1 aYohana 4 - Izere New Testament

Bo̱mo̱ng yin koakye kuri kabik nizham

¹ Aro̱, yin aya mi ta shim, tin no̱o̱k yin katsak natoon koakye kuri kabik baꞌ, bo̱mo̱ng yin kuri nabik'e nizham nong ta di yin ka na ne nufe Adakunom'me. Kamok áner kuzarap áfe abo̱o̱s kuse whe̱re̱ nazatse kyo̱o̱rna.

² Iren yin tana ren yin ye Kabik'e nye kafe Adakunom nye, ke aner'e fe̱ ye aYeso be̱ kaye̱e̱r kuro̱m i nye ye Kabik'e nye kafe Adakunom.

³ Ke aner'e fe̱ ye sang aYeso be̱ kaye̱e̱r kuro̱m baꞌ, i nye ye kabik'e nye kafe Adakunom baꞌ. Aner kuri ayong be kabik kaya ka ta nye amudo̱n aYeso Kiristi kaya yin tá fok yin ye ka saase, kyo̱o̱rna gip ka se kaye̱e̱r kazatse.

⁴ Amma yin inoon'i, yin aya mi ta shim, yin nye yin áfe Adakunom. Yin n canang yin aner kuri ayong, kamok Kabik kaya ka ta se kaye̱e̱r yin nar kaya ka ta se kaye̱e̱r kazatse'me.

⁵ Ba nye áfe kazatse, kamok anong ba fe̱ rife̱ kuri rife̱ kazatse, ne ánerawe'me ku fok ba.

⁶ Amma yir, yir nye yir áfe Adakunom, koangan afe a ta nye afe Adakunom ti fok yir. Aya a ta nye afe Adakunom baꞌ, ti fok yir baꞌ. Anong ne yir kyem i ren yir Kabik kafe ka ta be katsak ne kafe abo̱o̱s.

Adakunom nye kushim

⁷ Aro̱, yin aya mi ta shim, won i tu naka shim yir, kamok kushim ne nufe Adakunom. Koangan afe a ta shim ánerawe nye igon Adakunom ne a ren Adakunom.

⁸ Koangan afe a ta shim ánerawe baꞌ, a ren Adakunom baꞌ kamok Adakunom nye kushim.

⁹ Ana ne Adakunom tonong kushim wu kaye̱e̱r yir. A ta tom asuze̱r Igon wu kaye̱e̱r kazatse na nong ase̱ yir tà se̱ yir kutser kamok wu.

¹⁰ Iyu ne i nye kushim'e. Sang yir ne i shim yir Adakunom baꞌ, wu ne a ti shim yir, ne a tom Igon wu nong ka tá be̱ ku kyo̱ndi asidaka kure̱ng rine̱n yir.

¹¹ Aro̱, yin aya mi ta shim, kum Adakunom tin tonong yir kushim wu dide̱ng ana, i tá ma se gye̱r ke yir ma naka shim yir gip.

¹² Akak kun di Adakunom be anyisi baꞌ amma ke i naka shim yir, i nye ye Adakunom se kaye̱e̱r aye̱ yir ne kushim wu shining kaye̱e̱r aye̱ yir makiyi.

¹³ Yir ren yir ye yir se yir kaye̱e̱r wu ne wu se kaye̱e̱r aye̱ yir gip, kamok Adakunom ti no̱o̱k yir Kabik wu Kazhe̱l'e.

¹⁴ Yir n di yir be anyisi yir ne i bun i taas yir ánerawe katsak'e ye Adakunom n tom Igon wu nong ka tà sor aner a tana shesh kazatse na.

¹⁵ Aner aya a ta fe̱ ye aYeso nye Igon Adakunom, Adakunom se kaye̱e̱r wu ne wu se kaye̱e̱r Adakunom gip.

¹⁶ Kamok anong yir ren yir ne i ni fereng yir nushim Adakunom kufe katsak a ta be natoon yir. Adakunom nye kushim. Koangan afe a ta shim ánerawe se kaye̱e̱r Adakunom ne Adakunom se kaye̱e̱r wu gip.

¹⁷ Be anong ne kushim yir tà shining kaye̱e̱r aye̱ yir nong ase̱ tà se yir dar inyim nasho̱o̱n Adakunom katuk wu tana to̱ kazatse amok. Kamok yir se yir kyo̱ndi wu nazatse na.

¹⁸ Ke kushim kuse inyim tu kuse baꞌ, kamok kushim katsak tu ro inyim. Aner aya a ta fok inyim to̱ ye a tu ku to̱ amok. Aner aya a ta fok inyim be kushim kufe katsak baꞌ.

¹⁹ Yir shim yir Adakunom kamok wu ne a san ku ni shim yir.

²⁰ Ke akak fe̱ ye wu shim Adakunom ne a rawu áronyining wu, i nye ye a be abo̱o̱s, kamok aner aya a ta shim áronyining wu aya wu tu ku di baꞌ, a ta kyem a shim Adakunom aya wu ta won dar a di baꞌ.

²¹ Adakunom fe̱ be yir ye, koangan afe a tu ku shim ra shim áronyining wu dim gip.