1 aTimoti 5 - Izere New Testament

Itabak natoon ákumung ne ásho̱n be ásam

¹ Sang tu zhe̱e̱r aner asho̱n hash baꞌ, amma fe̱ be wu kyo̱ndi a nye ada wan. Nye be ácam kyo̱ndi áronyining wan.

² Nye be anyako kyo̱ndi á nye ángo̱ wan, nye be nanamang kyo̱ndi ángasnyining wan be kuto̱ro̱ng kutek natoon ba.

³ Ni sak riye̱ na ányining aya átek ba tá kus, áya sang á ta be akak ba ko cie̱k.

⁴ Amma ke akumung'e be inoon ka nabon ayi, inoon'e be nabon'e ra kuus ike̱ng iya rife̱ Adakunom ta fe̱ nong á tin sak riye̱ na ango̱ ba'me. Kamok be anong ne ba tu ku karang ike̱ng iya ángo̱ be ákaka ba'me tá ka nye ba'me. Iyong ne i nye ike̱ng iya Adakunom ta shim.

⁵ Abining aya amitek wu tá ku, aya a ta be akak a tana ku tobok baꞌ, a rin te riye̱ wu na Adakunom ne a ya kasho̱o̱n be ku nye aduwa kunom be katuk nong Adakunom tu ku no̱o̱k ike̱ng wu ta shim.

⁶ Abining aya amitek wu tá ku, a ra bun a shim a ta fok kusas kusor wu tse̱r, a se kyo̱ndi a nye atser a ra nye kukom'e kaye̱e̱r kabik.

⁷ Kuno̱o̱k ba itak na be agbang kuto̱ nong fan ánerawe bu fe̱ ye sang á tin sak riye̱ na ákumung áya a ta se dar akak baꞌ.

⁸ Aner aya ne a ti sak riye̱ na afe iri wu baꞌ, abanang áfekari wu baꞌ, aner kuri ayong ton kuno̱o̱k katsak wu. A nye amaan'e ne a nar aner aya afe sang a tá min no̱o̱k katsak na aYeso baꞌ.

⁹ A ta zibir riyerek akumung aya aye̱ wu ta raar iso̱k igataar, aya a tá won dar a nye katsak nizen iya amitek ta rusek be kutser, kaye̱e̱r ákumung baꞌ.

¹⁰ A ra nye aner aya a tu ku ren be kunye kutek kyo̱ndi ku ni sak riye̱ na inoon gye̱r ne kuren kushashang átsen ne a nye áfikuus Adakunom itomong kaye̱e̱r kumees rice ne a tobok áya a ta se nutser ne a ni sak riye̱ wu ninye ike̱re̱ i ta nye itek, a tu ku fa kaye̱e̱r ákumung.

¹¹ Amma tu te riyerek ákumung áya a ta ru nye nanamang kaye̱e̱r ayerek akumung baꞌ. Kamok izen iya iro̱m ba kpaan i ku daam ba á ta won kuno̱o̱k kuto̱ kuya ba tá nye be aKiristi ne a nye iwe̱ne̱ng.

¹² Kamok anong Adakunom tu ku to̱ ba amok kamok ba tá kyem á kuus ike̱ng ba ta tsang á fe̱ ye ba tá nye baꞌ.

¹³ Ke ba nye anong á me̱ be akpe̱de̱ng kusor ne á tsang á kar na nasa. Sang á sor kpe̱de̱ng tsek baꞌ, amma á tseng á nye imok ne á tsang á ni tes kanu nike̱re̱ ánerawe. Á tsang á fe̱ ike̱re̱ iya i ta taas ke ba fe̱ baꞌ.

¹⁴ Mi nar ku shim ákumung áya a ta ru nye nanamang ra nye iwe̱ne̱ng nong á ta tes inoon ne á ni sak riye̱ ninasa ba fan á bu no̱o̱k ámudo̱n iren naborok.

¹⁵ Mi fe̱ anong kamok ákumung'e ákak áya a ta ru nye nanamang'e mu ku bun nufe Ishetan.

¹⁶ Ke abafikuus akak kuse aya a ta be ákumung kaye̱e̱r kuri ba, to̱, a ru ku tobok sang a tu won áfikuus tin furku niba baꞌ. Kamok anong tà no̱o̱k áfikuus iren nong á tin sak riye̱ na ákumung áya sang á ta be akak baꞌ.

¹⁷ A rin sak riye̱ dide̱ng na áko̱k kasho̱o̱n ikilisiya áya a ta nye itomong ba gye̱r, abanang áya itomong ba ta nye awazi rife̱ Adakunom be kubo̱so̱p ánerawe'me ba.

¹⁸ Kamok kufumung rife̱ Adakunom fe̱ ye, “Sang tu rosom inyak kanu nong tu ku roon kuya naya nizen i ta se naro̱ kushushu naya baꞌ,” ne ri bun rife̱ gbak ye, “I se gye̱r aner a tá nye itomong ta se̱ ishorong wu.”

¹⁹ Sang tu shim rife̱ a ta ka tak natoon akok kasho̱o̱n ikilisiya gbashak baꞌ, ma ke áner afa ka ataar ayi kuus kama aner a ta be̱ be rife̱'me.

²⁰ Natoon ákok kasho̱o̱n Ikilisiya áya a ta nye rine̱n, ku zhe̱e̱r ba nasho̱o̱n ánerawe nong ase̱ ákak ta fok inyim kunye'me.

²¹ Nasho̱o̱n Adakunom ne aYeso Kiristi ne ámaleka a ta kasa, mi ta nye akusuk ye, i ra kuus ike̱re̱ mi ta fe̱ be wan na gye̱r gye̱r sang be kushim rice ka ku tonong ye wan shim akak ne i nar'e baꞌ.

²² Nye tatan be ku nisaas ibo̱k ritek natoon anerawe ye nong a ta sor ako̱k kasho̱o̱n ikilisiya, tu won rine̱n akak tin ngarak natoon wan baꞌ. Amma sor zhe̱l.

²³ Sang tu yiir kuso̱ awan ashi tsek baꞌ, amma so̱ ashi anap aya a ta se kpukpa cie̱k kamok kuro̱k kafa wan ne kuro̱k wan ye̱rye̱r'ong.

²⁴ Rine̱n ánerawe ákak se kanang, ri wor ri se kanang kum dar a tseng'e naro̱ amok, amma rine̱n rife̱ ákak, ma ri sok izen ri ta ra wuruk.

²⁵ Anong ne kunye kutek se na akanang gip, kunye kutek kuya ku ta se na akanang baꞌ, a ta kyem a ne̱r baꞌ.