1 aTimoti 3 - Izere New Testament

Ako̱k kasho̱o̱n ikilisiya

¹ Rife̱ a tá fe̱ ye, “Koangan afe a ta be ifeng kute ako̱k kasho̱o̱n ikilisiya, aner'e be ifeng itomong itek,” i nye katsak.

² Ako̱k kasho̱o̱n ra nye aner aya a ta be kuraar nasho̱o̱n ánerawe baꞌ. A ra nye aner aya a ta be abining azining, ne a se tatan, ne a ren a yiir rice wu, ne a nye aner aya ánerawe tu ku sok yiik, a ra nye aner aya a ta shashang átsen ibo̱k ifa, ne a ren a bo̱so̱p ánerawe'me,

³ sang a tu nye aner a ta mak a so̱ kugbe̱re̱ baꞌ, sang aner a ta shim kuren baꞌ, a ra nye aner a ta se whiwhe̱ sang a tu nye aner a ta mak a shim itso̱m baꞌ.

⁴ A ra nye aner a ta kyem a ni sak riye̱ na áfekari wu, ne inoon wu ku no̱o̱k kuyiik wu ne á ku fok kuto.

⁵ Ke anerawe kyem a ti sak riye̱ na áfekari wu baꞌ, to̱, a ta nye ane̱ a tin sak riye̱ na ikilisiya Adakunom e̱?

⁶ Sang aner'e tu nye aner afas nikuus baꞌ, ke anong baꞌ, a ta tsor kafok ma a no̱ kaye̱e̱r kuri amok a tá to̱ Amaan Aner'e.

⁷ Ako̱k kasho̱o̱n ikilisiya ra nye aner aya áfurin ta fe̱ itek natoon wu, fan á bu ku te isum ne a kpa nubo̱k Amaan Aner.

⁸ Anong ne ádikon gip, á ra nye aner aya ánerawe tu ku sok ba yiik, sang áya a ta be nanu nafa baꞌ, ka áya a ta mak á so̱ kugbe̱re̱ baꞌ, ka a tu nye aner a ta mak a shim itso̱m baꞌ.

⁹ Á ra nyeseng be agap natoon kunik kuno̱o̱k katsak a tin tonong yir dim be riye̱ rizining.

¹⁰ Á ta ka bo̱mo̱ng ba nizham; ke a tu ku se̱ ba be ike̱ng ikak imaan'e baꞌ, to̱, ne á ku won ba nong á ta nye itomong ádikon'e.

¹¹ Anong ne ányining ádikon'e, á ra nye aner a ta be kuyiik sang áya a ta be imok baꞌ, amma áya a ta yiir rice ba ne á be katsak kaye̱e̱r koakye.

¹² aDikon ra nye aner aya a ta be abining azining ne a ren ku ni sak riye̱ ni inoon wu be áfekasa wu gye̱r.

¹³ Áner aya a ta nye itomong ba itek gye̱r, se̱s ayerek atek ne á fe̱ be riye̱ rizining natoon kuno̱o̱k katsak ba kaye̱e̱r aYeso Kiristi.

¹⁴ Mi n te riye̱ mi ye ke mi be̱ nufuan kaye̱e̱r inom na gye̱r tatan amma mi ra sen ka zibir itabak na nizham.

¹⁵ Amma ke mi gum be̱ baꞌ, ne wan ren kuri kuse kuya ku ta se gye̱r be áner aya a tana se kaye̱e̱r kasa Adakunom tana se, á ta nye áner Adakunom afe kutser, áya ne á ta nye itsik rino̱k ne ribor katsak'e.

¹⁶ Akak ta kyem a fe̱ kuri kuyiik ku ta se nune̱re̱ng kaye̱e̱r iren ikuus yir na baꞌ. A tonong rice wu kaye̱e̱r kuro̱m, Kabik ti tonong yir ye a nye afe katsak. Ámaleka tú ku di, á fe̱ itak wu nasho̱o̱n ánerawe ze̱r ze̱r, á ti no̱o̱k katsak ni wu kaye̱e̱r kazatse cice̱r, a tu ku sok a ta tseng'e kaye̱e̱r kaza be kuyiik.