.

¹⁰ Katuk a tana be̱'ong, ázhe̱l'e afu tù ku tiyiik, áya a tin no̱o̱k katsak cice̱r tà te zhing be wu Katuk kayong mak be yin kamok yin ti no̱o̱k yin katsak natoon ike̱ng iya yir tá ka tak yin.

¹¹ Kamok anong, ne yir yiir ka nye yin aduwa ye̱r ye̱r ye Adakunom ra sak yin ta sor yin kuri kusor kuya a tá ka yis mo yin. Adakunom ra sak ta nye yin ike̱re̱ itek cice̱r iya yin ta shim yin tà nye yin ne itomong kuno̱o̱k katsak yin nong tà nye yin be agap kukyem wu.

¹² Yir nye yir aduwa na nong riyerek Agwo̱m Ágwo̱m yir aYeso Kiristi ta se̱ kuyiik kaye̱e̱r yin, ne yin se̱ yin kuyiik kaye̱e̱r wu, kamok ritek Adakunom yir be Agwo̱m Ágwo̱m yir aYeso Kiristi.