2 aBitrus 1 - Izere New Testament

Ashou

¹ Mi aSiman Bitrus, asam aYeso aKiristi ne i bun i nye amanzo wu, yin áya i ta se̱ yin agbang kuno̱o̱k katsak kyo̱ndi yir ta ma se̱ yir kamok kuse kutek Adakunom yir aya a ta nye Aner Kashesh yir aYeso Kiristi.

² Adakunom ta ka barang mo yin ritek ne kameneng riye̱ wu dide̱ng kaye̱e̱r kuren Adakunom ne Agwo̱m Ágwo̱m yir aYeso.

Kuri kusor ku ta tas kufe áfikuus

³ Adakunom kaye̱e̱r kuyiik wu ti no̱o̱k yir koakye ike̱ng iya yir ta tse̱r yir nong ta sor yir kuri kusor kuya wu tana fok kusas'e. Yir se̱ yir ike̱re̱ na cice̱r kamok yir ta ren yir Adakunom a tin yis yir kaye̱e̱r kuyiik be kuse kutek wu.

⁴ Kamok ike̱re̱ iyong ne wu ti no̱o̱k yir ágbang ike̱re̱ i ta be kuyiik dide̱ng iya wu tá tsang a fe̱ ye wu tin no̱o̱k yir, nong ta gung yir rice be kuri kuse Adakunom nong ta wher yir amaan kuse kazatse na ku ta be̱s'e kaye̱e̱r aye̱ yir.

⁵ Kamok anong, nye yin koakye i tana kyem i nye yin nong tin barang yin ritek natoon kuno̱o̱k katsak yin, ne i ni barang yin kuren natoon ritek yin.

⁶ Ni barang yin kuyiir rice natoon kuren ike̱re̱ Adakunom, ni barang yin ku naka tsesek natoon kuyiir rice yin. Ni barang yin kuse kuri kufe Adakunom natoon ku naka tsesek'e.

⁷ Ni barang yin ku naka shim natoon kuse kuri kufe Adakunom, ni barang yin kushim koangan natoon ku naka shim.

⁸ Ke yin be yin kuse kutek anong koakye izen, kuren Agwo̱m Ágwo̱m yin ta ren yin ta ka be̱n yin ifeng ne itomong nufu.

⁹ Kamok koangan aya a ta dun kuse kutek kuri kuyu di karo̱ tsik baꞌ, a nye akpato̱o̱n'e. A tiburum ye Adakunom mu ku re̱ng rine̱n wu tá tsang a nye.

¹⁰ Kamok anong ároneng, nye yin koakye ife yin tana kyem i nye yin nong ta tonong yin ye Adakunom ma ka yis yin ne a ka kasa yin. Ke yin nye yin anong yin ta kpa yin baꞌ, ko cie̱k.

¹¹ Be anong ne a tà ka shan yin ibo̱k ifa kaye̱e̱r rigwo̱m Agwo̱m Ágwo̱m rife̱ izen izen rife̱ Aner Kashesh yir.

¹² Kamok anong mi ta yiir kuka yiring yin ike̱re̱ na, mi ren yin tsang i ren yin gye̱rtatan, yin nyeseng yin be agap natoon katsak yin ta be yin.

¹³ Mi di ye i se gye̱r ta yiir kuka yiring yin ike̱re̱ na kum mi ta rusek nazatse na be kutser,

¹⁴ kamok mi ren mi m be̱ barak ta won kazatse na, kyo̱ndi Agwo̱m Ágwo̱m yir aYeso Kiristi tin tonong kanang.

¹⁵ Mi ta nye koakye mi tana kyem i nye nong ase̱ ta di yin yiir kuyiring yin be ike̱re̱ na nizen iya mi ta se kaye̱e̱r kazatse na baꞌ.

¹⁶ Nizen iya yir tá ka taas yin itak kukyem ne kube̱ Agwo̱m Ágwo̱m yir aYeso Kiristi, sang yir tá taas yin atin afe kasho̱o̱n ákak tá fe̱ baꞌ. Wayo, yir di yir agbang kuyiik wu be anyisi yir.

¹⁷ Kamok wu se̱ kuyiik be nakerek nufe Adakunom a ta nye Ada nizen iya yir ta fok agbang ayiik kuto̱ Ada Adakunom ye, “Ayu na ne a nye Igon'i, kafe mi ta shim, mi ta fok kusas wu makiyi.”

¹⁸ Yir be rice yir, yir fok yir kuto̱'ong ku ta ne naza nizen iya yir ta se yir mak be wu natoon kawhanang Kazhe̱l'e.

¹⁹ Kamok anong yir ti te yir riye̱ yir nike̱re̱ áner kuzarap tá fe̱ dide̱ng. I ta se gye̱r ke yin ti sak yin riye̱ rife̱'me kyo̱ndi akanang kuro̱ng ta ya kanang nawhi, ma aYeso bun a be̱ kyo̱ndi kadiding ta karak ne akanang wuruk kaye̱e̱r aye̱ yin.

²⁰ Agbang ike̱ng mi ta shim yin tu ren yin nye ye kuzarap kukak kuse a tá zibir kuya áner kuzarap akak tá zibir be kuto̱ro̱ng ba tsek baꞌ.

²¹ Kamok kuzarap nye ike̱ng iya i ta ne kaye̱e̱r riye̱ anerawe tsek baꞌ, amma Kabik Adakunom kaya ka tá no̱o̱k kaye̱e̱r aye̱ ba ne ka sak ánerawe tá fe̱ ike̱re̱ iya ba tá shan nufe Adakunom.