2 aKoranti 2 - Izere New Testament1 Kamok anong, mi n sak riye̱ mi ye mi tà ba bun i be̱ ritsen nufe yin nong ta ka sak yin riye̱ riwe baꞌ. 2 Ke mi ta sak yin ta beseng yin aye̱ to̱, angan tin kare̱p riye̱, sang ke yin afe mi ta ka beseng yin riye̱ baꞌ e̱? 3 Ike̱ng i tá sak mi tá ka zibir yin kufumung kukya se ye kamok sang mi ta shim ta be̱ se̱ áner i ta se gye̱r ke á ti kare̱p riye̱ tin beseng'e baꞌ. Kamok mi no̱o̱k katsak ye riye̱ rikan'i nye rife yin cice̱r gip. 4 Mi ta zibir yin'e ne mi se kaye̱e̱r risam ne riye̱ riwe dide̱ng ma be nanyisi sang nong ta ka sak yin riye̱ riwe baꞌ, amma nong yin ta ren yin ye mi ta shim yin dide̱ng. Kure̱ng rine̱n aner a ta nye rine̱n 5 Ke aner akak nye ike̱ng riye̱ riwe, sang mi tsek ne a ti nye'me baꞌ, amma yir cice̱r. Sang i se ye mi fe̱ anong, nong ta firik akak baꞌ. 6 Kunees aner na tan so̱ nubo̱k kukap yin, kyem anong. 7 Kamok anong i se gye̱r ke yin ku re̱ng yin rine̱n wu ne i ku tsesek yin ingya, fan riye̱ riwe'me bu nar agap wu. 8 Mi ta nye yin izong ye, i ru ku tonong yin kushim dide̱ng gbak. 9 Mi tá zibir yin kufumung kukya nong tá di ka yin ta kyem i tsesek yin be kubo̱mo̱ng'e, ne i kuus yin koakye. 10 Koangan afe yin tu ku re̱ng yin rine̱n wu, mi gip mi tu ku re̱ng'e. Rine̱n afe mi ta re̱ng, ke i nye ye rine̱n'e kuse mi tana re̱ng, mi re̱ng kamok yin ne nasho̱o̱n aKiristi. 11 Mi nye anong fan Ishetan bu se̱ i ren kaye̱e̱r yir. Kamok yir ren yir iren ritse̱ng wu ta kuus. Kudaam aBulus na aToruwas 12 Nizen mi ta fa tseng na aToruwas nong ta se nye awazi Rife̱ Ritek aKiristi, mi se se̱ Agwo̱m Ágwo̱m tsang a min n karak iren. 13 Gip be anong, mi be kameneng riye̱ baꞌ, kamok mi se̱ aroneng aTitus azong baꞌ. Kamok anong mi nye atato̱, i ta be na aMakidoniya. 14 Amma mi be riye̱ rikan be Adakunom, wu aya a tin ko̱k yir kasho̱o̱n ye̱r ye̱r nong yir ta canang yir kazatse kamok aKiristi. A tin nye itomong be yir nong tà tseng yir be itak aKiristi koakye kyo̱ndi name na ta be iko̱o̱n itek ta nyus dide̱ng. 15 Kamok yir se yir kyo̱ndi name na ta be iko̱o̱n itek naya aKiristi ta no̱o̱k Adakunom, naya a tá nyosong kaye̱e̱r áya a tu ku shesh ba ne áya a ta se niren kuwei. 16 Áya á ta se niren kuwei, iko̱o̱n ifuba nye ife riku, iya i tana be̱e̱n be riku; amma áya a tu ku shesh ba, iko̱o̱n'e nye ife kutser, iya i tana be̱e̱n be kutser. Akak kuse a tana kyem a nye itomong kuri iyong baꞌ 17 Yir se yir kyo̱ndi whe̱re̱ áya a tan sok rife̱ Adakunom nong á tin tse̱r naya ba baꞌ. Yir fe̱ yir kanu kaye̱e̱r aKiristi nasho̱o̱n Adakunom be riye̱ rizining kyo̱ndi áner Adakunom ta ka tom ba. |
© Wycliffe Bible Translators, Inc
Nigeria Bible Translation Trust