2 aKoranti 1 - Izere New Testament

Ashou

¹ Mi aBulus, aya Adakunom tin kasa nong ta te amanzo aYeso aKiristi, i ta se yir mak be aronyining yir aTimoti, ne i sen ka zibir yin kufumung na, yin áfikuus Adakunom áya a ta se na aKoranti ne ázhe̱l'e áya ta se niben Akaya cice̱r.

² Ritek ne kameneng riye̱ riya ri ta nes nufe Adakunom a ta nye Ada yir ne Agwo̱m Ágwo̱m yir aYeso Kiristi se mak be yin.

Adakunom nye aner aya a ta tsesek ánerawe

³ Nakerek nye nafe Adakunom, wu ne a ta nye Ada Agwo̱m Ágwo̱m yir aYeso Kiristi, ne Ada aya a ta be kuro̱ riye̱ dide̱ng, ne a nye Adakunom aya a ta tsesek ánerawe cice̱r.

⁴ Wu ne a ti tsesek yir kaye̱e̱r koakye kuri kudaam, nong yir ta ma kyem i tsesek yir áya a ta se kaye̱e̱r kudaam be kuri kutsesek yir ta se̱ yir nufe Adakunom'me.

⁵ Kamok anong, kyo̱ndi aKiristi ta so̱ risam, anong ne yir ta so̱ yir risam dide̱ng, ne yir so̱ yir risam gip ne i se̱ yir kutsesek Adakunom dide̱ng nufe aKiristi.

⁶ Ke yir so̱ yir risam, yir so̱ yir nong yin tin se̱ yin kutsesek ne kashesh. Ke yir se̱ yir kutsesek, i se̱ yir kamok yin nong yin ta kyem i naka tsesek yin be kuri risam yir ta so̱ yir.

⁷ Kamok anong, yir ti be yir agak riye̱ ni yin baꞌ, kamok yir ren yir ye yin so̱ yin kuri risam afe yir ta so̱ yir, yin gip ta ma se̱ yin kuri kutsesek afe yir ta se̱ yir.

⁸ Ároneng, yir shim yin tu sor yin dar kuren yin kuri risam yir ta sen so̱ yir'e niben Asiya baꞌ. Risam yir ta so̱ yir nar agap ma yir di yir ye yir ta kus yir.

⁹ Katsak'e, yir di yir ye a min te̱n yir amok riku, amma iyu se anong, nong fan yir bu nye yir ike̱ng ikak be rice yir nong tin fereng yir na Adakunom, afe a ta dorok ikom.

¹⁰ Adakunom ti tun yir kaye̱e̱r amok riku na. Yir min te yir riye̱ ye, a tin shesh yir gbak.

¹¹ Ni tobok yir be aduwa. Be anong ne ánerawe whe̱re̱ ta nye riye̱ rikan be Adakunom kamok yir, ritek yir tana se̱ yir kamok Adakunom ta fok aduwa ánerawe whe̱re̱ tá nye.

aBulus shishing kanye̱k kutsang wu

¹² Ike̱ng yir tin ya yir kuka nye, kamok yir sor yir kusor kuzhe̱l nazatse ne i sor yir be riye̱ rizining nizen iya yir tá se yir mak be yin. Yir sor yir zhe̱l be katsak kuri kufe Adakunom sang be ritseng kuri rife kazatse na baꞌ, amma kamok ritek Adakunom.

¹³ Sang yir ta zibir yin ike̱ng ikak ife i tana ka gaar yin kufa ka kuren baꞌ. Mi mok ye,

¹⁴ yin ta se̱ yin rikpa koakye nong katuk kaya Agwo̱m Ágwo̱m yir aYeso tana be̱, yir tin tsor yir kafok be wu kyo̱ndi yir tanin ya yir kuka be yin.

¹⁵ Mi tsang i ren anong tse̱ng tse̱ng, iyong ne i sak mi shim ku be̱ nufe yin ni ime̱se̱ng'e, nong ta se̱ yin ritek kutak kufa.

¹⁶ Mi n tsang i sak ye, mi ta gor nufe yin nizen mi tana be na aMakidoniya nong ta bun i gor nufe yin nizen iya mi ta sen kubun nong yin tin te yin niren nong ta wesek na aYahudiya.

¹⁷ Yin di yin ye mi ren ike̱ng ife mi ta nye aꞌa? Ka yin di yin ye mi nye kanye̱k na kaye̱e̱r kuse rinerawe tsek de̱? Mi ta fe̱ ye, “Ei,” ne i bun i fe̱ ye “A wayo” a?

¹⁸ Kyo̱ndi yin ta ren yin ye, Adakunom nye aner a ta fe̱ ike̱ng ne a nye, anong ne rife̱ yir ta fe̱ yir be yin nye, “Ei ne ri bun nye Wayo” baꞌ.

¹⁹ Kamok Igon Adakunom, aYeso Kiristi, aya yir be aSila ne aTimoti, tá fe̱ yir itak natoon wu ye, “Ei” ka “Wayo” baꞌ, amma koakye izen a nye “Ei.”

²⁰ Kamok be wu ne Adakunom shining ike̱re̱ wu tá tsang a fe̱ ye wu tá nye cei. Iyong ne i sak kaye̱e̱r riyerek wu ne yir fe̱ yir ye, “Anong,” nong tin tiyiik yir riyerek Adakunom.

²¹ Adakunom ne a sak yir be yin cice̱r ta nyeseng yir kpa kaye̱e̱r aKiristi. Wu ne a ti kasa yir,

²² a min tse̱k yir izizo̱ wu, ne a bun a ti no̱o̱k yir kabik wu kaye̱e̱r aye̱ yir ye nong yir ta te yir afu, nong tin no̱o̱k yir katsak natoon ike̱ng i tana be̱.

²³ Adakunom ne a ren ike̱ng i ta sak mi tú ku bun na aKoranti baꞌ, i se ye fan i ba ka zhe̱e̱r yin.

²⁴ Sang i se ye yir shim ta ka tonong yin rigwo̱m natoon ike̱ng yin ta min no̱o̱k yin katsak baꞌ, wayo, amma i nye yir itomong mak, nong ta nye yin riye̱ rikan, kamok natoon kuno̱o̱k katsak ne yin tin nyeseng yin.