2 aBitrus 3 - Izere New Testament

Kube̱ aYeso kufe afa

¹ Ároneng, kufumung'i kufe afa na'me. Mi zibir afumung afa'me cice̱r nong ta ka yiring yin'e nong tin nye yin kuto̱ro̱ng gye̱r.

² Mi shim yin tu yiring yin be ike̱ng áner kuzarap azhe̱l'e tá fe̱ gbugbang ne ike̱ng iya Agwo̱m Ágwo̱m Aner Kashesh yir tá fe̱ be agbang kuto̱ ni nanu ámanzo yin.

³ Agbang ike̱ng mi ta shim yin tu ren yin ye kaye̱e̱r inom igang'e, áner ákak á tana nye áfe zhe̱e̱sh karo̱ tà wuruk ne á nye ámaan ike̱re̱ aye̱ ba ta shim. Á tà ka mas yin,

⁴ á tà fe̱ ye, “aYeso fe̱ ye wu tá be̱ ne̱ e̱? To̱, ayong a se ake̱ e̱? Kum ne átukop yir ru nye atser, iyu koakye rusek kyo̱ndi i ta se kum nizen a tá nye kazatse.”

⁵ Áner á ta fe̱ anong fe̱ anyas tsek, ba tiburum'e ye be rife̱ Adakunom ne Adakunom sak kaza be kaben ti wuruk kaye̱e̱r.

⁶ Adakunom kis kazatse be ashi nizen iyong, nizen iya ashi ta whe̱e̱n kazatse.

⁷ Be rife̱ Adakunom'me ne a tin shosh kaza be kaben kaya yir ta ye̱re̱k yir na. Be rife̱ Adakunom ne Adakunom won kaza be kaben ma katuk a tana to̱ áya sang á ta fok inyim Adakunom'me baꞌ amok ne a ka shosh ba.

⁸ Ároneng ike̱ng ikak kuse izining mi ta shim yin tú tiburum yin'e baꞌ ye, kunom kuzining se kyo̱ndi aye̱ izungu izining nufe Agwo̱m Ágwo̱m ne aye̱ izungu izining se kyo̱ndi kunom kuzining.

⁹ Ákak di kyo̱ndi Adakunom mak a sok izen nizham a tá ra nye ike̱ng iya wu tá tsang a fe̱ ye wu tá nye. I se anong baꞌ. A be kutsesek ne kamok yin, a shim akak tu wei baꞌ amma koangan ra shishing kuse wu.

¹⁰ Katuk kube̱ Agwo̱m Ágwo̱m bu se kyo̱ndi kube̱ akpatang. Katuk kayong a tà fok riwo̱ng be agap ne kaza wei, cice̱r ike̱re̱ a tin nye kaza be kaben a tà shosh. Koakye i ta se nune̱re̱ng kaye̱e̱r'e a ta tun kanang nasho̱o̱n Adakunom.

¹¹ Kum a tana beseng koakye ike̱ng anong, to̱, akye̱ kuri kusor ne yin sor yin e̱? I se gye̱r ke yin sor yin zhe̱l ne i kuus yin Adakunom.

¹² Tor yin Kunom Kube̱ Adakunom be ifeng, ni barang yin kanye̱k dide̱ng nong ta di yin ye a be̱ zizirik. Katuk kayong a ta shosh kaza be kuro̱ng. Ike̱re̱ á tin nye kaza be kaben cei ta te wuyong.

¹³ Amma be kuno̱o̱k kuto̱ Adakunom tá tsang a no̱o̱k, yir sen tor yir kaza kafas be kaben kafas, karo̱ kaya katsak tana kuse koakye izen.

¹⁴ Kamok anong, ároneng áfe riye̱ mi, kum yin ta sen tor yin Kunom'ong, to̱ nye yin koakye ike̱ng iya yin tana kyem i nye yin nong ta sor yin nasho̱o̱n Adakunom dar rizik ka rine̱n ayi. Sor yin nasho̱o̱n wu caang.

¹⁵ Ren yin ye kutsesek Adakunom se nong ánerawe ta se̱ kashesh, kyo̱ndi aronyining yir aBulus aya yir ta shim yir, tá ka zibir yin'e gip be kukyem kuya Adakunom tú ku no̱o̱k.

¹⁶ Ike̱re̱ iya wu tin fe̱ natoon'e na ni izibir afumung wu tá zibir cei. Ike̱re̱ ikak kuse kaye̱e̱r afumung'e i ta ro̱ kuren, iya áner á ta se nawhi ne á be agap kaye̱e̱r kuno̱o̱k katsak ba baꞌ, ta kirik rife̱'me kyo̱ndi ba ta nye be izibir rife̱ Adakunom ikak ne á be̱e̱n rice kawei.

¹⁷ Amma yin ároneng áfe riye̱ mi, kum yin tá ren yin ike̱re̱ na, to̱, sak yin riye̱ be kuri áner á ta gaar kukuus Adakunom, fan kubo̱so̱p ba kufe abo̱o̱s ba ka ko̱ro̱k yin nong ta won yin iren yin itek iya yin ta min nyeseng yin be agap.

¹⁸ Amma ban i ni barang yin kuya kasho̱o̱n kaye̱e̱r ritek ne kuren Agwo̱m Ágwo̱m yir aYeso Kiristi, Aner Kashesh ingya. Kuyiik ra sor kufu kyo̱o̱rna ma izen izen. Anong!