1 aTimoti 4 - Izere New Testament

Itabak a ta no̱o̱k aTimoti

¹ To̱, Kabik ti tonong yir kanang ye kaye̱e̱r inom igang'e, ánerawe ákak ta won kuno̱o̱k katsak kufe áfikuus nong á ta kuus nabik nafe na ta wo̱ro̱k ánerawe ne ike̱re̱ iya amaan nabik ta bo̱so̱p ánerawe'me.

² Kubo̱so̱p na ta ne nufe ákardak áner afe abo̱o̱s áya aye̱ ba tan kus cei.

³ Áner kuri ayong roon ánerawe kunye kuwe̱ne̱ng ne kuya naya kuri nakak. Amma Adakunom nye naya kamok ánerawe áya a tin no̱o̱k katsak ne á ren katsak nong á tà shan be riye̱ rikan.

⁴ Kamok koakye Adakunom ta nye, i nye itek, i ta se gye̱r ta gaar yir ike̱ng ikak baꞌ, ke i shan yir be riye̱ rikan.

⁵ Kamok Adakunom sak tá te zhe̱l be rife̱ Adakunom ne aduwa.

Aner itomong aKiristi

⁶ Ke wan bo̱so̱p ároneng itak na, to̱, wan ta te aner itomong aYeso Kiristi afe katsak, aya a tan rasak kaye̱e̱r rife̱ natoon kuno̱o̱k katsak be kubo̱so̱p kutek wan ta kuus'ong.

⁷ Tin te rice wan nifoos ákpe̱de̱ng atin áfe kasho̱o̱n baꞌ. Amma yiir no̱o̱k rice wan nong ta bo̱so̱p kuse kuri kufe Adakunom.

⁸ Kamok kutabak kuro̱m se gye̱r nizen ikak, amma kutabak kabik anerawe se gye̱r ne ku nar'e kamok ku ta ka tobok kaye̱e̱r kusor kyo̱o̱rna be kusor kufe kasho̱o̱n nama riku.

⁹ Rife̱ na nye katsak, i se gye̱r koangan ta shan ibo̱k ifa.

¹⁰ Ike̱re̱'ong ne ri sak yir ta nye yir itomong dide̱ng ne i tsesek yir kamok yir ta min te yir riye̱ na Adakunom afe kutser, Aner Kashesh ánerawe cice̱r, abanang áfe a ta min no̱o̱k katsak baꞌ.

¹¹ Fe̱ ike̱re̱ na be agbang kuto̱ ne i bo̱so̱p ánerawe'me.

¹² Sang tu won akak ta ka zhe̱e̱sh ye kamok wan ta ru nye acam baꞌ, amma sak riye̱ be rife̱ wan be kuri kutseng wan ne kuri kushim wan be kuno̱o̱k katsak wan ne kuse zhe̱l wan nong ase̱ wan ta sor ike̱ng kumaas nufe áfikuus.

¹³ Nizham mi ta ra be̱, ya kasho̱o̱n be kufa ánerawe afumung rife̱ Adakunom ne i ka nye ba awazi ne i ka bo̱so̱p ba'me.

¹⁴ Sang tin yo̱ro̱k be kunang kuya Adakunom ta ka no̱o̱k baꞌ, kuya wu ta ka no̱o̱k kaye̱e̱r rife̱ áner kuzarap ta fe̱ ne kusonong áko̱k kasho̱o̱n tin saas ibo̱k ritek natoon wan.

¹⁵ Nye tatan be ike̱re̱ na, ni te rice wan ninye ike̱re̱'me cei nong koangan ta di kuya kasho̱o̱n wan.

¹⁶ Sak riye̱ be kutseng wan ne i sak riye̱ be ike̱ng iya wan tá bo̱so̱p. Na ka tsesek ta nye ike̱re̱'ong kamok ke wan ti nye itomong be ike̱re̱'me, wan ta shesh rice wan be áfe a ta ka foos.