1 aTimoti 6 - Izere New Testament

¹ Áner aya á ta nye ásam cice̱r ra fok átekasa ba ato ne á ka no̱o̱k ba kuyiik ba nong fan akak bu zhe̱e̱sh riyerek Adakunom ne ike̱ng iya yir tá bo̱so̱p yir.

² Ásam áya atekasa ba ta nye áfikuus, sang ásam'me ta ka zhe̱e̱sh ba kamok á ta nye ároneng ba baꞌ. Amma i se gye̱r ke asam'me ka nye ba itomong gye̱r ne á nar ingya kamok áner á ta ya nubo̱k ba nye áfikuus ne á shim átekasa ba. Iyu ne inye ike̱re̱ iya wan tana ka bo̱so̱p ba'me ne wan ku no̱o̱k ba itabak nong a ta kuus.

Kushim itso̱m dide̱ng be̱ be kuwei

³ Ke aner akak bo̱so̱p ánerawe ike̱ng ikak ze̱e̱r be iya Agwo̱m Ágwo̱m yir aYeso Kiristi tá bo̱so̱p ne kuri kuya ku ta nye kufe áfikuus Adakunom baꞌ,

⁴ aner kuri ayong be kuka ne a ra ren ike̱ng ikak baꞌ. A be amaan ise ne a shim nanan be akikar natoon abaan azhizhe̱k rife̱ naya na tana be̱e̱n be rishishim be kuren ne ritok be amaan kuto̱ natoon akak,

⁵ ne á ya nanan be áya a ta be akpe̱de̱ng kuto̱ro̱ng ne katsak kam be ba. Ba di ye kusor kuri kuya Adakunom ta shim nye iren ikak ife ba tana se̱ itso̱m.

⁶ Amma ke aner aya a ta sor kusor kuri kufe Adakunom ta shim ne a ni fan be ike̱ng iya wu ta be, aner'e be agbang kurum.

⁷ Kamok sang yir be̱ yir be ike̱ng ikak kaye̱e̱r kazatse baꞌ, yir ta tseng yir be ike̱ng ikak baꞌ.

⁸ Amma ke yir be yir naya be ares kute ike̱re̱ iyong ti kyem yir.

⁹ Amma áner aya a ta shim á ta te arum ti gor ni kon i nye rine̱n ne á ku yiir kaye̱e̱r amaan ike̱re̱ iduk ife kuro̱m, ife i tana kuman ba ma i ta tseng be ba naro̱ á tana ku beseng ne á wei.

¹⁰ Kamok kushim itso̱m ne kunye ritin koakye kuri amaan kunye. Áner ákak kamok kushim itso̱m dide̱ng ma á won kuno̱o̱k katsak ba nong á ta te rice ba kaye̱e̱r amaan risam dide̱ng.

Itabak aBulus tá no̱o̱k aTimoti nigang'e

¹¹ Amma wan, aner Adakunom, kuteng ike̱re̱ na cei ni te rice wan ni itse̱r ike̱ng iya i ta se gye̱r nasho̱o̱n Adakunom, ike̱ng iya Adakunom ta shim, be kuno̱o̱k katsak ne kushim be ku naka tsesek ne kuse tatan.

¹² Ko̱n kuren kutek kaye̱e̱r kuno̱o̱k katsak. Yiir kutser kufe izen izen kuya a ta ka yis mo nizen iya wan ta fe̱ nasho̱o̱n ánerawe whe̱r ye wan shan aKiristi.

¹³ Nasho̱o̱n Adakunom afe a ta no̱o̱k koakye ike̱ng kutser ne aYeso Kiristi aya a ta fe̱ katsak natoon rice wu nasho̱o̱n aBuntus Bilatus, a tá fe̱ atuk katsak. Mi ta nye akusuk ye,

¹⁴ wan rinye itomong be rife̱ na zhe̱l ka dar narik ma nizen iya Agwo̱m Ágwo̱m yir aYeso Kiristi tana be̱.

¹⁵ Kube̱ aYeso ta se nizen iya Adakunom ta di i tu se gye̱r. Adakunom ne a nye aya ánerawe tu ku kerek, ne wu ne a be kukyem cei, agbang Agwo̱m Ágwo̱m, Agwo̱m natoon ágwo̱m cei.

¹⁶ Wu ze̱e̱r ne a ku baꞌ a sor na akanang aya akak tana kyem a tseng bubarak be wu baꞌ, aya akak ta kun ku di ka a ta kyem a ku di baꞌ. Kuyiik be kukyem nye kufu ma izen izen. Anong.

¹⁷ Tak áya a ta be kurum kaye̱e̱r kazatse na be agbang kuto̱ ye sang á tu ya kuka be kurum ba baꞌ, ka á tin te aye̱ natoon kurum ba baꞌ, kuya ku tana gang koakye izen. Amma á rin te aye̱ na Adakunom aya a tin nyesek yir koakye ike̱ng kpe̱ iya yir tanin fok yir kusas'e.

¹⁸ Ka tak ba be agbang kuto̱ ye á ra nye kunye kutek, á rin barang kurum kunye kunye kutek dide̱ng ne a se washak ne a shim kuno̱o̱k ike̱ng.

¹⁹ Ke ba nye anong ne a ta tusung ike̱re̱ itek kamok rice ba kaye̱e̱r kaza ne i sor agbang kanye̱k kamok izen i ta saase nong ase̱ yin ta se̱ yin kutser ku ta nye kufe katsak.

²⁰ aTimoti, ni sak riye̱ be ike̱ng iya a ta ka no̱o̱k amana'me. Kam be akpe̱de̱ng itak ne rife̱ kuzhe̱e̱sh Adakunom ra wan abo̱o̱s a ta yis ye kuren ike̱ng,

²¹ áya ánerawe akak ta min kam be iren kuno̱o̱k katsak ba. Ritek ra se mak be yin.